Isaya
36 Omo mwaka we 14 w’obutabali bwa Hezekia, Omwami Senakeribu we Asiria mwalwa n’emiyi yosi ye Yuda eyikongotere, amahambayo. 2 Neryo omwami we Asiria mwatuma Omurabshake n’emilondo mingyi y’abasuda erilua e Lakishi. Mwatumabo e Yerusalema eyiri Omwami Hezekia. Mubahangana oko mughende w’ekitsinga ky’endata ekiri oko nzira y’eririrma ry’oyukafula esyongyimba. 3 Neryo Eliakimu mughala wa Hilkia oyo wabya mwimaniri w’enyumba,* Shebna omuhandiki, na Yoa mughala wa Asafu omuhandiki w’emyatsi, mubaghenda eyo ali.
4 Neryo Omurabshake mwababwira ati: “Kisi, mubwire Hezekia muti: ‘Omwami mukulu, omwami we Asiria, ati: “Ukayiketeraki? 5 Wabere ukayibwira uti, ‘Niwite amayele n’obutoki bw’erilwa.’ Aliwe, ebyo ni binywa buyira. Wabiriyiketerandi kyo kyabirileka iwayisamambula okw’ingye? 6 Hulikirira! Ukalengekanaya uti e Misri yanganakuwatikya, eyiri ng’oluseke olupondekene? Omundu amabighemera oko luseke olo, ilukendingira omo kighanza ky’ebyala biwe n’eritobolakyo. Ye Farao, omwami we Misri kw’ali atya oko bosi abakayiketera ye. 7 Kandi ibwa wamabimbwira uti, ‘Tuyiketere Yehova oMungu wetu.’ OMungu oyo, si yo Hezekia abirisambula emyanya yiwe y’endata n’ebiherero biwe, inyanemubwira abandu be Yuda n’abe Yerusalema ati, ‘Litolere imwabya mukakukama embere sy’ekiherero ekiri e Yerusalema?’” 8 Neryo lino tukube obuhaka, tulebaye nga nindi yukendisinga omo kati-kati kaghu n’omukama wetu, omwami we Asiria. Ngendikuha esyosabayiri 2 000, neryo tukendilebya nga unemwendibana abandu abatosire erighendyasyo. 9 Neryo wangatoka uti eritibita nibya n’oko muguvernere mughuma, omuke kutsibu oko baghombe b’omukama waghe, ighunemuyiketera e Misri, uti ikendikuha esyongurubani* n’abakaghendaya esyosabayiri? 10 Ukalengekanaya uti niryayitswa erisyalwa n’ekihugho eki n’eritoghotyakyo kwehi? Yehova yulyanihamula. Yehova iyuwene-wene mwakanibwira ati, ‘Ughende uyalwe n’ekihugho eki, utoghotayekyo.’”
11 Neryo Eliakimu na Shebna na Yoa mubasubirya Omurabshake bati: “Kisi, ukanaye n’abaghombe baghu omo Kiaramu, kusangwa tukanowakyo. Isiwakanaya netu omo mubughe w’Abayahudi kundi abandu abali oko luhimbo banowire.” 12 Aliwe Omurabshake mwasubiryabo ati: “Mukalengekanaya muti n’inywe basa n’omukama wenyu, n’inywe omukama waghe alyanitumako erisyabwira ebinywa ebi kwehi? Syalyanituma n’oko balume aba abali oko luhimbo abakendilya lino-lino amabi wabo n’erinywa amaswa wabo haghuma nenyu?”
13 Neryo Omurabashake mwimana amabirikira omo mulenge muli, omo mubughe w’Abayahudi, ati: “Muhulikirire ekyo omwami mukulu, omwami we Asiria akabugha. 14 Omwami ati, ‘Hezekia isyabateba, kundi syangatoka eribalamya. 15 Kandi Hezekia isyaleka mukayiketera Yehova, omw’ibabwira ati: “Oko kwenene Yehova akenditusabula, n’omuyi ono syendisyahirwa omo byala by’omwami we Asiria.” 16 Isimwahulikirira Hezekia, kusangwa omwami we Asiria ati: “Mukole obuholo haghuma naghe, muyolobeke.* Mwamabikola mutya, obuli mundu iniakendirya amatunda w’omuti wiwe w’omuzabibu n’aw’omuti wiwe w’esyotini. Kandi obuli mundu iniakendinywa amaghetse w’omo ribulu riwe, 17 erihika omughulu ngendyasa n’eribatwala omo kihugho ekiri ng’ekyenyu, ekihugho ekyoswiremo engano n’edivai nyihya-nyihya, ekihugho ekirimo emikati n’amalima w’emizabibu. 18 Hezekia isyabateba omw’ibabwira ati, ‘Yehova akenditulamya.’ Oko miungu y’ebihanda, hane omungu oyo wabiritoka erilusya ekihugho kiwe omo byala by’omwami we Asiria? 19 Emiungu ye Hamati ne Arpadi yiri hayi? Emiungu ye Sefarvaimu yiri hayi? Kandi Yanabiritoka erilusya e Samaria omo byala byaghe? 20 Oko miungu yosi y’ebihanda ebi, ni mungu wahi yo wabiritoka erilusya ekihugho kiwe omo byala byaghe, ekyangaleka imwalengekania muti Yehova akendilusya e Yerusalema omo byala byaghe?”’”
21 Aliwe mubabya bukutu, mubatamusubirya ekinywa kyosi-kyosi; kusangwa omwami abya inyabiribwirabo ati, “Isimwamusubiraya.” 22 Neryo Eliakimu mughala wa Hilkia oyo wabya mwimaniri w’enyumba,* Shebna omuhandiki, na Yoa mughala wa Asafu omuhandiki w’emyatsi, mubasa eyiri Hezekia ibabiritulanga esyongyimba syabo, bamamubwira ebinywa by’Omurabshake.