Yoeli
1 Yehova mwakania na Yoeli* mughala wa Petueli, amamubwira ati:
2 “Inywe basyakulu, muhulikirire!
Inywe bikalani bosi b’omo kihugho, muteghe amatwi!
Ekiri ng’eki kinekyatabya omo biro byenyu,
Kutse mukyanabya omo biro by’abotata-kulu wenyu?
3 Mukanirayebyo abana benyu,
N’abana benyu bakendisyakaniryabyo abana babo,
N’abana babo bakendisyakaniryabyo ekizazi* ekikendisyasa.
4 Ebyo esyongyike esikatsandaya siryasigha, esyongyike esikaghenda mo bikuto-bikuto syabiriryabyo
Ebyo esyongyike esikaghenda mo bikuto-bikuto siryasigha, esyongyike esiteko bipupa syabiriryabyo.
N’ebyo esyongyike esiteko ebipupa siryasigha, esyongyike esikalya kutsibu syabiriryabyo.
5 Inywe batamiri, mubuke, mulire!
Inywe bosi, inywe mukanywa edivai, mulire,
Kundi edivai eyisihire yabirilusibwa omo buno bwenyu.
6 Kusangwa ekihanda kyabiryasa omo kihugho kyaghe, ekihanda ky’amaka kandi ekirimo abandu banene kutsibu.
Ameno wakyo ni meno w’esimba, n’emikese yakyo ni y’esimba.
7 Kyabiritsandya omuti waghe w’emizabibu n’eriyira omuti waghe w’esyotini mo kisiki
Kyabirilusya oko miti eyo kw’ebyosi ebilueko n’erighusabyo oho lutambi,
Kandi kyabiriyira amasanza wayo mo w’omusohe.*
9 Ebihembo by’akalyo n’ebihembo by’obwabu sibikihererawa omo nyumba ya Yehova;
Abahereri, abakakolera Yehova, bali omo bulighe.
10 Amalima abiritsandibwa, ekitaka kinemulira,
Kundi engano yabiritsandibwa, edivai nyihya-nyihya yabiryuma, amaghuta abiribula.
11 Abakulima babirikukubala n’abakalima amalima w’emizabibu banemulira
Busana n’engano n’ekisusu
Kundi ebyo balyendighesa byabiritsanda.
12 Omuti w’emizabibu abiryuma,
Omuti w’esyotini abirihonga.
Omuti w’amakomamanga, omuti w’etende, n’omuti w’esyopome,
Emiti yosi eyiri omw’irima yabiryuma.
Abandu abalue n’obutseme babirikwa esisoni.
13 Inywe bahereri, mwambale esyongyimba sy’esaki,* mulire.
Inywe mukakolera oko kiherero, mulire.
Inywe mukakolera oMungu waghe, mwingire kandi mulabaye ekiro kyosi ky’ekiro ekyo imunambite syongyimba sy’esaki;
Kundi obuhere bw’akalyo n’ekihembo ky’akalyo sibikihererawa omo nyumba y’oMungu wenyu.
14 Mubwire abandu muti bakole amafungo;* mubwire abandu muti base oko muhindano munene,
Muhindanaye abasyakulu bo haghuma n’abikalani bosi b’omo kihugho,
Muhindanayebo eyiri enyumba ya Yehova, oMungu wenyu, kandi mulilire Yehova muti abawatikaye.
15 Obulighe busana n’ekiro ekyo!
Kundi ekiro kya Yehova kiri hakuhi,
Kikendisyasa ng’eritsandya erikalua oko Mutoki w’Ebyosi.
16 Ebyalya sibyetalusibwa embere sy’ameso waghe?
N’obutseme n’eriyisyandira sibyetalusibwa omo nyumba y’oMungu wetu?
17 Esyombuto* syabiryumira eyikwa w’ebipao byabo.
Amadepo wasyo w’akalyo syakirimo kindu.
Amadepo w’eribikamo engano abirihimbulwa, kundi engano yabiryuma.
18 Nibya n’esyonyama sinemusimba!
Ebikuto by’esonde binemughanga-ghanga busana n’eribula eky’erikola, kundi sisikiwite ebiti.
N’ebihangulo by’esyombuli byabirihabwa amalipizi.
19 Yehova, n’iwe ng’endisyabirikira,
Kundi omuliro abiritimya emyanya y’erilisiryamo y’omo mbwarara
N’ekirimi kyabiritimya emiti yosi y’emoli.
20 Nibya n’esyonyama sy’emoli sinemukulinda,
Kundi esyonyusi syabiryuma
N’omuliro abiritimya emyanya y’erilisiryamo y’omo mbwarara.”