Ezekieli
47 Neryo mwanisubulya amanileta oko bwingiriro bw’ehekalu. Eyo, munalangira amaghetse akasenda erilua omo kadrema k’ehekalu inyanemulolera oko luhande lw’eyo eryuba rikasira. Kusangwa oluhande lw’embere olw’ehekalu lwabya oko luhande lw’eyo eryuba rikasira. Amaghetse abya akasenda erilua oko luhande lw’amali lw’ehekalu, oko luhande lw’eyikwa lw’ekiherero.
2 Neryo mwanihulukya amanilabya omo lukyo lw’oko luhande lw’endata, amanitwala ehihya n’erinitimbya oko lukyo lw’ehihya olulolere oko luhande lw’eyo eryuba rikasira; naghe munalangira amaghetse akasononoka erilua oko luhande lw’amali.
3 Omulume oyo abere ahuluka erilolerera oko luhande lw’eyo eryuba rikasira inyanawite oko kamba y’eripimamo omo byala, mwapima amaboko* 1 000 neryo amanilabya omo maghetse; amaghetse abya ahikire oko bukungulu.
4 Neryo mwatasyapima awandi maboko 1 000, amanilabya omo maghetse. Mwahika oko marwi.
Kandi mwapima awandi maboko 1 000 n’erinilabya omo maghetse. Amaghetse mwahika omo mbindi.
5 Abere atasyapima awandi maboko 1 000, mulwabya lusi namabya isinangatoka erisokalo. Kusangwa amaghetse abyamo omutobero, omundu iniatolere inyatsiha.* Lwabya lusi olo omundu ate angasoka omo bisando.
6 Mwanibulya ati: “Mughala w’omundu, wanamalangira eki?’
Neryo mwabugha ati nilabe omo maghetse amanisubya oko musike w’olusi. 7 Omughulu nasubula, munalangira oko musike ikuli emiti mingyi kutsibu oko mbande syosi. 8 Neryo mwabugha naghe ati: “Amaghetse aya akasendera eyo eryuba rikasira, inyandaghala n’eritwangana e Araba n’eriingira omo ngetse. Akendibya abingira omo ngetse, amaghetse w’eyo akendilama. 9 Ebikuto by’ebihangyikwa ebikahumula bikenditoka eriikala ehosi-hosi eyo amaghetse* ayo akasendera. Yikendibya esyosamaki nyingyi, kusangwa amaghetse aya akendisenderayo. Amaghetse w’engetse akendilamibwa, n’obuli kindu kikendiikala, ehosi-hosi eyo olusi olu lukalola.
10 “Abasohi bakendisyimana oko musike walo eritsuka e En-gedi erihika e En-eglaimu, eyikendisyabya ekibugha ky’erisanzamo amatimba. Yikendisyabya esyosamaki nyingyi sy’emihanda mingyi, ng’esyosamki sy’Engetse Nene.*
11 “Yikendisyabya n’ebisesa n’ebisanga, n’ebi sibyendisyalamibwa. Bikendisyasighirwa omunyu.
12 “Emihanda yosi y’emiti y’akalyo ikendisyalasa oko misike y’olusi. Ebikoma byayo sibyendisyuma; kandi siyendisyabula n’ahake erihetya amatunda. Obuli mwisi ikendisyahetya amatunda mahya-mahya, kusangwa amaghetse wayo akendisyabya akalua ahabuyirire. Amatunda wayo akendisyabya kalyo, n’ebikoma byayo bikendisyabya bubalya.”
13 Yehova, Omukama Mukulu oko Bosi ati: “Eki kye kiharo ekyo ukendiha ebihanda 12 bya Israeli, mo mwandu. Ekihanda kya Yozefu kikendihabwa amaghabo abiri. 14 Mukendisighalyakyo kandi mukendihabwa amaghabo awalingirirene.* Munalahirya ngoko ngendisyahakyo abotata-kulu wenyu, neryo lino mwamahabwakyo* mo mwandu.
15 “Ono wo mupaka* w’ekihugho oko luhande lw’endata: Atsukire oko Ngetse Nene, inyaghenda erihika e Hetloni erilolera e Zedadi, 16 Hamati, Berota, ne Sibraimu, eyiri omo kati-kati k’ekiharo kye Damasko n’ekye Hamati, erihika e Hasari-hetikoni, eyiri oko mupaka* we Haurani. 17 Neryo omupaka* akendilua oko ngetse erihika e Hasari-enoni, iniatambuka oko mupaka we Damasko oko luhande lw’endata, n’omupaka we Hamati. Oyu wo mupaka w’oko luhande lw’endata.
18 “Oluhande lw’eyo eryuba rikasira lukendibya omo kati-kati ke Haurani ne Damasko n’erilaba oko musike we Yordani omo kati-kati ke Gileadi n’ekihugho kya Israeli. Litolere iwapima eritsuka oko mupaka* erihika oko ngetse* y’oko luhande lw’eyo eryuba rikasira. Oyu wo mupaka w’oko luhande lw’eyo eryuba rikasira.
19 Omupaka* w’oko luhande lw’eyikwa,* akendilua e Tamari erihika oko maghetse we Meribati-kadeshi, neryo inyalola oko Musya Owakumamo Amaghetse* n’oko Ngetse Nene. Oyu wo mupaka w’oko luhande lw’eyikwa.*
20 “Engetse Nene yiri oko luhande lw’eyo eryuba rikalengera, eritsuka oko mupaka erihika oko mwanya owasamalirene ne Lebo-hamati.* Oyu wo mupaka w’oko luhande lw’eyo eryuba rikalengera.
21 “Mutolere imwaghabana ekihugho eki, inywe bihanda 12 bya Israeli. 22 Mutolere imwaghabanakyo eribya mwandu wenyu n’ababunga abo mwikere nabo ababiributa abana ibanikere nenyu; nabo bakendibya okw’inywe ng’esyombutirwa sy’omo Israeli. Bakendihabwa omwandu omo bihanda bya Israeli haghuma nenyu. 23 Litolere imwaha omubunga y’omwandu omo kiharo ky’ekihanda ekyo abiriikalamo,” Yehova, Omukama Mukulu oko Bosi atya.