Ebaruha oko Abanya Efeso
6 Inywe bana, mubye mukowa ababuti benyu ngoko Omukama anzire, kundi ekyo kyuwene. 2 “Usikaye baba waghu na mama waghu,” ekyo kyo kyalayiro ky’erimbere, kandi kiriko endaghane eno: 3 “Utoke eribana emiyisa n’eribyaho ebiro binene oko kihugho.” 4 N’inywe bobaba, simubye mukahitania abana benyu. Aliwe, mukulayebo erikwamana n’amakangirirya n’amahano wa* Yehova.*
5 Inywe bakobe, mubye mukowa abakama benyu b’oko kihugho, imunemusagha n’erisikya n’omo kwenene, ngoko mwangowa Kristo. 6 Simukole mutya omughulu babalangire risa, busana tu n’eritsemesya abandu. Aliwe, mubye ng’abakobe ba Kristo abakakola ebyo oMungu anzire n’akaghala kabo kosi.* 7 Mukolere abakama benyu n’omutima owuwene. Mubye nga mukakolera Yehova,* butsira abandu. 8 Kundi munasi ngoko Yehova* akendisyaliha obuli mundu busana n’ekibuya kyosi-kyosi ekyo akakola, angabya mukobe kutse omundu oyuli bwiranda. 9 Nenyu, inywe bakama, mubye mukakolera mutya abakobe benyu. Simubye mukabasaghisya, kundi munasi ngoko Omukama wenyu, inywe nabo, ali elubula, kandi iye syawite akasololo.
10 Oko nduli, mubane akaghala ako Mukama akatuha erilabira obutoki bwiwe bunene. 11 Mwambale ebindu by’amalwa by’oMungu, mukasyahambwa omo bitegho* bya Diabolo. 12 Kundi situlilwa n’omubiri n’omusasi. Aliwe, tukalwa n’amatabali, abakulu, abasondoli b’ekihugho kino ekirimo mwirima, ebirimu ebituwene omo lubula. 13 Busana n’ekyo, mwimaye ebindu byosi by’amalwa by’oMungu, mutoke erikinda omo kiro kibi, kandi mutoke erisika mwamabikola ebyosi ebyo mutolere erikola.
14 Neryo musike. Mwambale omo mbindi yenyu omukaba w’ekwenene. Mwambale ekindu ekikateghaya ekikuba ky’eritunganene. 15 Mwambale oko bisando byenyu ebiryato, ni bugha ambu, omuhwa w’erihubirya engulu mbuya y’obuholo. 16 Nikwa, eky’omughaso oko byosi ebyo, mwimaye engabo nene y’obwikirirya. Eyo yo yikendibawatikya erilimya emisali eyakire y’omubi. 17 Kandi mwambale ekikeke ky’ekyuma ky’omulamo. Kandi mwimaye omuyali w’ekirimu, ni bugha ambu, Ekinywa ky’oMungu, 18 imunemukola emihanda yosi y’emisabe, n’emihanda yosi y’erihatikana oMungu omo kirimu. Mukole mutya imunemusaba obuli ndambi, kandi busana n’ekyo, muteghaye imunemuhatikana oMungu obuli ndambi busana n’ababuyirire bosi. 19 Naghe munisabire, kusudi omughulu ngakingula obuno nibane ebinywa, nitoke eribugha butsir’isagha omughulu ngaminyisaya abandu ekumbo* nyibuyirire y’engulu mbuya. 20 Nibohirwe kundi niri muambasadere w’engulu mbuya eyo. Kandi munisabire nitoke eribugha butsira eryubaha ngoko nitolere eribugha.
21 Aliwe, kusudi nenyu muminye nga niri niti n’ebyo ngakola, Tikiko mughala wetu mwanzwa n’omughombe mutaleghula w’Omukama, akendibabwira ebyosi. 22 Ekyo kyo kikaleka inamutuma eyo muli atoke eribabwira ngoko tuli, n’erikirania emitima yenyu.
23 OMungu Tata n’Omukama wetu Yesu Kristo ahe abalikyetu obuholo n’olwanzo oluli m’obwikirirya. 24 Olukogho lubye haghuma n’abosi abanzire Omukama Yesu Kristo omo lwanzo olutendisyahwa.*