Emisyo
3 Mughala waghe, isiwabirirawa amakangirirya* waghe,
Kandi ukwame emighambo yaghe n’omutima waghu wosi,
2 Kundi ikendileka iwabyaho biro binene
N’eribyaho oko myaka minene, kandi ikendileka iwabya n’obuholo,
3 Isiwaleka olwanzo oluteleghula n’obutaleghula* bikakuluako.
Uboherebyo oko ngoto yaghu,
Uhandikebyo oko kibambali ky’omutima waghu;
4 Neryo ighukendikanganibwa olukogho
N’erilangirwa mo mundu w’amenge embere sy’oMungu n’embere sy’abandu.
5 Uyiketere Yehova n’omutima waghu wosi,
Isiwayiketera* obwenge bwaghu.
6 Urondaye obusondoli bwiwe omo byosi ebyo ukakola,
Neryo naye, iniakendilungula esyonzira syaghu.
7 Isiwayilangira mo w’amenge.
Ubahe Yehova n’erileka erikola ebituwene.
8 Neryo ekyo ikikendilamya omubiri* waghu
N’eritasyakalya-kalya amakuha waghu.
9 Ukolesaye ebindu byaghu by’obughuli busana n’eriha Yehova y’olukengerwa,
Ukolesaye n’ebyalya byaghu byosi* by’erimbere-mbere* busana n’erimuha olukengerwa;
10 Neryo amadepo waghu iniakendisyusula ndeke,
N’ebikamiro byaghu by’edivai ibikendisyusulamo kutsibu edivai nyihya-nyihya.
11 Mughala waghe, isiwaghana omughulu Yehova akakukunga,
Kandi isiwapona ebinywa biwe by’erikukunga,
12 Kundi Yehova akakunga abandu abo anzire,
Ngoko baba akakunga omughala wiwe oyo anzire.
13 Omundu oyukasunga amenge atsemire
N’omundu oyukabya n’obutoki bw’eriyiteghererya atsemire;
14 Kundi erisunga amenge ryuwene kulenga erisunga efeza,*
Kandi erisungagho riri n’endundi nene kulenga eribya n’ehoro.
15 Ni w’obughuli bunene kulenga esyokoraye;*
Omo byosi ebyo wanzire, simuli ekyo wangalinganisya n’amenge.
16 Amaisa mali ali omo byala byagho by’amali;
Obuteke n’olukengerwa biri omo byala byagho by’amalembe.
17 Esyonzira syagho syuwene nga,
N’esyonzira syosi syagho sirimo buholo.
18 Ni muti owakaha engebe abosi abakahambiriragho,
N’abosi abakamakiriragho bakendisyahulwa mo bandu abatsemire.
19 Yehova mwahiraho efondasyo y’ekihugho omo menge wiwe.
Mwawatya olubula omo butoki bwiwe bw’eriyiteghererya.
20 Mwakolesya obutoki bwiwe bw’eriminya emyatsi erighaba amaghetse manene,
Neryo olubula olulimo ebitu mulwatoghongya ekimi.
21 Mughala waghe, isiwalusaya kubyo* kw’ameso.
Isiwabula amenge n’obutoki bw’erilengekania ndeke;
22 Bikendikuha engebe
Kandi bikendibya mapambo oko ngoto yaghu;
23 Neryo ighukendilaba omo nzira yaghu mo buholo,
N’ebisando byaghu isibyenditwikala n’ahake.
24 Isiwendibya ukabya n’obuba omughulu ukaghotsera;
Ehighotseri hyaghu hikendisiha omughulu ukaghotsera.
25 Isiwendisagha omwatsi wosi-wosi owakahika kitsumbukirania kandi owakita obuba
Kandi isiwendisagha ekihunga kinene ekikendisyapepya ababi.
26 Kundi Yehova akendisyakuha omutima owatemo buba;
Akendisyateya ekisando kyaghu kikasyahambwa omo kitegho.
27 Isiwaghana erikolera ebibuya abo utolere erikolerabyo
Wamabya iwanganatoka eribawatikya.
28 Isiwabwira omulikyenyu ghuti, “Ghenda; usyasuba hano ho kindi kiro! Ngendisyakuhakyo omungya.”
Wamabya iwanganamuhakyo oko ndambi eyo.
29 Isiwasohera omulikyenyu y’omwatsi mubi
Aliwe iye inianasi ati ikere naghu buholo.
30 Isiwakuba obuhaka n’omundu isihali ekikaleka
Isiwakuba naye obuhaka isyetakukolera omwatsi mubi.
31 Isiwayitsutsa eribya ng’omundu mutsururu
Kandi isiwakola nga ye,
32 Kundi Yehova aponire omundu oyukakola emyatsi mitya-mitya,
Aliwe akakola obwira n’abandu abalungukere.
33 Yehova akatakira enyumba y’omubi,
Aliwe akatsumula enyumba y’abatunganene.
34 Kundi akasekereraya abakasekereraya,
Aliwe akakanganaya abolo b’olukogho.
35 Abandu b’amenge bakendisyahabwa olukengerwa mo kihembo,
Aliwe abakiru banzire emyatsi eyikahemula.