Emisyo
4 Baghala baghe, muhulikirire ebinywa by’erikunga by’omubaba;
Muhulikirire ndeke-ndeke mutoke eribya n’amenge,
2 Kundi ngendibaha amahano aghuwene;
Isimwaghana erikwama amakangirirya* waghe.
3 Nabya mwana oyukowa baba waghe
Kandi nabya mwana oyo mama waghe abya anzire kutsibu.
4 Iniakanikangiriraya n’erinibwira ati: “Omutima waghu isyaleka erikwama ebinywa byaghe.
Usikaye emighambo yaghe, n’eribyaho mughulu muli.
5 Usondaye amenge, usondaye obutoki bw’eryowa emyatsi yo ndeke.
Isiwabirirawa ebyo ngabugha, kandi isiwaleka erikwamabyo.
6 Isiwaghana amenge, kundi akendikuteya.
Wanzegho, kundi akendikutsunga.
7 Amenge w’omwatsi w’omughaso munene kutsibu,* neryo usondaye amenge.
Eritomeka oko byosi ebyo wangasondya, usondaye obutoki bw’eryowa emyatsi yo ndeke.
8 Ulangiregho mo w’omughaso, neryo iniakendikuhira omo mwanya w’endata.
Akendikuha olukengerwa kundi mughukakumbatiragho.
9 Akendihira embita eyuwene y’amawa oko mutwe waghu,
Akendikupamba omo mbita eyuwene nga.”
10 Mughala waghe, hulikirira, n’eriligha ebinywa byaghe,
Neryo emyaka y’engebe yaghu iyikendibya minene.
11 Ngendikukangirirya enzira y’amenge,
Ngendikusondola omo syonzira sy’ebyuwene.
12 Omughulu ukendibya ukaghenda, ebisando byaghu sibyenditwikala oko kindu;
Nibya n’omo wangatibita, siwenditwikala.
13 Umakirire ebinywa by’erikunga; isiwalwikabyo.
Uteghayebyo, kundi bikendisyaleka iwabana engebe.
14 Isiwakwama enzira y’ababi,
Isiwalaba omo nzira y’abandu abakakola ebituwene.
15 Ughane enzira eyo, isiwakwamayo;
Isiwalaba muyo, ulabe omo yindi.
16 Kundi sibangayato batetakola ekibi.
Kandi sibalisunga ehighotseri batetatoya omundu.
17 Bakalya omukati w’obubi,
Bakanywa n’edivai y’obutsururu.
18 Aliwe enzira y’abatunganene yiri ng’ekyakakala ky’omo tututu ekikakangabasanaya
Ekikalola embere erikanyirira erihika omo rityungyi rya pe.
19 Enzira y’ababi yiri ng’omwirimya;
Sibasi ekikabatwikalaya.
20 Mughala waghe, uhulikirire ndeke-ndeke ebinywa byaghe;
Uhulikirire ndeke-ndeke* ebyo ngabugha.
21 Isiwalusaya kubyo kw’ameso;
Ubikebyo emwisi sy’omutima waghu,
22 Kundi bikaha engebe abakabanabyo
Kandi bikaleka omubiri wabo iniabya inianakalire.
23 Uteghaye omutima waghu kulenga ekindi kindu kyosi-kyosi ekyo ukateghaya,
Kundi mo mukaluira esyongununuko sy’engebe.
24 Uyihighule oko mabehi,
Kandi uyihighule oko binywa ebihengemire.
25 Litolere ameso waghu inialebya embere syaghu hasa,
Ehee, ulebaye ekiri embere syaghu kisa.
26 Ulusaye ebikwangwa by’omo* nzira eyo bisando byaghu bikendilabamo,
Neryo esyonzira syaghu syosi isikendyuwana.
27 Isiwakitira oko luhande lw’amali kutse lw’amalembe.
Ulusaye ebisando byaghu omo myatsi mibi.