Ebaruha y’akabiri oko Abanya Korinto
1 Ebaruha eno ikalua oko Paulo, oyo wabirikirawa atoke eribya mukwenda wa Kristo Yesu erilabira erisonda ry’oMungu, na Timoteo mughala wetu. Ngahandikira endeko y’oMungu eyiri e Korinto, n’ababuyirire bosi abali omo kiharo kyosi kye Akaya.
2 Olukogho n’obuholo bw’oMungu Tata wetu, n’Omukama Yesu Kristo, bibye haghuma nenyu.
3 OMungu, kandi Tata w’Omukama wetu Yesu Kristo, apipawe. Ni Tata oyukaghanyira kutsibu, kandi ni Mungu oyukatukiranaya omo byosi. 4 Akatukiranaya* omo malighe wetu wosi tutoke erikirania abandi abali omo malighe mbiriri-mbiriri, erilabira erikirania erikalua oko Mungu. 5 Kundi tukaghalawa kutsibu busana na Kristo, kutya, tukakiranibawa kutsibu, erilabira Kristo. 6 Lino, tunemwaghalwa mutoke erikiranibwa n’erisabulwa. Kandi tunemukiranibwa, nenyu mutoke erikiranibwa. N’ekyo kikabawatikaya eriyiyinia omo maligho agho netu tunemulabamo. 7 Kandi tuyiketere inywe kundi tunasi ngoko munemwaghalwa nga twe, neryo mukendikiranibwa nga twe.
8 Baghala betu, sitwanzire eribabisa amaligho awatuhikira omo kiharo kye Azia. Mutwaghalwa kutsibu kulenga akaghala ketu, neryo mutwahika oko kika ky’erilengekania tuti tukendihola. 9 Oko kwenene, mutwayowa nga babiritutswera eritibwa. Ekyo kyabya isitwayiketera akaghala ketu, aliwe tuyiketere oMungu oyukalubukaya abaholi. 10 Mwatulusya omo hatari eyo y’oluholo, kandi akendisyatulusya muyo. Kandi twikirirye ngoko syendisyaleka eritulusya omo hatari. 11 Nenyu mwanganatuwatikya omwibya mukasaba kutsibu busana netu. Neryo abangyi bamabisaba, itukendibana obuwatikya busana n’emisabe yabo. N’ekyo ikikendileka abangyi ibasima oMungu busana netu.
12 Tukayihalamba busana n’omwatsi ono: Obunya-mutima* bwetu bukatubwira ngoko tukayighendaya ndeke omo kihugho kino, kutsibu-tsibu omo kati-kati kenyu. Tukayighendaya omo bubuyirire n’omo kwenene y’oMungu, butsira omo menge w’abandu, aliwe omo lukogho lw’oMungu. 13 Kundi emyatsi eyo tukabahandikira, ye n’eyo mwangatoka erisoma* n’eryowa. Kandi nikirirye ngoko mukendyowa emyatsi eyi yo ndeke-ndeke, 14 ngoko mwabiryowa hake ngoko n’itwe tukaleka imwayihalamba, nenyu mukasyaleka itwayihalamba omo kiro ky’Omukama wetu Yesu.
15 Busana n’eriyiketera omwatsi oyo, nabya nanzire eritsuka ewenyu mutoke eribana akanya k’akabiri k’eritsema.* 16 Nabya nanzire inahika ewenyu ngaya e Makedonia, kandi inalaba ewenyu ngalua e Makedonia, neryo mwanganikwamanisirye hake ngaya e Yudea. 17 Mukalengekanaya muti nabya ngasonda erikola ebyo nitendiberererya? Kutse mukalengekanaya muti ngapanga emyatsi ng’abandu b’ekihugho kino, neryo inabugha niti, “Ingaa,” n’enyuma sy’aho niti, “Iyehe”? 18 Aliwe kundi oMungu ni w’ekwenene, situlibugha tuti, “Ingaa,” kwesi ini “Iyehe.” 19 Kundi Omughala w’oMungu, Yesu Kristo, oyo twabakangiriraya, ni bugha ambu, ingye, Silvano,* na Timoteo, mwatabya “Ingaa,” kwesi ini “Iyehe”. Aliwe omo buli mwatsi, iye ni “Ingaa.” 20 Kundi nomo esyondaghane sy’oMungu syangabya singahi, syabiribya “ingaa” erilabira iye. Kandi erilabira iye tukabugha tuti “Amina” omughulu tukasaba oMungu, n’ekyo kikaletera oMungu y’olukengerwa. 21 Nomo bine bitya, oyukakanganaya ndeke-ndeke ngoko inywe netu tuli bandu ba Kristo, kandi oyukatuhirako amaghuta, yo Mungu. 22 Kandi abirituhirako ekindu ekikakanganaya ngoko tuli bandu biwe. N’akandi, abirituha ekindu ekikakanganaya ngoko tukendisyahembwa.* Ekindu ekyo ky’ekirimu kiwe, ekiri omo mitima yetu.
23 Sinirinahika e Korinto kundi sinanzire mukayowa muhanda. Bite bitya, nitakirawe! N’oMungu abye mwimiri* waghe. 24 Si bugha ambu tukasonda eritabala obwikirirya bwenyu. Aliwe, tukakola omubiiri haghuma nenyu mutoke eritsema, kundi obwikirirya bwenyu bo bukaleka imwabya imunimene.