Amosi
9 Munalangira Yehova iniane endata oko kiherero. Mwabugha ati: “Upike omutwe-mutwe w’enduyi, neryo ebitswe by’eyikwa bikendititimana. Utwe emitwe-mitwe y’enduyi, kandi ngendisyiita abakendisyasighalira ba mubo omo muyali. Omundu wosi-wosi oyukendisyatibita syendisyahika hali, kandi sihendisyabya oyukendisyatoka eriyibalya.
2 Bamabitakula eriyahika omo Yisinda,*
Ebyala byaghe ibikendibalusyayo;
Kandi bamabihetukira elubula,
Ingendibalusyayo n’eribandaghalya.
3 Bamabiyibisa oko singyi ye Karmeli,
Ingendibasondya-sondya eyo n’erihekabo.
Bamabiyibisa omo mitobero y’engetse ngasyalangirabo,
Ingendibwira enzoka niti yibalumire eyo.
4 Bamabiya omo bunyewa omo kihugho ky’esyonzighu syabo,
Ingendibugha niti omuyali abitire eyo;
Ingendibahandako ameso waghe nitoke erikolerabo ebituwene, butsira ebyuwene.
5 Kundi Omukama Mukulu oko Bosi, Yehova w’emilondo, yukendisyatula oko kihugho,
Neryo kikendisyayeyuka n’abikalani bamo bosi bakendisyabya omo kiriro;
N’ekihugho kyosi kikendisyayisumba ng’Olusi lwe Nile,
N’erikima nge Nile ye Misri.
6 ‘Oyukahimba omo lubula mw’emimbari
Oyukahimba enyumba endata oko kihugho;*
Oyukabirikira amaghetse w’engetse
Atoke eryutagho oko kihugho
—Erina riwe yo Yehova.’
7 ‘Inywe Baisraeli, simwasi ngoko ngabalangira ng’Abakushi?’ Yehova atya.
‘S’ingye nalusaya Abaisraeli omo kihugho kye Misri?
S’ingye nalusaya Abafilistini be Krete?
Kandi s’ingye nalusaya Abasiria be Kiri?’
8 ‘Muhulikirire! Ameso wa Yehova Omukama Mukulu oko Bosi anasamalire obwami obukakola amalolo,
Kandi akendisyalusyabo oko kihugho.
Aliwe sinendisyatoghotya abosi b’oko kihanda kya Yakobo,’ Yehova atya.
9 ‘Kundi ngabugha,
Kandi ngenditsingya-tsingya Abaisraeli omo kati-kati k’ebihanda byosi,
Ngoko omundu akatsinga-tsingaya akayingilo,
Neryo ihatabya n’akabwe n’akaghuma akakatoghera ahisi.
10 Abosi b’omo bandu baghe abakakola amalolo,
Abakabugha bati, “Obuhanya sibwendisyaseghera hakuhi netu kutse sibwendisyatuhikako
Bakendisyakwa omo muyali.”’
11 ‘Ekiro ekyo, ngendisyahangania akabalalayi* ka Daudi akabiritera,
Ngendisyaliba ebitobo,*
Kandi ngendisyakokotya ahatsandire;
Ngendisyahimba akabalalayi ako ngoko kanabya embere,
12 Batoke erimya ebikendisyasighalira e Edomu,
N’erimya ebihanda byosi ebyabirikirawa omo rina ryaghe,’ Yehova oyukendisyakola omwatsi oyu atya.
13 ‘Muhulikirire! Ebiro binemwasa,’ Yehova atya.
‘Omo biro ebyo, oyukalima akendisyahika oko oyukaghesa,
N’oyukalyatanga emizabibu akendisyahika oko oyukahera embuto;
N’ebitwa bikendisyatoghongako edivai eyisihire,
N’ehitwa hyosi hikendisyasendako edivai eyisihire.*
14 Ngendisyasubya abanyewa b’omo bandu baghe Abaisraeli omo kihugho kyabo,
Neryo bakendisyasyahimba emiyi eyabya iyabiribya matongo n’erikala muyo;
Bakendisyahera amalima w’emizabibu n’erinywa edivai eyikalua mugho,
Bakendisyalima amalima n’erirya amatunda wamo.’
15 ‘Ngendisyaherabo oko kitaka kyabo,
Sibendisyasyakulangwa
Oko kitaka kyabo ekyo nabaha,’ Yehova oMungu waghu atya.’’