Isaya
13 Eritswera busana ne Babiloni eryo Isaya mughala wa Amozi alangira omo nzoli:
2 “Muhanganaye ekiminyikalo* oko bitwa by’amabwe awahangamire.*
Mughuse kugho k’omulenge, mupepele ebyala,
Ase n’eriingira omo syongyo sy’esyoseghu-seghu.
3 Nabirilayira abo nabirisombola.*
Nabiribirikira abalwi baghe eriberererya erihitana ryaghe,
Abandu baghe abakayihalamba n’eriyiheka.
4 Muhulikirire! Ekikumula ky’abandu omo bitwa;
Kikabughaya nga ni bandu bangyi!
Muhulikirire! Olukanda lw’amami,
Olw’ebihanda ebihindene haghuma!
Yehova w’emilondo akahindanaya abasuda busana n’amalwa.
5 Yehova n’ebyamano by’erihitana liwe,
Banemwasa erilua omo kihugho ky’ehali,
Erilua oko nduli sy’ekyanya,
Erileta eriherya oko kihugho kyosi.
6 Muyilakire, kusangwa ekiro kya Yehova kiri hakuhi!
Kikendyasa ng’eriherya erikalua oko Mutoki w’Ebyosi.
7 Busana n’ekyo, ebyala byosi bikendinoghokala,
N’omutima w’obuli mundu akendilua omo nda busana n’obuba.
8 Erihandabuka lyabirihikira abandu,
Erisuka-sukana n’obulumi byabiribahikira,
Ng’omukali oyuli omo bulumi akasonda eributa.*
Bakasamalirana omw’isweka erikalire,
Amusu iniabiryusulamo obulighe.
9 Lebaya! Ekiro kya Yehova kinemwasa,
Kitsatsuhire omw’ikarama n’erihitana erikalire,
Eriyira ekihugho mo kindu ky’eriswekera,
N’eritoghotya abakola-nabi b’oko kihugho erilua mukyo.
10 Kusangwa esyongununu sy’ekyanya n’ebikuto by’esyongununu by’ekyanya*
Sibyendisyaleta ekyakakala kyabyo;
Eryuba likendisyabya mwirimya likahuluka,
N’omughenda syendisyaleta ekyakakala kyagho.
11 Ngendisyabirikira ekihugo eritonda busana n’obubi bwakyo,
N’ababi busana n’ekibi kyabo.
Ngendisyabughaho emiyiheko y’abakayilabiriraya,
Kandi ngendisyabonderya eriyihaghata ly’abanubya.
12 Ngendisyaleka omundu buyira inyabula kwilaba ehoro ey’erire,
N’abandu ibabula kwilaba ehoro ye Ofiri.
13 Ekyo kyo kikendisyaleka inasuka-sukania ekyanya,
N’ekihugho kikendisyasuka-sukana erilua omo mwanya wakyo
Busana n’erikarama lya Yehova w’emilondo oko kiro ky’erihitana liwe erikalire.
14 Ng’engabi eyikahighawa kandi ng’ekihyo ekitawite oyo wangakuma-kumakyo,
Obuli mundu akendisyasuba eyiri abandu biwe;
Obuli mundu akendisyatibita omo kihugho kiwe.
15 Owosi-wosi oyukendisyeyibwa, akendisyatsimitwa,
N’owosi-wosi oyukendisyahambwa, akendisyakwa omo muyali.
16 Abana babo bakendisyaghuswa mo bitswe-bitswe omo meso wabo,
Amanyumba wabo akendisyatulwa,
N’abakali babo, nabo bakendisyimibwa kinyanganga.
18 Amata wabo akendisyatulanga abalwana;
Sibendisyakwira ekyalua omo nda ky’obulighe bwosi-bwosi
Sibendisyasasira abana.
19 Ne Babiloni, obwami bw’olukengerwa lunene* omo kati-kati k’amami,
Obubuya n’eriyiheka ry’Abakaldayo,
Ikendisyabya nge Sodomo ne Gomora omughulu oMungu akindabyo.
20 Siyendisyasyikalwamo,
Kutse eribya mwanya w’eriikalamo omo bizazi* byosi.
Sihali Omuarabu oyukendisyahanda ehema yiwe y’eyo,
Kandi sihali n’abalisya abakendisyaluhukiryayo ebihangulo byabo.
21 Esyonyama sy’omo lukwesese sikendisyabundamayo;
Amanyumba wabo akendisyusulamo ebibukulu.
22 Esyonyama esikalaka sikendisyalakira omo manyumba wayo mali-mali,
N’esyombwa sy’omoli* sikendisyalakira omo manyumba wayo w’abami awaghambire kutsibu.
Omughulu wayo ali hakuhi, n’ebiro byagho sibyenditomekwako.”