Ezekieli

1 Oko mwaka we 30, ekiro ky’akatano oko mwisi we 4 nabya inine oko lusi lwe Kebari omo bandu abanyeghawa; olubula mulwakingukala, neryo munatsuka erilangira esyonzoli sy’oMungu. 2 Oko kiro ky’akatano ky’omwisi oyo—ni bugha ambu, omo mwaka w’akatano w’obunyewa bw’Omwami Yehoyakini— 3 ekinywa kya Yehova mukyahika oko Ezekieli mughala w’omuhereri Buzi oko lusi lwe Kebari omo kihugho ky’Abakaldea. Eyo akaghala* ka Yehova mukamuhikako.

4 Ininemutungerera, munalangira embula y’ekihunga ikasira oko luhande lw’endata. Habya n’ekitu kinene n’omuliro owakapala-palaya* owatimbireko ekyakakala ekikangabasenie, n’omo kati-kati k’omuliro habya ekindu ekisosire e elektrumu.* 5 Omo muliro oyo, mwabya ekindu ekisosire ebihangyikwa bini ebiriho, n’erisosa ly’obuli kihangyikwa lyabya ng’ery’omundu. 6 Obuli kihangyikwa kyabyako amusu ani n’ebipupa bini. 7 Ebisando byabyo byabya bimene, n’obulyatiro bw’ebisando byabyo bwabya busosire obulyatiro bw’ekyana ky’ende, kandi bwabya bukangabasenie ng’ekwivre* eyihalire. 8 Byabya n’ebyala by’abandu ahikwa oko bipupa byabyo oko syombande ini syosi. Ebihangyikwa bini byosi byabya n’amusu n’ebipupa. 9 Ebipupa byabyo byabya bituleneko. Ebihangyikwa ebyo isibiribinduka bikaghenda; obuli kihangyikwa ikikaghenda butsir’ikita.

10 Amusu wabyo kw’abya asosire atya: Obuli kighuma ky’oko bihangyikwa bini ebyo kyabya n’obusu bw’omundu n’obusu bw’endale* oko luhande lw’amali, n’obusu bw’enume y’ende oko luhande lw’amalembe, n’obuli kighuma ky’oko bihangyikwa bini ebyo kyabya n’obusu bw’erisamba. 11 Amusu w’ebihangyikwa ebyo kw’abya atya. Ebipupa byabyo byabya bikakirye endata wabyo. Obuli kighuma kya kubyo kyabya n’ebipupa bibiri ebituleneko n’ebipupa bibiri ebiswikire omubiri.

12 Obuli kihangyikwa kyabya kikaghenda butsir’ikita, ibikaghenda ehosi eyo ekirimu kyabya kikasondolabyo eriya. Ibikaghenda butsir’ibinduka. 13 N’ebihangyikwa ebiriho ebyo byabya bisosire amakala w’omuliro awakaka. Ekindu ekyabya ng’ebisosomole ebiriko ekirimi ky’omuliro ekikangabasenie kyabya kikalolya eyi n’eyi omo kati-kati k’ebihangyikwa ebiriho, n’ehirabyo hyabya hikaluira omo birimi by’omuliro. 14 N’omughulu ebihangyikwa ebiriho ebyo byabya bikaghenda n’erisubula, erighenda lyabyo ryabya rikalangirika ng’eripalya ly’akarabyo.

15 Ininemusamalira ebihangyikwa ebiriho ebyo, munalangira oko kihugho kw’ebiringo ahikwa oko buli kighuma ky’oko bihangyikwa ebiriho eby’amusu ani ebyo. 16 Ebiringo ebyo n’erisosa ryabyo lyabya likangabasenie ng’ekrisolito kandi ebiringo bini ebyo byabya bisosene. Erisosa ly’ebiringo ebyo n’emikokoterye yabyo yabya ekiringo* nga kiri omo kindi. 17 Omughulu byabya bikaghenda, byabya ibyanganatoka erighenda oko luhande losi-losi l’oko syombane ini butsira eribinduka. 18 Esyojantre* syabyo syabya endata kutsibu erihika oko kika isikita obuba. Esyojantre sy’ebiringo bini byosi syabya syoswireko ameso awatimbire kubyo. 19 Omughulu ebihangyikwa ebiriho byabya bikaghenda, ebiringo ebyo byabya bikaghenda haghuma nabyo, n’omughulu ebihangyikwa ebiriho byabya bikiruka erilua oko kihugho, ebiringo nabyo byabya bikirruka. 20 Ebihangyikwa ebyo byabya bikaya eyo ekirimu kyabya kikasondolabyo eriya, ehosi-hosi eyo ekirimu kyabya kikaya. Ebiringo byabya bikiruka haghuma nabyo, kusangwa ekirimu ekyabya kikakola omo bihangyikwa ebiriho* kyabya n’omo biringo. 21 Omughulu ebihangyikwa ebiriho byabya bikaghenda, ebiringo nabyo byabya bikaghenda; n’omughulu byabya bikimana, n’ebiringo nabyo byabya bikimana; n’omughulu byabya bikasumbwa erilua oko kihugho, ebiringo nabyo byabya bikasumbwa haghuma nabyo, kusangwa ekirimu ekyabya kikakola omo bihangyikwa ebiriho kyabya n’omo biringo.

22 Endata oko mitwe y’ebihangikwa ebiriho ebyo yabya ekindu ekisosire ekyanya ekikangabasenie ekiri ng’eritsuku erighambire, ekiyisanzire endata oko mitwe yabyo. 23 Eyikwa oko kyanya ekyo, ebipupa byabyo byabya bilolere endata* kandi ibisamalirene. Obuli kihangyikwa kyabya n’ebipupa bibiri. Ebipupa bibiri ibikaswika emibiri yabyo oko luhande lughuma, n’ebindi bibiri oko lundi luhande. 24 Omughulu nowa omulenge w’ebipupa byabyo, abya ng’omulenge w’amaghetse awakahuha, omulenge ow’Omutoki w’Ebyosi. Ibikabya bikaghenda ibikabughaya olukanda ng’olw’abasuda. Ibikabya bikimana ibikakimaya ebipupa byabyo.

25 Omulenge mwahuluka endata oko kyanya ekyabya endata oko mitwe yabyo. (Ibikabya bikimana ibikakimaya ebipupa byabyo) 26 Endata oko kyanya ekyabya endata oko mitwe yabyo, yabya ekindu ekiri ng’eribwe ry’eyakuti, kandi ikisosire ekitumbi ky’obwami. Oko kitumbi ky’obwami ekyabya endata ekyo, kwabya kwikere ekindu ekisosire omundu. 27 Munalangira ekindu ekikangabasenie, ekiri ng’ekyuma ekikaka, ekiri ng’omuliro owakalua omo kindu ekyabya ng’embindi yiwe n’ebitsuko by’endata. Eritsuka omo mbindi yiwe n’erindaghala, munalagira ekindu ekiri ng’omuliro. Habya erikangabasania oko syombande siwe syosi 28 erisosire ekima ekiri omo kitu oko kiro ky’embula. Ekyakakala ekikangabasenie ekyabya kimutimbireko ko kyabya kitya. Kyabya ng’erisosa ry’olukengerwa lwa Yehova. Omughulu nalangirakyo, munatulama oko kitaka n’eritsuka eryowa omulenge w’oMungu akabugha.