Emisyo
15 Erisubirya omo bolo rikatuleraya ekinigha,
Aliwe ekinywa ekikalire* kikahitanaya.
2 Olulimi lw’abandu b’amenge lukakolesaya ndeke emyatsi eyo basi,
Aliwe olulimi lw’abakiru lukatububukamo obukiru.
3 Ameso wa Yehova ali ehosi-ehosi,
Akabya inianemulebya ababi n’ababuya.
4 Olulimi oluhehere* ni muti w’engebe,
Aliwe ebinywa by’amabehi bikabuna mutima.
5 Omukiru syalitsomana ebinywa by’erikunga bya baba wiwe,
Aliwe omundu w’amenge akaligha erikungwa.*
6 Omo nyumba y’omundu oyutunganene mukabya ebindu bingyi by’obughuli,
Aliwe ebyo omubi akaleta bikamuletera amaligho.
7 Eminywa y’abandu b’amenge ikalalanaya emyatsi eyo basi,
Aliwe omutima w’omukiru syalikola atya.
8 Yehova aponire obuhere bw’ababi,
Aliwe akatsemera omusabe w’abandu abatunganene.
9 Yehova aponire ebyo omubi akakola,
Aliwe anzire oyukakwamirira eritunganene.
10 Oyukaleka enzira eyilungekere akalangira ebinywa by’erikunga nga si byuwene,*
Oyuponire ebinywa by’erikunga akendisyahola.
11 Yehova amabya iniakalangira ndeke-ndeke abali omo Yisinda* n’abali ah’eritoghoterya abandu.*
Neryo anganabula erilangira ebiri omo mitima y’abandu?
12 Oyukasekereraya syalyanza oyukamukunga,*
Syangabulya ow’amenge y’erihano.
13 Omutima owatsemire akaleka obusu ibwatsema,*
Aliwe omutima owali omo obulighe akabugha omo mundu mw’akaghala.
14 Omutima owakayiteghereraya akasondaya eriminya emyatsi mingyi,
Aliwe obuno bw’abakiru bukatsemera* obukiru.
15 Ebiro byosi by’omundu oyukaghalawa ni bibi,
Aliwe omundu w’omutima owatsemire* akabya iniane omo fete biro byosi.
16 Kyuwene eribya n’ebindu bike ighunasaghire Yehova,
Kulenga kw’eribya n’obuteke bungyi obukaleka iwahangya-hangya.*
17 Kamwanya iwalya esyonyinyi ahali olwanzo,
Kulenga kw’erirya enume y’ende eyirimo ebisabu* ahali eriponana.
18 Omundu oyukahitana-hitana akaleka ihabya obuhaka,
Aliwe oyutehitana luba-luba akatuleraya amalwa.
19 Enzira y’omughata yiri ng’oluba lw’amahwa,
Aliwe enzira y’abandu abatunganene yiri ng’enzira nene eyitemo bikwangwa.
20 Omwana w’amenge akatsemesaya baba wiwe,
Aliwe omundu mukiru akapokaya mama wiwe.
21 Omundu oyute n’obwenge* akatsemera obukiru,
Aliwe omundu oyuli n’obutoki bw’eriyiteghererya akaghenda inianasamalire embere.
22 Emyatsi ikatalukana omughulu omundu syetasaba erihano,*
Aliwe emyatsi ikatokekana omughulu hali abahani bangyi.
23 Omundu akatsema abiteka ekisubiryo ekitolere,
N’ekinywa ekikabughawa oko ndambi eyitolere, kyuwene kutsibu!
24 Enzira y’engebe ikatwala omundu w’amenge omo mwanya w’endata,
Kusudi isyaya omo Yisinda* mw’eyikwa.
25 Yehova akendisyahimbula enyumba y’omundu w’emiyiheko,
Aliwe akendisyateya emipaka y’ekitaka ky’omukwa-kali.
26 Yehova aponire amayele w’omubi,
Aliwe akalangira ebinywa ebyuwene mo byerire.
27 Oyukabana endundi omo bwibi akaletera ekihanda kiwe ky’amaligho,*
Aliwe oyuponire ebyutuliro akendisyabyaho mughulu muli.
28 Omutima w’omundu oyutunganene akalengekanaya embere sy’erisubirya,*
Aliwe obuno bw’ababi bukatububukamo emyatsi mibi.
29 Yehova ali hali oko bandu babi,
Aliwe akowa omusabe w’abandu abatunganene.
31 Oyukahulikirira ebinywa by’erikunga ebikaha engebe
Ikere haghuma n’abandu b’amenge.
32 Abosi abakaghana ebinywa by’erikunga bakapokaya engebe* yabo,
Aliwe oyukahulikirira ebinywa by’erikunga akabana obutoki bw’eryowa emyatsi yo ndeke.*
33 Eryubaha Yehova rikakangiriraya omundu eribya n’amenge,
Embere sy’eribana olukengerwa hakatsuka habya eriyikehya.