Eryibuka Ebihano
25 “Abandu babiri bamatendihulikirirana, litolere ibayasungana n’abatsweri. Abatsweri abo bakenditswerabo n’erikangania oyute n’ekosa nga nindi, n’oyuli n’ekosa nga nindi. 2 Oyuli n’ekosa amabya iniatolere erihunzwa, omutsweri akendimulambika ahisi n’eribugha ati bamuhunze embere siwe. Esyofimbo esyo akendihunzwa, litolere isyalingirirana n’obulito bw’ekosa yiwe. 3 Esyofimbo esyo akendimuhunza syanganahika oko 40, aliwe isisyalaba okw’aho. Amabihunza omughala wabo esyofimbo esilabire okw’esyo, aho iniamahemuka embere syaghu.
4 “Isiwaboha obuno bw’enume y’ende omughulu ikahumba engano.
5 “Abaghala kw’abaghala bamikala haghuma, neryo omughuma wa kubo iniahola isyalyayira omwana, siritolere omukali w’oyulyahola iniatahibwa omo kindi kihanda. Litolere bonde wiwe iniaya eyali, iniamuyiramo mukali wiwe, n’erikola naye endwa y’omundu na bonde wiwe. 6 Omwana w’erimbere oyo akendisyabuta, akendisyaheka erina ry’omughala wabo oyulyahola, erina ry’oyulyahola rikasyabiriranwa omo Israeli.
7 “Aliwe omulume oyo amabya isyanzire eritahya omukali w’omughala wabo oyulyahola, omukali oyo akendisyayasungana n’abasyakulu oko mulango w’omuyi n’eribabwira ati, ‘Mughala wabo mwira waghe abirighana erikola omwatsi owakendileka erina rya mughala wabo iritabiriranwa omo Israeli, abirighana erikola naghe endwa y’omundu na bonde wiwe.’ 8 Neryo abasyakulu b’omo muyi wiwe bakendisyamubirikira n’erikania naye. Amabighana tu n’eribugha ati, ‘Sinanzire erimutahya,’ 9 neryo omukali oyo w’omughala wabo oyulyahola akendisyaseghera hakuhi naye embere sy’abasyakulu, iniamulusya ekiryato, iniamutwirako ebitande omo busu, n’eribugha ati, ‘Ekyo kyo litolere erikolera omundu oyutanzire omughala wabo akabya n’abana erilabira iye.’ 10 Enyuma sy’aho, erina ry’ekihanda kiwe* omo Israeli rikendisyabya ‘Enyumba y’omundu oyo balusaya ekiryato.’
11 “Abalume babiri bamabilwa, neryo omukali w’omughuma iniasa atoke erilamya omulume wiwe oko oyukalwa naye, neryo omukali oyo iniahamba omulume oyukalwa n’omwira wiwe oko busoni bwiwe, 12 aho litolere iwatwa oko mukali oyo kw’ebyala. Isiwamukwira obulighe.*
13 “Isiwabya n’ebilo* bibiri ebitalingirirene omo ngunza yaghu, ekilo kinene n’ekike. 14 Isiwabya n’ebindu bibiri by’eripimamo* ebitalingirirene omo nyumba yaghu, ekinene n’ekike. 15 Litolere biro byosi iwabya n’ekilo ky’ekwenene kandi ekitemo obwibi, utoke eribugha mughulu muli omo kihugho ekyo Yehova oMungu waghu akakuha. 16 Kundi Yehova oMungu waghu aponire omundu wosi-wosi oyutatunganene oyukakola emyatsi eyo.
17 “Isiwibirirawa ekyo Amaleki akukolera omo nzira, omughulu wabya ukalua e Misri. 18 Isiwibirirawa ngoko mwasyahindana naghu omo nzira n’erilwa n’abosi ababya enyuma syaghu bakaghenda lyolo-lyolo, omughulu wabya iwabiriluha n’erileghetsana. Mwatasagha oMungu. 19 Yehova oMungu waghu akendisyabya abikuluhukya oko syonzighu syaghu syosi esikutimbireko omo kihugho ekyo Yehova oMungu waghu akakuha mo mwandu, litolere iwabughaho Amaleki erina riwe rikasyibukwa eyikwa w’elubula. Isiwibirirawa ekyo.