Ebaruha y’erimbere oko Abanya Tesalonika
5 Baghala betu, sikikiri ky’omughaso eribahandikira oko mwatsi owalebirye endambi n’emighulu. 2 Kundi inyw’ibene-bene munasi ndeke-ndeke ngoko ekiro kya Yehova* kinemwasa ng’omwibi oyukasa omo kiro. 3 Omughulu bakendisyabugha bati: “Hamabibya obuholo n’embolere!” neryo bakendisyalw’ibatoghotibwa aho n’aho. Bikendisyabya ng’omughulu omukule akowa obulumi bw’eributa. Sibendisyabala n’ahake. 4 Aliwe, baghala betu, inywe simuli omo mwirima. Neryo ekiro ekyo sikyendisyabasisirya ngoko ekyakakala kikasisiraya abibi, 5 kundi inywe bosi muli bana b’ekyakakala, kandi muli bana b’eritungyi. Itwe situli bana b’ekiro kutse b’omwirima.
6 Neryo, isitwaghotsera ng’abandi. Aliwe, tuteghaye n’eriteya obwenge bwetu. 7 Abakaghotsera, bakaghotsera omo kiro, n’abakatamira, bakatamira omo kiro. 8 Aliwe itwe bana b’ekyakakala, tuteghaye obwenge bwetu. Twambale ekindu ekikateghaya ekikuba eky’obwikirirya n’eky’olwanzo. Kandi twambale ekikeke ky’ekyuma ky’amaha w’omulamo 9 kundi mwatatusombola busana n’erituha amalipizi. Aliwe, mwatusombola busana n’eribana omulamo, erilabira Omukama wetu Yesu Kristo. 10 Kristo mwahola busana netu kusudi twamateya kutse twamaghotsera,* twasyabyaho haghuma naye. 11 Neryo mubye mukasikania mitima* n’erihimbana ngoko munemukola.
12 Baghala betu, tukabasaba tuti musikaye abakakola kutsibu omo kati-kati kenyu, abakasondola omo Mukama n’eribakunga; 13 kandi mubasikaye kutsibu omo lwanzo busana n’omubiiri ogho bakakola. Mubye omo buholo. 14 Baghala betu, kandi tukabasaba tuti mukunge abatyowa. Mukiranaye ababunikire mutima. Muwatikaye abatawite akaghala. Mubye mukavumilia abandu bosi. 15 Muteghaye, sihabye omundu oyukaliha ekibi omo kibi. Obuli kiro mubye mukasondya ehyanya hy’erikolerana ebyuwene n’erikolerabyo abandi bosi.
16 Mutseme mughulu wosi. 17 Mubye mukasaba mughulu wosi. 18 Mubye mukasima oko myatsi yosi. Ekyo ky’oMungu akabasaba inywe mukakwama Kristo Yesu. 19 Isimwalimaya omuliro w’ekirimu. 20 Isimwapokaya amaminyereri. 21 Mubye mukalebya emyatsi yosi nga yinuwene. Mumakirire ekyuwene. 22 Muyihighule oko bubi bosi-bosi.
23 OMungu w’obuholo iyuwene-wene abayiremo babuyirire ndeke-ndeke. Ekirimu, enafsi,* n’omubiri wenyu sibibyemo erilolo, kandi bibye butsira kosa, omo myatsi yosi omughulu w’eribyaho ry’Omukama wetu Yesu Kristo. 24 Oyukababirikira ni mutalegula. Butsir’itika-tika, akendisyakola ekyo.
25 Baghala betu, mubye mukatusabira.
26 Muramukaye abaghala betu bosi omo lwanzo.*
27 Ngabasaba omo Mukama niti musomere ebaruha eyi abaghala betu bosi.
28 Olukogho lw’Omukama wetu Yesu Kristo lubye haghuma nenyu.