Zefania
2 Muhindane haghuma, muhindane haghuma,
Inywe kihanda ekitikw’isoni.
2 Embere ebyo oMungu abiribugha bibererere,
Embere ekiro kilabe ng’omusunga
Embere ekinigha kinene kya Yehova kyase okw’inywe,
Embere ekiro ky’erihitana rya Yehova kyase okw’inywe,
3 Musondaye Yehova, inywe bandu bosi bolo* abali oko kihugho,
Inywe mukakwama emighambo* yiwe eyitunganene.
Musondaye eritunganene,* musondaye obolo.
Kwa muhwa mukendisyabiswa* ekiro ky’erihitana rya Yehova kyahika.
4 Kundi Gaza akendisyabya matongo;
Na Ashkeloni akendisyabya matongo.
Bakendisyahigha Ashdodi omo ritungyi rya pe,*
Na Ekroni akendisyakulangwa.
5 “Bulighe oko bikere omo kiharo ekiri oko musike w’engetse, ekihanda ky’Abakereti!
Ekinywa kya Yehova kyabirikangania ngoko muli n’amakosa.
Ngendikutoghotya, iwe Kanaana, ekihugho ky’Abafilistini,
Neryo siwendisyasyikalwamo.
6 Ekiharo ky’oko musike w’engetse kikendisyabya myanya y’erilisiryamo,
Kikendisyabyamo amabulu w’abalisya n’amaluba w’amabwe w’esyombuli.
7 Kikendisyabya kiharo ky’abakendisyasighalira b’omo kihanda kya Yuda,
Bakendisyabya bakalira eyo.
Omw’igholo, bakendisyabya bakaghotsera omo manyumba wa Ashkeloni.
Kundi Yehova oMungu wabo akendisyatsomanabo,
Kandi akendisyasubulya abanyewa babo.”
8 “Mungowa ebinywa by’eritsamba bya Moabu n’ebinywa by’eritsamba by’Abaamoni,
Abalyakara* abandu baghe n’eriyihalamba bati bakendihamba ekiharo ky’abandu baghe.
9 Busana n’ekyo, oko kwenene-kwenene ngoko niriho,” Yehova w’emilondo, oMungu we Israeli, atya,
“Moabu akendisyabya nge Sodomo,
N’Abaamoni bakendisyabya nge Gomora,
Bakendisyabya omwanya owalimo ebyatsinge, ekyuna ky’omunyu, n’embwarara ya kera na kera.
Abandu baghe abakendisyasighalira bakendisyapura ebindu byabo,
N’abakendisyasighalira b’omo kihanda kyaghe bakendisyabimyako ebindu byabo.
10 Ekyo kyo bakendisyabana omo mwanya w’emiyiheko yabo,
Kundi mubakara* abandu ba Yehova w’emilondo n’eripokyabo.
11 Okw’ibo, Yehova akendisyabya omundu oyukasaghisaya;
Kundi akendisyatoghotya* emiungu yosi y’oko kihugho,
N’ebisanga* byosi by’ebihanda bikendisyamukukamira,*
Obuli kihanda omo mwanya wakyo.
12 Nenyu, inywe Baetiopia, mukendisyitibwa omo muyali.
13 Akendisyakakirya ebyala biwe oko luhande lw’endata n’eritoghotya Asiria,
Akendisyayira Ninawi mo matongo, ng’embwarara eyumire.
14 Esyonyama, emihanda yosi y’esyonyama sy’emoli,* sikendisyaghotsera mugho.
Emwari n’endiko bikendisyaghotsera omo kiro omo syombita sy’oko syonduyi syamo.
Omulenge akendisyimbira omo ridirisa.
Eritsandya rikendisyabya eyikwa w’omulango;
Kundi akendisyayira esyombagho sy’emiti y’emierezi syo ndumbu.
15 Oyo w’omuyi w’emiyiheko, owabya ikere buholo,
Owabya akayibwira omo mutima ati, ‘Niriho ingyuwene, sihali ghundi.’
Ibwa lino, abiribya ekindu ekikita obuba,
Omwanya owakaghotseramo esyonyama sy’emoli!
Abosi abakendisyalaba hakuhi nagho bakendisyasughunda n’eribya nga bakahagho engume.”