Ebaruha y’erimbere oko Abanya Korinto
12 Baghala betu, nanzire imwaminya ndeke obutoki* mbiriri-mbiriri obo kirimu kibuyirire kikatuha. 2 Munasi ngoko embere mwikiriraye, mwabya mukakwama n’eritebwa n’esyosanamu esitesyangabugha. Imukakwamasyo ehosi-hosi eyo sikabatwala. 3 Lino nanzire imwaminya ngoko sihali omundu oyukasondolawa n’ekirimu ky’oMungu oyo wangabugha ati: “Yesu atakirawe!” Kandi sihali omundu oyo wangabugha ati: “Yesu ni Mukama!” amabya isyalisondolawa n’ekirimu kibuyirire.
4 Hali obutoki mbiriri-mbiriri obukalua oko Mungu. Aliwe, obosi bukalua oko kirimu kighumerera. 5 Tukakola emibiiri mbiriri-mbiriri, aliwe tukakolerayo Omukama mughumerera. 6 Hali emyatsi mbiriri-mbiriri y’erikola, aliwe oMungu mughumerera y’ukaha obuli mundu y’obutoki bw’erikolayo. 7 Nikwa ekirimu kibuyirire kikaha obuli mundu y’obutoki bw’erikola omwatsi mulebe busana n’endundi y’abandi. 8 Ekirimu kikaha omundu mughuma y’obutoki bw’eribugha ebinywa by’amenge. Kandi ekirimu kighumerera ekyo kikaha oghundi y’obutoki bw’eribugha emyatsi eyo bandi batasi. 9 Ekirimu kighumerera ekyo kikaha omundu y’obwikirirya, ikyaha n’oghundi y’obutoki bw’erilamya. 10 Kikaha oghundi y’obutoki bw’erikola ebitiko-tiko, oghundi obutoki bw’eribugha obuminyereri, oghundi obutoki bw’eriminyerera omwatsi mulebe ng’akalua oko Mungu kutse iyehe, oghundi obutoki bw’eribugha omo yindi mibughe, n’oghundi obutoki bw’eribindula ebikabughawa omo yindi mibughe. 11 Emyatsi yosi eyo yikakolawa n’ekirimu kighumerera. Ekirimu ky’oMungu kyo kikaminya nga kikendiha obuli mundu y’obutoki bwahi.
12 Omubiri w’omundu ali n’ebitsuko bingyi. Aliwe, ni mubiri mughuma musa. Kandi ebitsuko byosi ebyo ni by’omubiri oyo. N’omubiri wa Kristo kwali atya. 13 Itwe bosi twabatisibawa omo rina ry’ekirimu kighumerera tutoke eribya omubiri mughuma. Twangabya Bayahudi, kutse Bagiriki, bakobe kutse abandu abali bwiranda, itwe bosi mutwahabwa ekirimu kighuma.
14 Omubiri syaliko ekitsuko kighuma kisa, aliwe aliko bitsuko binene. 15 Ekisando kyamabugha kiti, “Ingye kundi siniri byala, siniri w’oko mubiri,” ekyo sikyangaleka ikitabya ky’oko mubiri. 16 Okutu kwamabugha kuti, “Kundi siniri riso, siniri w’oko mubiri,” ekyo sikyangaleka ikwatabya kw’oko mubiri. 17 Omubiri wosi ngalibya riso, omundu angabere akowa ati? Omubiri wosi ngalibya kutu, omundu syangatokire eribya akowa ekikumbo kyosi-kyosi. 18 Aliwe, oMungu mwahira ebitsuko by’omubiri byo haghuma ngoko anzire.
19 Ebitsuko byosi ngabyabya bighumerera, hanganabere omubiri? 20 Neryo hali ebitsuko bingyi, aliwe hali omubiri mughuma musa. 21 Eriso siryangabwira ebyala riti: “Sinikulaghireko.” N’omutwe syangabwira ebisando ati: “Sinikulaghireko.” 22 Oko kwenene, ebitsuko by’omubiri ebikalangirika nga sibiwite akaghala ni by’omughaso. 23 Kandi tukasikaya kutsibu ebitsuko by’omubiri ebyo tukalengekanaya nga si by’omughaso. N’ebitsuko by’oko mubiri wetu ebitatolere erilangirwa, tukasikayabyo kutsibu. 24 Aliwe, situlikolera tutya ebitsuko by’oko mubiri wetu ebikatsemesaya. OMungu mwahira ebitsuko by’omubiri byo haghuma. Mwakola atya ebitsuko ebilaghire okw’itsomanwa bitoke eritsomanwa kutsibu. 25 Mwakola atya omubiri akasyaghabana. Ritolere ebitsuko by’omubiri ibyawatikania. 26 Ekitsuko kighuma ky’omubiri kyamabyaghalwa, ebindi byosi bikaghalawa haghuma nakyo. Ekitsuko kighuma ky’omubiri kyamabisikibwa, ebindi byosi bikatsema haghuma nakyo.
27 Muli mubiri wa Kristo, n’obuli mughuma w’okw’inywe ni kitsuko ky’oko mubiri oyo. 28 OMungu mwaha obuli mundu y’akanya kiwe omo ndeko. Omo mwanya w’erimbere, mwahiraho abakwenda. Omo mwanya w’akabiri mwahiraho abaminyereri. Omo mwanya w’akasatu, abakangirirya. Neryo amatasyahiraho abakakola ebitiko-tiko. Enyuma sy’aho, mwahiraho abali n’obutoki bw’erilamya abandi, abakawatikaya abandi, abakasondola abandi, n’abali n’obutoki bw’eribugha omo mibughe mbiriri-mbiriri. 29 Abosi nina bakwenda kwe? Kutse nina baminyereri kwe? Kutse nina bakangirirya kwe? Abosi bakanakola ebitiko-tiko kwe? 30 Abosi banawite obutoki bw’erilamya abandi kwe? Abosi banawite obutoki bw’eribugha omo yindi mibughe kutse eribindula* ebikabughawa omo yindi mibughe kwe? 31 Neryo muyikase eribana obutoki bunene ok’obo. Nikwa ngasonda eribakangania omwatsi owuwene kulenga eyindi yosi.