Isaya
66 Yehova ati:
“Olubula ni kitumbi kyaghe ky’obwami, n’ekihugho ni kitumbi kyaghe ky’erihirako ebisando.
Neryo enyumba eyo mwanganihimbira yiri hayi,
N’ah’eriluhukira haghe hali hayi?
2 “Ebyala byaghe byabirikola ebyosi ebi,
Nabyo ko byabyaho bitya,” Yehova atya.
“Neryo oyo ngatungerera y’ono,
Oyukayikehaya n’ow’ekirimu ekibunikire oyukatitimana* busana n’ekikywa kyaghe.
3 Oyukakera enume y’ende ali ng’oyukita omundu.
Oyukaherera embuli, ali ng’oyukatwa ebikya by’embwa.
Oyukaleta ekihembo ali ng’oyukaleta omusasi w’engulube!
Oyukaherera obuhere bw’eryibuka obw’obubani ali ng’oyukatsumula omo binywa by’obukumu.*
Babiriyisogha esyonzira syabo,
Kandi bakatsemera* ebikita esyonye.
4 Neryo ngendiyisogha esyonzira sy’erisuyirabo,
Kandi ngendisyaleterabo emyatsi eyo bakubaha.
Kusangwa omughulu nabirikira, muhatabya oyukitaba;
Omughulu nabugha muhatabya oyukahulikirira.
Mubayitsinga erikola ebibi omo meso waghe,
Kandi mubayisogha erikola ebikaniponesaya.
5 Muhulikirire ekinywa kya Yehova inywe mukatitimana* busana n’ekinywa kiwe:
“Abaghala benyu ababakwire obusu n’abakabaghana busana n’erina lyaghe mubabugha bati, ‘Yehova ahabawe olukengerwa!’
Nikwa akendihika n’erikuletera obutseme,
Nabo bo bakendihemuka.
6 Omulenge w’olukanda amalua omo muyi, omulenge amalua omo hekalu!
Ni mulenge wa Yehova akaliha esyonzighu siwe sy’ebyo sitolere.
7 Mwabuta embere owe obulumi bw’eributa.
Mwabuta omwana w’obulume embere owe obulumi bw’eributa.
8 Nindi yo wabiryowa omwatsi ng’oyo?
Nindi yo wabilangira emyatsi ng’eyo?
Ekihugho kyanganabutwa oko kiro kighuma kwehi?
Kutse ekihanda kyosi kyanganabutwa oko ndambi ngumerera kwehi?
Nikwa Sioni abere abinabya n’obulumi bw’eributa, mwabuta abana biwe b’obulume.
9 “Ngendihikya omwana y’okw’ibutwa neryo initamubuta?” Yehova atya.
“Kutse inaleka habye eributwa neryo kandi inaliba enda?” oMungu waghu atya.
10 Mutseme haghuma ne Yerusalema kandi mutsange-tsange haghuma nayo inywe bosi inywe mwanzireyo.
Mutseme kutsibu haghuma nayo inywe bosi inywe mukalira busana nayo.
11 Kusangwa mukendinyonya* n’eryughuta amabere wayo w’erikirania
Kandi mukendinywa ndeke n’eritsema omo lukengerwa lwayo lunene.
12 Kusangwa Yehova ati:
“Ngamuha obuholo ng’olusi
N’olukengerwa lw’ebihanda ng’olusi olubwaghire.
Mukendisyanyonya* n’erihekwa oko ndungu,
Kandi mukendisyasumbangirwa oko marwi.
13 Ngoko koyo akanakiranaya mughala wiwe,
Naghe ko ngendisyabya ngabakirania nitya;
Kandi mukendisyabya mukakiranibwa busana ne Yerusalema.
14 Mukendisyalangirakyo neryo emitima yenyu ikendisyatsema,
Amakuha wenyu akendisyaboroghonya ng’ebiti bihya-biya.
N’ebyala* bya Yehova bikendisyaminyikala oko baghombe biwe,
Nikwa akendisyahitana oko syonzighu siwe.”
15 “Kusangwa Yehova akendisyasa ng’omuliro,
N’esyongurubani* siwe siri ng’akanyabungu,
Eriliha omo buhitane obukalire,
Erihaya omo birimi by’omuliro.
16 Kusangwa Yehova akendisyaberererya eritswera omo muliro,
Inga, omo muyali wiwe akalwa n’abandu bosi;*
N’abo Yehova akendisyita bakendisyabya bangyi.
17 “Abakayihighula n’eriyerya eriya omo malima* bakakwama oyuli omo kati-kati, abakalya esyongulube n’ebikita nye, n’emisusu, abosi bakendisyahwera haghuma,” Yehova atya. 18 “Kundi ninasi emibiiri yabo n’amalengekania wabo, ninemwasa erisyakuma-kuma abandu b’ebihanda byosi n’emibughe yosi. Nabo bakendyasa ibalangira olukengerwa lwaghe.
19 “Ngendisyahira ekiminyikalo omo kati-kati kabo, n’abaghuma ba kubo abakabala ngenditumabo omo bihanda—e Tarshishi, e Puli, ne Ludi, eyiri abakakakaya obuta, e Tubali ne Yavani, n’oko bitsira by’ehali—abate batowa engulu yaghe kutse erilangira olukengerwa lwaghe; nabo bakendisyatulaghania olukengerwa omo kati-kati k’ebihanda. 20 Bakendisyaleta abaghala benyu bosi erilua omo bihanda byosi mo kihembo busana na Yehova. Bakendisyaletabo oko syosabayiri, omo syongurubani,* omo syongurubani esihimbire, oko syonyumbu, n’oko syongamia esikatibita, erihika oko kitwa kyaghe ekibuyirire, e Yerusalema,” Yehova atya, “ng’omughulu abandu ba Israeli bakaleta ekihembo kyabo omo nyumba ya Yehova omo bindu ebyerire.”
21 “Kandi ngendisyimya kubo, abaghuma eribya bahereri n’abandi ibabya Balawi,” Yehova atya.
22 Yehova ati, “Ngoko olubula luhya-luhya n’ekihugho kihya-kihya ebyo ngahangyika bikendisyabya ibineho embere syaghe, kutya olubuto* lwenyu n’erina lyenyu bikendisyabya ibineho.”
23 “Kandi erilua oko mughenda muhya-muhya erihika oko ghundi mughenda muhya-muhya,
N’erilua oko sabato nyihya-nyihya erihika oko yindi sabato, abandu bosi* bakendisyasa n’eryunama embere syaghe,” Yehova atya.
24 “Kandi bakendisyahuluka n’eritungerera ebinda by’abandu abayisamambula okw’ingye;
Kusangwa emihuka eyiri kubyo siyendisyahola,
N’omuliro wabo syendisyalima,
Bakendisyabya kindu ekikita nye oko bandu bosi.”*