Zefania
3 Bulighe oko muyi owatyowa, owatsandire, kandi owakaghalaya abandu!
2 Mwatahulikirira mundu; mwataligha erikungwa ryosi-ryosi.
Mwatayiketera Yehova; mwataseghera hakuhi n’oMungu wiwe.
3 Abakulu bamo ni syosimba esikaruruma,
Abatsweri bamo ni syoboha esikahigha omo kiro;
Sibalisigha n’erikuha n’erighuma ry’eribobongolya omo tututu.
4 Abaminyereri bamo sibatsomene, ni batebya.
Abahereri bamo bakatsandaya ekindu kibuyirire;
Sibatsomene omughambo.
5 Yehova atunganene omo kati-kati kagho; syalikola kibi.
Omo buli tututu, akaminyisaya ebyo amayisogha,
Ngoko kiro sikyebula erikya.
Aliwe oyutatunganene syalikw’isoni.
6 “Munatoghotya ebihanda; ehileberyo hyabyo ehiri oko ngonde* muhyahimbulwa.
Munatsandya esyobalabala syabyo, neryo musitasyalabamo mundu.
Emiyi yabyo muyabya bisambukalirya, simwabya mundu, simwabya mukalani.
7 Munabugha niti: ‘Oko kwenene, ukendisyanisagha n’eriligha erikungwa.’
Kusudi obwikalo bwiwe isibwatoghotibawa
—Ngendisyamuha amalipizi busana n’emyatsi eyo.
Aliwe abosi babya ibanzire kutsibu erikola muhanda.
8 ‘Neryo, simuleke erinilindirira,’* Yehova atya,
‘Erihika ekiro ngendisyahangana nitoke eripura ebindu,*
Kundi ekyo nabiriyisogha ry’erihindania ebihanda, erihindania amami,
Nitoke eryutulira kubo kw’ekinigha kyaghe kinene, erihitana ryaghe ryosi rinene;
Kundi omuliro w’omuhwa akendisyahisya ekihugho kyosi.
9 Neryo oko mughulu oyo, ngendisyabindula omubughe w’abandu baghe mo mubughe owerire,
Kusudi abosi babirikire erina rya Yehova,
N’erimukolera buke bwa kuboko.’*
10 Eritsuka omo kiharo ky’esyonyusi sye Etiopia,
Abakanilemba-lemba, mwali w’abandu baghe ababiripanzwa-panzwa, bakendisyaniletera ekihembo.
11 Ekiro ekyo, siwendisyasyahemuka
Busana n’emyatsi yosi eyo wakola omughulu waghana eriniowa,
Neryo oko mughulu oyo, ngendisyalusya abakayihalamba omo kati-kati kaghu;
Neryo siwendisyasyabya n’emiyiheko omo kitwa kyaghe kibuyirire.
12 Ngendisyasigha omo kati-kati kaghu mw’abandu abakayikehaya n’abandu b’ahisi,
Kandi bakendisyasayira omo rina rya Yehova.
13 Abaisraeli abakendisyasighalira sibendisyabya bakakola eritatunganene;
Sibendisyabugha amabehi, n’olulimi olukabugha amabehi silwendisyasungika omo buno bwabo;
Bakendisyalya n’eriyato, sihendisyasyabya oyukabasaghisaya.”
14 Mwali we Sioni, utseme!
Israeli, uyisyandire ng’oyukasinga!
Mwali we Yerusalema, utseme n’eriyisyandira n’omutima waghu wosi!
15 Yehova abirikulusyako amalipizi awalue akakwaghalya.
Abiritwala enzighu yaghu yo hali.
Mwami we Israeli, Yehova, ane omo kati-kati kaghu.
Siwendisyasyasagha obuhanya.
16 Ekiro ekyo, abandu bakendisyabwira Yerusalema bati:
“Sioni, isiwasagha.
Isiwakimaya ebyala.
17 Yehova oMungu waghu ane omo kati-kati kaghu.
Akendikusabula kundi ni Mungu w’obutoki.
Akenditsema kutsibu busana naghu.
Akendiyowa ndeke kundi akwanzire.*
Akenditsema kutsibu busana naghu n’erighusa emilenge y’obutseme.
18 Abali omo bulighe kundi sibalisyabya oko biro byaghu bikulu, ngendisyahindaniabo haghuma.
Sibabya hakuhi naghu, kundi babya bakasekereribwa busana naye.
19 Oko mughulu oyo, ngendisyaha amalipizi abosi abakakwaghalaya;
Ngendisyasabula oyukatsukuda,
N’erikuma-kuma abapanza-panzawa.
Ngendisyabayira mo kindu ky’eripipa n’ekikumayire*
Omo kihugho kyosi ekyo bahemulirawamo.
20 Oko mughulu oyo, ngendisyabingirya,
Oko mughulu oyo, ngendisyabahindania.
Kundi ngendisyabayira mo kindu ekikumayire* n’eky’eripipa omo kati-kati k’abandu bosi abali oko kihugho,
Omughulu ngendisyasubulya abanyewa baghu ighunalangire,” Yehova atya.