Ezekieli

23 Kandi ekinywa kya Yehova mukyanihikako, kiti: 2 “Mughala w’omundu, habya abakali babiri ababya bali ba koyo mughuma. 3 Mubakola obumbalaka e Misri; mubakola obumbalaka erilua omo busika bwabo. Eyo, amabere wabo mwahimatwa, n’ebikuba byabo by’obubikira mubyatulwa-tulwako. 4 Amena wabo w’ano, omukulu inyakahulawa mo Ohola,* na mwali wabo inyakahulawa mo Oholiba.* Mubabya baghe; nabo mubabuta abana b’obulume n’ab’obukali. Oko bilebirye amena wabo, Ohola ni Samaria, na Oholiba ni Yerusalema.

5 “Ohola mwatsuka erikola obumbalaka inyane naghe. Mwayitsutsa erikola emyatsi y’engyingo n’abaraghane biwe abamwanzire kutsibu, ni bugha ambu abahimbani biwe, Abaasiria. 6 Babya baguvernere abambite esyongyimba sye ble n’abatabali—abalwana abakayitsutsawa abakaghenda oko syosabayiri. 7 Mwalola embere erikola obumbalaka n’abana b’obulume be Asiria, kandi mwayitsandya omo syosanamu esikita nye* sy’abo ayitsutsa erikola nabo emyatsi y’engyingo. 8 Mwataleka obumbalaka obo akola e Misri. Kusangwa eritsuka omo busika bwiwe mubaghotsera naye, kandi mubanyighitsa ekikuba kiwe ky’obubikira n’erimubughirako esyongumbu syabo.* 9 Neryo munamuhira omo byala by’abaraghane biwe, abaghala be Asiria abo ayitsutsa kutsibu erikola nabo emyatsi y’engyingo. 10 Mubaswikula endumbu yiwe n’erihamba abaghala biwe n’abali biwe, kandi mubamwita omo muyali. Mwabya n’erina libi omo kati-kati k’abakali, nabo mubamusuyira ngoko nanamutswera.

11 “Mwali wabo ye Oholiba abere alangira ekyo, engumbu yiwe y’emyatsi y’engyingo muyakanya, kandi mwatsanda nibya kwilaba na mwali wabo. 12 Mwayitsutsa abahimbani biwe, abaghala be Asiria, abaguvernere n’abatabali bake-bake abambite esyongyimba sy’olukengerwa n’abakaghenda oko syosabayiri—abalwana bosi abakayitsutsawa. 13 Omughulu ayitsandaya, munalangira ngoko abosi babirikwama enzira ngumerera. 14 Nikwa mwakanyirirya obumbalaka bwiwe. Mwalangira abalume abadesire oko luhimbo, ebisosekanio by’Abakaldea ebidesire omo rangyi y’omusasi,* 15 ibambite emikaba omo mbindi syabo n’esyosapu sy’ebilemba isinalelembire oko mitwe yabo. Babya basosire abalwi mbangyi, abosi ibasosire Abababiloni, ababutirawa omo kihugho ky’Abakaldea. 16 Abere abinalangirabo, mwatsuka eriyitsutsa erikola nabo emyatsi y’engyingo, neryo mwatuma kubo kw’abatumwa e Kaldea. 17 Neryo abana b’obulume be Babiloni mubabya bakasa oko ngyingo yiwe y’erikolerako emyatsi y’engyingo, nabo mubamutsandya omo ngumbu yabo y’erikola emyatsi y’engyingo.* Babere babimutsandya, mwalekabo* inyabirikwabo esyonye.

18 “Omughulu alola embere omo bumbalaka bwiwe butsira erikwa esisoni n’eriswikula endumbu yiwe, munamuleka inabirimukwa esyonye, ngoko nanaleka* mwali wabo inabirimukwa esyonye. 19 Kandi mwataleka erikanyirirya obumbalaka bwiwe, akibuka ebiro by’obumbesa bwiwe omughulu akola obumbalaka omo kihugho kye Misri. 20 Mwayitsutsa erikola nabo emyatsi y’engyingo, ng’abahweki abo abalume babo bawite ebitsuko by’olubuto ebiri ng’eby’epunda n’abo obusoni bwabo buli ng’obw’esabayiri. 21 Muwakandira oburaghane bw’omo busika bwaghu, omughulu wabya e Misri, omughulu babya bakanyighitsa ekikuba kyaghu, amabere w’omo busika bwaghu.

22 “Neryo iwe Oholiba, Yehova Omukama Mukulu oko Bosi ati: ‘Hano, ngatsotsaya abaraghane baghu abo wasighanaya iwabirikwabo esyonye. Ngendiletabo ibalwa naghu oko mbande syosi; 23 abana b’obulume be Babiloni, n’Abakaldea bosi, abalume be Pekodi ne Shoa ne Koa, haghuma n’abana bosi b’obulume be Asiria. Ibo bosi ni balwana abakayitsutsawa, abaguvernere n’abatabali bake-bake, abalwi, n’abalume mbangyi abasombwerwe,* abosi abakaghenda oko syosabayiri. 24 Bakendilwa naghu omo syongurubani sy’amalwa* esikabughaya olukanda n’ebiringo n’omulondo munene w’abasuda, omo ngabo nene n’akangabo kake* n’ekikeke ky’oko mutwe. Bakendikutimbako, kandi ngendihamulabo niti bakutswere, kandi bakendikusohera ngoko bamalangira ikitolere. 25 Ngendikukangania erihitana lyaghe, nabo bakendikukolera omo buhitane bwabo. Bakenditwa enindo yaghu n’amatwi waghu, n’ab’okw’iwe abakendisaka bakendikwa omo muyali. Bakendiheka abaghala baghu n’abali baghu, n’abandu abakendisaka bakendikwa omo muliro. 26 Bakendikulusya esyongyimba, ibimya n’amaningita waghu n’emiseghe yaghu* eyuwenenga. 27 Ngendibugha emighendere yaghu y’obutakenga n’obumbalaka bwaghu, obwatsuka omo kihugho kye Misri. Ukenditsira eritungererabyo, kandi siwendisyasyibuka e Misri.’

28 “Kusangwa Yehova, Omukama Mukulu oko Bosi ati: ‘Hano nikisiya inakuhira omo byala by’abakuponire,* abo walekana nabo wabibakwa nye. 29 Bakendikukolera omo busu n’eriheka ebyosi ebyo wabirinubira n’erikusigha ndumbu, omubiri inianalangirwe. Endumbu eyik’itisoni y’obusingiri bwaghu n’obutswatswa bwaghu n’obumbalaka bwaghu bikendilangirwa. 30 Ukendikolerwa emyatsi eyi kundi muwakwamirira ebihanda ng’omumbalaka, kundi muwayitsandya omo syosanamu syabo esikita nye. 31 Wabiriyeghendya ngoko mwali wenyu anayighendaya, neryo ngendihira ekikombe kiwe omo byala byaghu.’

Emyatsi eyo yoswire omo kikombe ekyo.

“Kusangwa ingyuwene-wene nabiribugha,” Yehova Omukama Mukulu oko Bosi atya.’

35 “Busana n’ekyo, Yehova, Omukama Mukulu oko Bosi ati: ‘Kusangwa wabirinibirirwa n’erileka erinitsomana,* ukendihikirwa n’ebitsibu ebikaluira omo butswa-tswa bwaghu n’obumbalaka bwaghu.’”

36 Neryo Yehova mwabugha naghe ati: “Mughala w’omundu, unemwendibugha ebinywa by’eritswera Ohola na Oholiba n’eribatsumanga busana emikolere yabo eyikita nye? 37 Babirisingira,* n’omusasi ali oko byala byabo. Eryongera okw’isingira n’esyosanamu syabo, n’abana babo b’obulume abo banibutira, babirilabyabo omo muliro. Babiribalabya mugho eribya kalyo k’esyosanamu syabo. 38 Nibya babirinikolera kino: Ekiro ekyo, mubatsandya ahabuyirire haghe n’eritsandya esyosabato syaghe. 39 Babere babiita abana b’obulume bakahererabo esyosanamu syabo esikita nye, ekiro ekyo kisa-kisa, mubasa ahabuyirire haghe bakasyatsandyaho. Ekyo kyo babya bakolire omo nyumba yaghe-yaghe. 40 Nibya mubatuma n’abakwenda oko balume abali hali-hali bati base. Babere banemwasa, muwanaba, wamahira oko meso kw’erangyi n’eriyipamba omo bindu by’eriyipambamo.* 41 Kandi muwikala oko kitumbi ky’olukengerwa ekiri ng’engyingo, n’emesa iyinasesire embere syakyo. Emesa eyo yo wahirako obukwa bwaghe n’amaghuta waghe. 42 Omulenge w’ekikuto ky’abalume abakayisyalaghanda mwowika eyo. Omo balume abo, mwabya abatamiri abaletawa erilua omo mbwarara. Mubambalya abakali b’ehibangila bamambalyabo n’esyombita esyuwenenga.

43 “Neryo munabugha oko mukali oyo, oyo wabya iniabirinogha busana n’obusingiri niti: ‘Eryo na lino, akendilola embere n’obumbalaka.’ 44 Neryo mubalola embere erighenda eyo ali, ngoko omundu akanaghenda ew’omumbalaka. Ko babya bakaghenda batya eyiri Ohola na Oholiba, abakali batswa-tswa. 45 Nikwa abalume abatunganene bakendimusohera eritswera eritolere obusingiri bwiwe n’obwiti bwiwe; kusangwa ni bakali basingiri, n’omusasi ali oko byala byabo.

46 “Kusangwa Yehova Omukama Mukulu oko Bosi ati: ‘Bakendisyaleterwa abasuda eriyirabo mo kindu ekikubahisaya n’eky’erinyegha. 47 Abasuda bakendisyaghusa kubo kw’amabwe n’eritsutsangabo omo miyali yabo. Bakendisyita abana babo b’obulume n’ab’obukali n’erihisya amanyumba wabo omo muliro. 48 Ngendisyabugha omo kihugho mw’obutswa-tswa, n’abakali bosi bakendisyabalangirirako. Sibendisyabya nga nywe; ibo sibendisyabya batswa-tswa. 49 Bakendisyabasuyira busana n’obutswa-tswa bwenyu na busana n’ebibi byenyu ebyo mwakola n’esyosanamu syenyu esikita nye; nenyu mukendisyaminya ngoko ingye indi Yehova, Omukama Mukulu oko Bosi.’”