Emisyo
1 Emisyo ya Solomona, mughala wa Daudi, omwami we Israeli.
2 Emisyo eno yahandikawa yitoke eriha omundu y’amenge* n’erimukunga;
Erimuwatikya eryowa ebinywa by’amenge,
3 Erikunga omundu atoke eribya n’amenge,
Abye n’eritunganene, obutoki bw’eriyisogha ndeke, n’eribya mundu oyulungukere;
4 Eriha amenge w’abandu abatasi emyatsi mingyi;
Eriwatikya omulwana eriminya emyatsi mingyi n’erimuha obutoki bw’erilengekania.
5 Omundu w’amenge akahulikirira n’eriminya emyatsi mingyi;
Omundu w’amenge akasunga obutoki bw’erisondola emyatsi yo ndeke
6 Akowa emisyo n’ebinywa ebyo mundu ateangatoka erikumbula luba-luba,
Ebinywa by’abandu b’amenge n’esyondekerano syabo.
7 Eryubaha Yehova yo nzuko y’eriminya emyatsi.
Abakiru bo bakapokaya amenge n’ebinywa by’erikunga.
8 Mughala waghe, wowe ebinywa by’erikunga bya baba waghu,
Kandi isiwaleka erikwama amahano* wa mama waghu.
9 Ni mbita y’amawa eyuwene y’omutwe waghu
Kandi ni mapambo aghuwene w’engoto yaghu,
10 Mughala waghe, abakoli b’amalolo bamabisonda erikuteba, isiwaligha.
11 Bamabibugha bati: “Asa tughende.
Tuyalimbaye abandu n’eriitabo.
Tukendiyibisa n’erilindirira abandu abate n’ekosa isihali ekikaleka.
12 Tukenditomerabo ibakineho ngoko Eyisinda* ikatomera abandu,
Tukenditomerabo ibo bosi, ng’abandu abakandaghalira omo kyuna.
13 Tupure ebindu byabo byosi by’obughuli;
Tukendisulya omo manyumba wetu mw’ebindu ebyo tulyanyegha.
14 Asa, tughende kughuma!*
Ebyo tukendiba, tukendighababyo, obuli mundu inyimya ebilingirirene n’eby’oghundi.”*
15 Mughala waghe, isiwakwamabo.
Ebisando byaghu isibyalaba omo nzira yabo,
16 Kundi ebisando byabo byanguhire eriyakola ebibi;
Bakahumayira eriyuta omusasi.
17 Si kiri na mughaso omundu eritegha akanyunyu ikanalangire ngoko akakategha.
18 Kyo kikaleka ibalimbya batoke eriita abandu;
Bakayibisa busana n’eriita abandi.*
19 Abanzire eribya bateke omo bwibi ko bakakola batya,
Aliwe nomo bangabya bateke, ekyo kikendisyaleka ibaherya engebe* yabo.
20 Amenge w’ekwenene akalakira kutsibu omo ndaki.
Akabya iniane mubugha omo mulenge muli omo myanya y’abandu bosi.
21 Akabya inianemulakira omo mahwa* w’esyonzira esiswiremo abandu.
Akabya iniamubughira oko milango y’emiyi ati:
22 “Inywe mutasi kindu, erihika mughulu wahi mukendisyanza obutaminya?
Inywe mukasekereraya, erihika mughulu wahi mukendisyanza erisekererya?
Nenyu inywe bakiru, erihika mughulu wahi mukendisyapona eriminya emyatsi?
23 Mukwame ebyo ngababwira ngabakunga.*
Neryo ingendibutulirako ekirimu kyaghe;
Ngendibaminyisya ebinywa byaghe.
24 Munabirikira omo mulenge muli, aliwe mumutowa;
Munakakya ebyala byaghe, aliwe muhatabya oyutsomene,
25 Mumwabya mukaghana amahano waghe wosi
N’erighana ebinywa byaghe by’eribakunga.
26 Neryo naghe, ngendisyaseka omughulu obuhanya bukendisyabahikira,
Ngendisyabasekererya omughulu ekyo mukasagha kikendisyabahikira,
27 Omughulu ekyo mukasagha kikendisyasa ng’ekihunga kinene,
Omughulu obuhanya bwenyu bukendisyahika ng’ekihunga kinene,
Omughulu obuhanya n’amaligho bikendisyabahikira.
28 Oko mughulu oyo, bakendisyabya bakanibirikira, aliwe sinendisyasubirya;
Bakendisyanisondya ehosi-hosi, aliwe sibendisyanisunga,
29 Kundi mubatanza eriminya emyatsi,
Kandi mubatayisogha erisagha Yehova.
30 Mubaghana amahano waghe;
Mubapokya ebinywa byaghe byosi by’eribakunga.
31 Neryo bakendibana ebikendilua* omo mikolere yabo,
Kandi bakendighalwa busana n’ebyo banzire erikola.*
32 Kundi erihera ry’abandu abatawite obwenge rikendisyabita,
N’eritenditsomana ry’abakiru rikendisyaleka ibahera.
33 Aliwe oyukanihulikirira akendisyikala mbolere
Syendisyasagha obuhanya obwangahika.”