Ekiriro
א [Aleph]
3 Niri mundu oyo walangira amaligho busana n’efimbo y’erihitana riwe rinene.
2 Mwanitibitako, kandi akanilabaya omo mwirimya, butsira omo kyakakala.
3 Omw’itungyi ryosi, akabya inianemukakya ebyala biwe atoke erimba amalipizi.
ב [Beth]
4 Abirihondya omubiri waghe n’engobi yaghe.
Abiribunanga amakuha waghe.
5 Abirinitimbako atoke erilwa naghe; abirinitimbyako esumu eyikalihire n’obuhanya.
6 Abirinikasa erikala omo myanya eyirimo mwirimya, ng’abandu abahola kera.
ג [Gimel]
7 Abirinitimbyako oluhimbo kusudi isinatswa.
Abiriniboha omo minyororo* y’ekwivre* eyilitohire.
8 Omughulu ngasaba obuwatikya kundi inabiriyibula, akaghana erihulikirira* omusabe waghe.
9 Abirikinga esyonzira syaghe sy’omo mabwe awabatsire.
Abirihengemya esyonzira syaghe.
ד [Daleth]
10 Akanilimbaya ng’edubu, ng’esimba eyabiriyibisa.
11 Mwanikasa erilua omo syonzira syaghe kandi mwakanitulanga mo bihande-bihande.*
Abirinihira omo mbwera.
12 Abirikondomya* obuta* bwiwe, n’erinimania atoke erinighusako omusali.
ה [He]
13 Mwakatobola-tobola esyombiko syaghe omo misali* eyiri omo lubo* lwiwe.
14 Abandu bosi bakanisekereraya. Omo musibo wosi, ingye bakahula omo syonyimbo syabo.
15 Abiriniusulyamo ebindu ebikalihire kandi abiriniusulyamo engalihira.
ו [Waw]
16 Akatwa ameno waghe omo hibwe hike-hike.
Abirinitoberya omo ribu.
17 Abirinibughako obuholo. Nabiribirirwa ekyuwene.
18 Ekyo kyabirileka inabugha niti: “Olukengerwa lwaghe lwabirihwaho, kandi sinikilindirire omwatsi wosi-wosi oko Yehova.”
ז [Zayin]
19 Wibuke amaligho waghe kandi wibuke ngoko singwite obwikalo,
Wibuke engalihira n’esumu eyikalihire.
20 Oko kwenene, ukendyibuka* n’eryunama utoke eriniwatikya.
21 Nikinibukire ekyo; kyo kikendileka inalindirira ininemuhanda omutima.
ח [Heth]
22 Olwanzo oluteleghula lwa Yehova lo lulyaleka itwatahwaho,
Kundi obughanyiri bwiwe sibwendisyahwa n’ahake.
23 Bukabya buhya-buhya obuli tututu. Obutaleghula bwaghu ni bunene.
24 Munabugha niti: “Yehova ni mwandu* waghe; kyo kikendileka inamulindirira ininemuhanda omutima.”
ט [Teth]
25 Yehova uwene oko mundu oyukamuhiramo amaha, oko mundu* oyuteleka erimusondya-sondya.
26 Kyuwene erilindirira Yehova asabule ighune bukutu.*
27 Kyuwene oko mundu erilaba omo maligho* iniakine mulwana.
י [Yod]
28 Ikale iyuwene kandi abye bukutu omughulu oMungu akamuletera amaligho.*
29 Akunde obuno bwiwe bw’omo lututu. Hanganabya ihakine amaha.
30 Ahirire oyukendimumatula y’eritema riwe. Alighe eritsambwa olosi.
כ [Kaph]
31 Kundi Yehova syendisyatusighania kera na kera.
32 Nomo analyaleta obuligho, kutya akendighanyira kundi awite olwanzo lunene oluteleghula.
33 Kundi syali n’omutima w’eryaghalya abaghala b’abandu kutse eribita obulighe.
ל [Lamed]
34 Oyukalyatangira abandu bosi b’oko kihugho abali omo ngomo,
35 Oyutekolera oghundi omo ritunganene embere sy’Ow’endata Kutsibu,
36 Oyukaleka omulikyabo iniatatswerwa omo ritunganene,
Yehova syalyanza emyatsi eyiri ng’eyo.
מ [Mem]
37 Nindi yo wangabugha n’eriberererya ebyo alyabugha Yehova atitabugha ati bibye bitya?
38 Omo buno b’Ow’endata Kutsibu simulilua
Emyatsi eyutuwene n’emyatsi eyuwene kughumerera.
39 Neryo busanaki omundu akayilungumula abibana ebikaluira omo rilolo riwe?
נ [Nun]
40 Tutsopolaye n’erilebya ndeke emighendere yetu, kandi tusubire Yehova.
41 Tusumbire oMungu oyuli elubula y’emitima yetu n’ebyala byetu.
42 “Twabirikola erilolo n’eritendikwama obusondoli bwaghu, kandi siwetatughanyira.
ס [Samekh]
43 Omo buhitane mughukatukakiraya eriseghera hakuhi naghu,
Mughukatukwamirira n’eritwita butsir’ikwa obulighe.
44 Mughukatukakiraya omo kitu eriseghera hakuhi naghu, kusudi emisabe yetu isiyalaba mukyo.
45 Wabirituyira mo mutsafu n’ebindu ebitawite mughaso omo kati-kati k’abandu.”
פ [Pe]
46 Esyonzighu syetu syosi sikatubughako muhanda.
47 Tuli omo buba, tukatoghera omo byuna, twabiribya omo bulighe, kandi twabiribunika.
48 Esyonyusi sinemulua omo meso waghe busana n’eribunika ry’amwali w’abandu baghe.
ע [Ayin]
49 Ameso waghe kw’anemulira, syaliluhuka,
50 Erihika omughulu Yehova akendisamalira n’erilangira iniane elubula.
51 Ameso waghe abirinita obulighe busana n’erilangira ebiryahikira abambesa bosi b’omo muyi waghe.
צ [Tsade]
52 Esyonzighu syaghe syabirinihigha ng’akanyunyu isihali ekikaleka.
53 Babirihunirya engebe yaghe y’omo kyuna. Mubatitaleka erinighusako amabwe.
54 Amaghetse abirilaba oko mutwe waghe, neryo mungabugha niti: “Namahwa!”
ק [Qoph]
55 Yehova, mungalakira erina ryaghu inine omo kyuna mw’emwisi-mwisi.
56 Uhulikirire omulenge waghe! Isiwahoma amatwi waghu omughulu ngakusaba niti uniwatikaye, niti unituleraye.
57 Ekiro nakubirikira, muwaseghera hakuhi naghe. Muwanibwira uti: “Sighusaghe.”
ר [Resh]
58 Yehova, mughukanilwirako, mughukakombola engebe yaghe!
59 Yehova, mughukalangira ekibi ekyo balyanikolera. Kisi, unikolere omo ritunganene.
60 Mughukalangira ngoko balyayituhuliraya, ebyosi ebyo balyanisohera.
ש [Sin] kutse [Shin]
61 Yehova, mughukowa ngoko mubakanitsamba, ebyosi ebyo balyanisohera.
62 Mughukowa ebiryalua oko minywa y’esyonzighu syaghe n’ebyo balyanibughako omo hihwe-hwe omo musibo wosi.
63 Usamalirebo! Bangabya ibikere kutse ibimene, bakabera erinisekererya omo syonyimbo syabo.
ת [Taw]
64 Yehova, ukendisyalihabo erikwamana n’ebyo bakola.
65 Ukendisyakalya-kalya omutima wabo, ko ukendisyabatakira utya.
66 Ukendisyakwamirirabo omw’ihitana ryaghu n’eribabughaho eyikwa w’olubula lwa Yehova.