Ebaruha oko Abanya Roma
1 Ebaruha eno ikalua oko Paulo, omughombe wa Kristo Yesu. OMungu mwanibirikira nitoke eribya mukwenda, kandi anisombola nitoke eritulaghania engulu mbuya yiwe. 2 OMungu abya iniabirikania oko ngulu mbuya eyo ko kera omo Masako abuyirire erilabira abaminyereri biwe. 3 Engulu mbuya eyo ikakanaya oko Mughala wiwe, oyo wabya omo kihanda* kya Daudi. 4 Kwenene-kwenene Yesu Kristo, Omukama wetu, ni Mughala w’oMungu kundi oMungu mwakolesya obutoki bw’ekirimu kiwe kibuyirire erimulubukya. 5 Erilabira iye, oMungu mwatukangania olukogho lwiwe. Yesu mwanisombola eribya mukwenda nitoke eriwatikya abandu b’ebihanda byosi erimwikirirya, erisikya ebinywa biwe, n’erisikya erina riwe. 6 Nenyu muli baghuma b’oko bandu b’ebihanda ababirikirawa erikwama Yesu Kristo. 7 Ebaruha eno ngahandikirayo abandu bosi abali e Roma ab’oMungu anzire, ab’oMungu abirikira batoke eribya babuyirire:
Olukogho n’obuholo bw’oMungu Tata wetu n’Omukama wetu Yesu Kristo bibye haghuma nenyu.
8 Embere w’ebyosi, ngasima oMungu waghe erilabira erina rya Yesu Kristo busana n’inywe bosi. Kusangwa omo kihugho kyosi, abandu banemukania oko bwikirirya bwenyu. 9 Ninemukolera oMungu n’omutima waghe wosi. Ngamukolera omwitulaghania engulu mbuya eyikakanaya oko Mughala wiwe. OMungu anasi ngoko siniribula eribahira omo misabe yaghe. 10 Ngasaba niti kyamatokekana, kandi oMungu amanza, ngambe inatoka erisyababana. 11 Kundi nanzire kutsibu eribalolako nitoke eribabwira emyatsi eyikendiwatya obwikirirya bwenyu. 12 Kutse itwe bosi tutoke erisikania mitima omw’ikania oko ebyo twikirirye.
13 Baghala betu, nanzire imwaminya ngoko kangyi-kangyi ngabya ininanzire erihika ewenyu, aliwe sikiritokekana. Nilwe nanzire inahikeyo nitoke eriwatikya abandu bangyi eryowa engulu mbuya ngoko abandi b’omo bindi bihanda banemwowayo. 14 Niri n’edeni y’eritula engulu mbuya oko bandu bosi. Oko Bagiriki n’abate Bagiriki, n’oko bandu b’amenge n’abatawite amenge. 15 Neryo nanzire kutsibu eribahubirya engulu mbuya ewenyu e Roma. 16 Sinirikwa esisoni sy’eritula engulu mbuya, kundi engulu mbuya ni nzira y’omughaso ey’oMungu akakolesaya erisabula abosi abakikiriraya, eritsuka oko Bayahudi n’Abagiriki kutya. 17 Abakikiriraya banemulangira ngoko oMungu ni mutunganene. Kandi ekyo kikawataya obwikirirya bwabo, ngoko Amasako akabugha ati: “Omutunganene akendisyabyaho busana n’obwikirirya bwiwe.”
18 OMungu w’elubula abirihitana busana n’emyatsi mibi n’eyituwene eyo bandu bakakola. Bakaleka abandi ibataminya ekwenene. 19 Babirikanganibwa ndeke-ndeke ebyangabawatikya eriminya oMungu. Kandi oMungu iyuwene-wene yo wabakanganayabyo. 20 Ebindu ebiri omo kihugho ekyo ahangyika bikatuwatikaya eriminya emibere yiwe eyitelangirika. Erilebya ebindu ebyahangyika rikatuwatikaya eriminya ngoko ali. Ebindu ebyo bikakanganaya akaghala kiwe ka kera na kera, kandi bikakanganaya ngoko ni Mungu. Abakaghana eriligha omwatsi oyo sibawite eky’eriyihambulisaniamo. 21 Nomo abandu abo babya basi oMungu, mubatamusikya n’erimusima. Aliwe, obwenge bwabo mubwatsanda kandi babiribya bakiru omo mitima yabo. 22 Abandu abo ni bakiru nomo bakanayilangiramo b’amenge. 23 Omo mwanya w’erikenga oMungu oyutewangahola, bakakenga esyosanamu sy’abandu abakahola, esyosanamu sy’esyonyunyu n’esy’esyonyama sy’amaghulu ani, n’esy’esyonyama esikakululuka.
24 Busana n’ekyo, oMungu mwalekabo bakole ebibi ebyo mutima wabo anzire ibakola, neryo bakakola emyatsi eyikita esisoni. 25 Bakikiriraya amabehi omo mwanya w’erikirirya ekwenene y’oMungu. Kandi bakaramaya n’erikolera ebindu eby’oMungu ahangyika omo mwanya w’eriramya n’erikolera Omuhangyiki wabyo. Niye yutolere eripipwa kera na kera. Amina. 26 Busana n’ekyo, oMungu mwalekabo bakwame esyongumbu syabo nene sy’erikola oburaghane. Abakali mubatanza erighotsera n’abalume, aliwe mubatsuka eribya bakaghotsera n’abandi bakali. 27 N’abalume nabo mubatanza erighotsera n’abakali. Aliwe busana n’engumbu nene y’erikola oburaghane, mubatsuka erighotsera n’abandi balume. Mubakola emyatsi eyikiita esyonye. Aliwe, bakendisyahabwa amalipizi* awo batolere busana n’obubi bwabo.
28 Kundi mubatalangira ini ky’omughaso eriminya oMungu, naye mwalekabo bakwame obukiru bwabo. Busana n’ekyo, mubakola emyatsi eyitatolere. 29 Abandu abo babya ibaswiremo emyatsi yosi eyitatunganene, obubi, omururu, n’amalolo. Balimo eritsuro rinene, bakiita, banzire amalwa, bakabugha amabehi kandi ni batesi. Balimo ebwebwebwe. 30 Bakatonga abandi, baponire oMungu, ni bandu abatatsomene, balimo erighundu n’emiyiheko. Bakapanga ebibi omo mitima yabo, sibalisikaya ababuti babo, 31 sibawite obwenge, sibalikola ebyo bakalagha, sibawite olwanzo, kandi sibalikwa obulighe. 32 Banasi ndeke-ndeke ngoko oMungu akabugha ati abandu abakakola emyatsi eyiri ng’eyo batolere oluholo. Nomo banasi ekyo, sibalitsira erikola emyatsi eyo. Aliwe kandi banzire abakakolayo.