Engulu mbuya eyahandikawa na Yohana
17 Yesu mwabya abibugha emyatsi eyi, mwasamalira elubula n’eribugha ati: “Tata, endambi yabirihika. Uhe omughala waghu y’olukengererwa, naye atoke erikuha olukengerwa, 2 ngoko wanabirimuha ehamuli oko bandu bosi atoke eriha abandu bosi abo wabirimuha b’engebe y’erikota. 3 Eyi ni ngebe y’erikota, abandu bakuminye iwe Mungu mughuma musa w’ekwenene, ibaminya na Yesu Kristo oyo watuma. 4 Nabirikuha olukengerwa oko kihugho, omw’ibugha omubiiri ogho wamba. 5 Neryo lino, Tata, umbe olungengerwa aho uli oluli ng’olo nabya nalo aho uli embere ekihugho kibye.
6 “Nabiriminyikalya erina ryaghu oko bandu abo wamba erilua omo kihugho. Babya baghu, naghu muwambabo. Kandi babirikenga ekinywa kyaghu. 7 Lino babiriminya ngoko emyatsi yosi eyo wamba, ikalua okw’iwe; 8 kusangwa nabiribwirabo emyatsi eyo wambwira, kandi babirilighayo n’eriminya kwenene ngoko nasa ng’omukwenda waghu, n’erikirirya ngoko niwe wanituma. 9 Ngasaba busana nabo; sinirisaba busana n’ekihugho, aliwe busana n’abo wabirimba, kusangwa ni baghu; 10 kandi ebyosi ebyo niwite ni byaghu n’ebyaghu ni byaghe, kandi nabiribana olukengerwa omo kati-kati kabo.
11 “Sinikiri omo kihugho, nandimwasa eyo uli; aliwe ibo bane omo kihugho. Mubuyirire, Tata, uteghayebo busana n’erina lyaghu eryo wabirimba batoke eribya mughuma ngoko ingye naghu tuli mughuma. 12 Ingabateghaya omughulu nabya haghuma nabo busana n’erina lyaghu eryo wabirimba; kandi nabiriteyabo. Sihali n’omughuma wa kubo oyo wabirihera erilusyako omughuma musa, omughala w’eriheribwa, amasako atoke eribererera. 13 Nikwa lino ngasa eyo uli, ngabughira emyatsi eyi y’omo kihugho obutseme bwaghe butoke erihikana omo mitima yabo. 14 Nabiribaha ekinywa kyaghu, aliwe ekihugho kyabiriponabo kusangwa si b’ekihugho ngoko naghe siniri w’ekihugho.
15 “Sinirisaba niti ubalusaye omo kihugho, aliwe niti uteghayebo oko mubi. 16 Si b’ekihugho, naghe ngoko siniri w’ekihugho. 17 Uyirebo mo babuyirire* erilabira ekwenene; ekinywa kyaghu ni kwenene. 18 Ngoko wananituma omo kihugho, naghe ngatumabo omo kihugho. 19 Busana nabo, nandimulola embere eribya mubuyirire,* nabo batoke eribya babuyirire* erilabira ekwenene.
20 “Sindisaba busana n’aba basa, aliwe kandi ngasaba busana n’abosi abakanikiriraya erilabira ekinywa kyabo, 21 batoke eribya mughuma ngoko iwe Tata, uli omo bughuma naghe, naghe omo bughuma naghu, nabo babye omo bughuma netu; ekihugho kitoke erikirirya ngoko n’iwe wanituma. 22 Nabirihabo olukengerwa olo wabirimba, batoke eribya mughuma ngoko netu tuli mughuma. 23 Ingye omo bughuma nabo, naghu omo bughuma naghe, batoke eribya kindu kighuma ekiluyirirene,* ekihugho kiminye ngoko n’iwe wanituma; kandi ngoko wabiryanzabo ngoko wabirinyanza. 24 Tata, nianzire abo wabirimba ibabya haghuma naghe aho niri, batoke erilangira olukengerwa olo wabirimba kusangwa muwanianza embere ekihugho kihangikawe. 25 Iwe utunganene, Tata, nomo ekihugho sikitakuminya, ingye ninakwasi, n’aba babiriminya ngoko n’iwe wanituma. 26 Nabiriminyisyabo erina lyaghu, kandi ngendiminyisyaryo, olwanzo olo wanikanganaya lubye omo mitima yabo naghe omo bughuma nabo.”