Isaya
62 Busana ne Sioni sinendibya bukutu,
Na busana ne Yerusalema sinendiyiteka buyira
Erihika omughulu eritunganene ryagho likendikangabasania ng’ekyakakala
N’omulamo wagho inyaka ng’ekisosomole.
2 “Iwe mukali, ebihanda bikendisyalangira eritunganene lyaghu,
N’abami bosi bakendisyalangira olukengerwa lwaghu.
Ukendisyahulwa omo rina lihya-lihya,
Eryo obuno bwa Yehova iyuwene-wene bukendisyateghekania.
3 Ukendisyabya mbita y’obubuya omo byala bya Yehova,
Esapu y’omwami ey’ekilemba omo byala by’oMungu waghu.
4 Siwendisyasyahulwa mo mukali oyo wabirisighanibwa,
N’ekihugho kyaghu sikyendisyasyahulwa mo matongo.
Aliwe ukendisyahulwa mo Obutseme Bwaghe Buli Omw’iye,
N’ekihugho kyaghu kikendisyahulwa mo Oyuhikibwe.
Kusangwa Yehova akendisyakutsemera,
N’ekihugho kyaghu kikendisyabya ng’oyutahibwe.
5 Kusangwa ngoko omulwana akanatahaya omubikira,
Abana baghu bakendisyakuhikya.
OMungu waghu akendisyakutsemera,
Ngoko iba w’omuheruki akanatsema busana n’omuheruki,
6 Iwe Yerusalema, nabirihiraho abateya oko syombimbo syaghu.
Butsira eryumbya, omo musibo wosi n’omo kiro kyosi, siritolere bakabya bukutu.
Inywe mukubaha Yehova,
Isimwaluhuka,
7 Kandi isimwaleka akaluhuka n’ahake erihika omughulu akendihangania e Yerusalema yo ndeke-ndeke,
Inga, erihika omughulu akendiyirayo mo kindu ekikaleta eripipa oko kihugho.”
8 Yehova abirilapa* omo byala biwe by’amali, omo kuboko kwiwe kw’amaka ati:
“Sinendisyasyaha esyonzighu syaghu sy’embuto yaghu mo kalyo,
Kutse ab’ehandi sibendisyanywa edivai yaghu nyihya-nyihya eyo wabirinubira.
9 Aliwe abakendisyaghesa enafaka eyo bo bakendisyalyayo neryo ibapipa Yehova;
N’abakendisyateha edivai bakendisyanywirayo omo bibugha byaghe ebibuyirire.”
10 Mulabe, mulabe omo syongyo.
Muhighulire abandu baghe b’enzira.
Muhimbe, muhimbe embalo nene.
Mulusaye muyo mw’amabwe.
Musumbe ekiminyikalo* busana n’abandu.
11 Lebaya! Yehova abiritulagho erihika oko nduli sy’ekihugho ati:
“Mubwire omwali we Sioni muti,
‘Lebaya! Omulamo waghu anemwasa.
Oluhembo lwiwe lune haghuma naye,
N’obuhingyi obo akaliha bune embere siwe.’”
12 Bakendisyahulwa mo bandu ababuyirire, abo Yehova akombola,
Naghu ukendisyahulwa mo Oyukasondibawa, Omuyi Owatasighanibwe.