Ebaruha y’akabiri ya Petro
3 Banzwa baghe, eno ni baruha y’akabiri eyo ngabahandikira. Omo baruha eno n’eyerimbere, ngabibukaya emyatsi milebe mutoke eribya n’amalengekania awuwene, 2 mutoke eryibuka ebinywa eby’abughawa kera n’abaminyereri babuyirire, kandi mutoke eryibuka ekyalayiro ky’Omukama n’Omusabuli wetu, ekyabaha erilabira abakwenda. 3 Eky’erimbere, muminye ngoko omo biro by’enduli hakendisyabya abakasekereraya. Omo binywa by’erisekererya, bakendisyabya bakakwama esyongumbu syabo. 4 Bakendisyabya bakabugha bati: “Eribyaho riwe eryalaghawa riri hayi? Eritsuka aho abotata-kulu wetu baholera, emyatsi yosi ine ngoko yabya eritsuka omughulu ebindu byatsuka erihangyikwa.”
5 Kundi bakabya nga sibasi omwatsi ono: Kera habya olubula n’ekitaka ekyalua omo maghetse n’omo kati-kati k’amaghetse erilabira ekinywa ky’oMungu. 6 Kandi erilabira ebyo, ekihugho ky’omughulu oyo mukyatoghotibwa omughulu amaghetse aswikakyo. 7 Kandi erilabira ekinywa kighumerera ekyo, olubula n’ekihugho bya lino bikalindirira* omuliro, erihika oko kiro ky’eritswera n’eritoghotya abandu abatekenga oMungu.
8 Aliwe banzwa baghe, mubye imunibukire kino: Yehova* iye akaghanza ekiro kighuma mo myaka 1 000 n’emyaka 1 000 mo kiro kighuma. 9 Yehova* syalitseleghawa eriberererya ebyo abirilagha, ngoko abandi bakalengekanaya. Aliwe, anemuhanda omutima busana nenyu*, kundi syanzire n’omundu n’omughuma akatsandibwa, aliwe anzire abosi ibabindula emitima. 10 Nikwa ekiro kya Yehova* kikendisyasa ng’omwibi. Omo kiro ekyo, olubula lukendisyabulirana omo fuyo nene.* Aliwe, ebindu ebikendisyabya ibyabirihuha bikendisyayeyuka, n’ekihugho n’emyatsi eyirimo yikendisyakanganibwa.
11 Neryo kundi emyatsi yosi eyo yikendisyayeyuka yitya, mulengekanaye nga ritolere imwabya abandu abali bati. Ritolere imwabya n’emighendere mibuyirire n’erikola emyatsi eyikakanganaya ngoko mukamakirira oMungu, 12 kandi imunemulinda n’eribya imunibukire* eribyaho ry’ekiro kya Yehova.* Omo kiro ekyo, olubula lukendisyatsandibwa omo birimi by’omuliro, n’ebindu bikendisyayeyuka busana n’ekihuhania kinene. 13 Aliwe, erikwamana n’ebyo abiritulagha, tukalindirira olubula luhya-luhya n’ekihugho kihya-kihya. Omo lubula n’omo kihugho ekyo mukendisyabya eritunganene.
14 Busana n’ekyo, banzwa baghe, kundi munemulindirira emyatsi eyo, mukole ekyosi-kyosi ekyo mwangatoka kusudi oko nduli asyabeya isimuliko omutsafu, obulema, kandi imune omo buholo. 15 N’ekindi, muminye ngoko erihanda omutima ry’Omukama wetu ryo rikendisyaleka itwasabuka, ngoko mughala wetu mwanze Paulo naye abiribahandikira, erikwamana n’amenge agho ahabawa. 16 Kundi akakanaya oko myatsi eyo omo syobaruha siwe syosi. Aliwe, omo syobaruha siwe, mune emyatsi milebe eyikalire eryowa, eyo abandu abatawite obwenge n’abatasikire omo bwikirirya bakahengemaya, ngoko bakanahengemaya n’awandi Masako. Ekyo kikendisyaleka ibatsandibwa.
17 Aliwe inywe, banzwa baghe, kundi mwabiriminya emyatsi eyo embere, muyiteghaye mukasyatebwa haghuma nabo omo makosa w’abandu abatekwama emighambo, kandi mukasyasegha-seghana.* 18 Aliwe, muyikase mutoke eribana olukogho lunene n’eriminya emyatsi mingyi eyilebirye Omukama n’Omusabuli wetu Yesu Kristo. Ahabawe olukengerwa lino erisyahika kera na kera. Amina.