Isaya
6 Omo mwaka ogho Omwami Uzia aholamo, munalangira Yehova inianikere oko kitumbi ky’obwami ekiri endata, n’ekisumbire endata kutsibu, n’emisike y’ekanzu yiwe muyusulya ehekalu. 2 Abaserafi babya ibanimene endata okw’iye; obuli mughuma wa kubo abya n’ebipupa 6. Obuli mughuma wa kubo abya akaswika obusu bwiwe omo bipupa bibiri n’eriswika ebisando biwe omo bindi bipupa bibiri, kandi obuli mughuma wa kubo abya akaghuluka omo bipupa bibiri.
3 Kandi babya bakabirikiranako bati:
“Mubuyirire, mubuyire, mubuyirire ni Yehova w’emilondo.
Ekihugho kyosi kyoswiremo olukengerwa lwiwe.”
4 N’ebihande by’eyikwa by’ehidrema mubyasukana busana n’emilenge* eyo, n’enyumba muyusulamo omuki.
5 Neryo munabugha niti: “Bulighe bwaghe!
Niri nga niholire,*
Kusangwa indi mundu w’eminywa eyiterire,
Kandi nikere omo kati-kati k’abandu ab’eminywa eyiterire;
Kusangwa ameso waghe abirilangira Omwami, Yehova w’emilondo iyuwene-wene!”
6 Neryo omughuma w’oko baserafi mwasa eyo nyiri akaghuluka. Abya ahekire omo byala biwe mw’erikala eryakire, eryo alyalusaya oko kiherero. Abya ahekirelyo omo penzi. 7 Mwatula oko buno bwaghe n’eribugha ati:
“Lebaya! Erikala eri lyamatula oko minywa yaghu.
8 Neryo munowa omulenge wa Yehova akabugha ati: “Ngenditumandi, nandi yukendighenda busana netu?” Naghe munabugha niti: “Ingye y’ono! Unitume!”
9 Naye mwasubirya ati, “Ghenda, ubwire abandu aba uti:
‘Mukendyowa kangyi-kangyi,
Aliwe simwendiyiteghererya;
Mukendilangira kangyi-kangyi,
Aliwe simwendiminyaki.’
10 Ukalaye omutima w’abandu aba,
Uhome amatwi wabo,
N’eriliba ameso wabo,
Isibalangira omo meso wabo
N’eryowa omo matwi wabo,
Emitima yabo isiyayiteghereraya,
Kandi isibabinduka neryo ibalamibwa.”
11 Okw’ekyo munabugha niti: “Erihika mughulu wahi Yehova?” Naye mwanisubirya ati:
“Erihika omughulu emiyi ikendisyabya matongo, isiyikeremo abandu
N’erihika omughulu amanyumba akendisyabya isyakirimo abandu*
N’erihika omughulu ekihugho kikendisyatsandibwa n’eribya matongo;
12 Erihika omughulu Yehova akendisyahighira abandu bo hali
N’erihika omughulu ekihugho kikendisyabya matongo kutsibu.
13 “Aliwe kikendisyabya ikikinemo abandu bake* buyira, nabo bakendisyasyahisibwa, ng’omuti munene kandi ng’omuti w’omwaloni, eyikasigha ekisiki yabitwibwa; embuto* eyibuyirire ikendisyabya kisiki kyakyo.”