Abalawi

19 Yehova mwasyabugha na Musa ati: 2 “Ubwire endeko yosi ye Israeli uti, ‘Mutolere imwabya babuyirire kundi ingye Yehova Mungu wenyu niri mubuyirire.

3 “‘Obuli mughuma w’okw’inywe, litolere iniasikya* mama wiwe na baba wiwe, kandi mutolere imwasikya esyosabato syaghe. Ingye indi Yehova Mungu wenyu. 4 Isiwaya eyiri emiungu eyitawite mughaso kutse eriyikokoterya emiungu omo byuma by’erinunia. Ingye indi Yehova Mungu waghu.

5 “‘Wamabiherera Yehova y’obuhere bw’obuholo,* litolere iwahererabo omo nzira eyangaleka iwaliwa. 6 Obuhere obo, butolere ibwalibwa oko kiro bulyahererawa erihika engyakya. Nikwa ebikasaka oko buhere obo erihika ekiro ky’akasatu, litolere iwatimyabyo omo muliro. 7 Nikwa bwamabilibwako ekiro ky’akasatu, ni mwatsi owakahitanaya owate angaliwa. 8 Oyukendisyalyabo akendisyabyako olubanza,* kusangwa abirihalya oko bindu ebibuyirire bya Yehova; n’omundu oyo* litolere inialusibwa* omo kati-kati k’abandu biwe.

9 “‘Omughulu mukaghesa ebyo mulyeraya omo kihugho kyenyu, isimwalw’imwaghesa ebyosi ebiri oko misike-misike y’amalima wenyu, kandi isimwakuma-kuma n’emisighalira y’ebyo mukaghesa. 10 Kandi isimwoha ebikasighalira omo malima wenyu w’emizabibu kutse isimwatola eyikatoghonga; litolere imwalekerabyo abera n’ababunga. Ingye indi Yehova Mungu wenyu.

11 “‘Isimwiba kandi isimwabugha amabehi, kandi isimwatebana. 12 Isimwalapa eby’amabehi omo rina ryaghe ukasyatsandya erina ry’oMungu waghu. Ingye indi Yehova. 13 Isiwalimaya mulikyenyu kandi isiwamunyegha, isiwasighala n’obuhingyi bw’oyulyakukolera omubiiri erihika engyakya.

14 “‘Isiwatsuma* omutsiha kutse erihira ekindu ekyangatwikalya embere sy’endimetime. Litolere ighubaha oMungu waghu. Ingye indi Yehova.

15 “‘Isiwatswera omo ritatunganene, isiwasolola omwera kutse erilabirirya ow’ebindu.* Litolere iwatswera ndeke omulikyenyu.

16 “‘Isiwaghenda eyi n’eyi ukalalaghania amabehi omo kati-kati k’abandu baghu. Isiwahangana busana n’eriitisya engebe* ya mulikyenyu.* Ingye indi Yehova.

17 “‘Isiwapona mughala wenyu omo mutima waghu. Litolere iwakola ekyosi-kyosi erikunga mulikyenyu ukasyasangira oko rilolo liwe.

18 “‘Isiwatuhulaya kutse eribika ekinigha oko baghala b’abandu baghu; litolere iwanza mulikyenyu ngoko uyanzire. Ingye indi Yehova.

19 “‘Litolere imwateya ebihano byaghe: Isiwaleka esyonyama sy’eka esy’emihanda ibiri eyisighene sikabutanako. Isiwahera omo lirima lyaghu mw’emihada ibiri y’esyombuto, kandi isiwambala olukimba olukokotibwe omo syouzi sy’emihanda ibiri eyisighene.

20 “‘Neryo omulume amabighotsera n’omukali n’erikola naye emyatsi y’engyingo, omukali oyo ini mughombe oyo omukama wiwe abirilagha oghundi mulume, aliwe omughombe oyo isyalyakombolwa kutse eribya bwiranda, hakendisyabya erisuyirwa; aliwe isibitawa, kusangwa alue isyalyabya bwiranda. 21 Omulume oyo akendisyaletera Yehova y’obuhere bwiwe bw’olubanza* oko lukyo lw’ehema y’erihindanamo, embangale y’obuhere bw’olubanza. 22 Omuhereri akendisyakolesya embangale y’obuhere bw’olubanza* erimulihira embanulo embere sya Yehova busana n’erilolo eryo alyakola. Neryo akendisyaghanyirwa erilolo eryo alyakola.

23 “‘Mukendisyabya mwabihika omo kihugho n’erihera emihanda yosi-yosi y’emiti busana n’akalyo, mukendisyalangira amatunda wayo mo awatuwene kandi mo awaghanibwe.* Akendisyabya awaghanibwe* okw’inywe omo myaka isatu; syangalibwa. 24 Nikwa oko mwaka w’akani, amatunda wosi akendisyabya awabuyirire mutoke eritsema embere sya Yehova. 25 Neryo oko mwaka w’akatano, imwanganalya oko matunda wayo n’eryongeragho oko ebyo mukaghesa. Ingye indi Yehova Mungu wenyu.

26 “‘Isimwalya ekindu kyosi-kyosi ekirimo omusasi.

Isimwakola obulaghu kutse obukumu.

27 “‘Isimwasisa* esyonzwiri esiri endambi oko mutwe wenyu kandi isimwatsandaya emisike-misike y’esyonderu syenyu.

28 “‘Isimwayihirako esisako busana n’omuholi kandi isimwayisaka muti mukadesa* emibiiri yenyu, ingye indi Yehova.

29 “‘Isiwasyahemula mwali waghu omw’imuyira mo mumbalaka, ekihugho kikasyakola obumbalaka n’eryusulamo obutswatswa.

30 “‘Litolere imwateya esyosabato syaghe kandi litolere imwasikya* ahabuyirire haghe. Ingye indi Yehova.

31 “‘Isimwaya eyiri abakakanaya n’esyombinga kutse isimwaya oko bakalaghula mukasyabya abaterire busana nabo. Ingye indi Yehova Mungu wenyu.

32 “‘Litolere iwahanganira ow’omutwe w’esyombwi, kandi litolere iwasikya abandu abakulire. Litolere ighubaha oMungu waghu. Ingye indi Yehova.

33 “‘Ow’ehandi amikala omo kihugho kyenyu, isimwamukola nabi. 34 Ow’ehandi oyo wikere nenyu, litolere iniabya ng’embutirwa omo kati-kati kenyu; kandi litolere iwamwanza ngoko uyanzire kundi nenyu mwabya babunga omo kihugho kye Misri. Ingye indi Yehova oMungu wenyu.

35 “‘Isimwakolesaya ebipimo by’amabehi mukapima obuli, obulito kutse olulengo lw’ekindu. 36 Litolere imwakolesya eby’eripimamo by’ekwenene, ekilo ky’ekwenene, akalengyi* k’ekwenene, n’ehilengyi hy’ekwenene hy’erilengamo ebindu by’amaghetse-ghetse.* Ingye indi Yehova Mungu wenyu oyo wabalusaya omo kihugho kye Misri. 37 Neryo litolere imwateya erihamula ryaghe n’emighambo yaghe, kandi litolere imwakwamabyo. Ingye indi Yehova.’”