Hagai

2 Ekiro 21 ky’omwisi we 7, omuminyereri Hagai mwabugha ebinywa bino bya Yehova. Mwabugha ati: 2 “Kisi, ubulaye omuguvernere we Yuda, ye Zerubabeli mughala wa Salatieli, n’omuhereri mukulu, ye Yosua mughala wa Yehozadaki, n’abandi bandu uti: 3 ‘Nindi omw’inywe oyukiriho oyo walangira olukengerwa olo enyumba* eyi yabya nalo kera? Lino mukalangira yo muti? Simulangire ngoko siyikiri ngoko yabya embere?’

4 “‘Neryo lino, Zerubabeli, ubye n’akaghala,’ Yehova atya, ‘naghu iwe muhereri mukulu Yosua mughala wa Yehozadaki, ubye n’akaghala.’

“‘Nenyu, inywe bandu bosi b’omo kihugho, mubye n’akaghala,’ Yehova atya, ‘kandi mukole omubiiri.’

“‘Kundi nine haghuma nenyu,’ Yehova w’emilondo atya. 5 ‘Mwibuke ebyo nabalagha omughulu mwalua e Misri, kandi mughulu wosi ekirimu kyaghe kine omo kati-kati kenyu.* Isimwasagha.’”

6 “Kundi Yehova w’emilondo ati: ‘Kandi, hakisiya hake, ngendisyasuka-sukania olubula n’ekihugho, engetse n’ekitaka ekyumire.’

7 “‘Ngendisyasuka-sukania ebihanda byosi, neryo ebindu by’obughuli* ebikalua omo bihanda byosi bikendisyingira omo nyumba eyi; kandi ngendisyusulya omo nyumba eyi m’olukengerwa,’ Yehova w’emilondo atya.

8 “‘Efeza* ni yaghe n’ehoro ni yaghe,’ Yehova w’emilondo atya.

9 “‘Olukengerwa olo enyumba eyi ikendisyabya nalo lukendisyabya lunene kulenga olo enyumba ya kera yabya nalo,’ Yehova w’emilondo atya.

“‘Kandi ngendisyahira omo mwanya ono m’obuholo,’ Yehova w’emilondo atya.”

10 Ekiro 24 ky’omwisi we 9, omo mwaka w’akabiri w’obutabali bwa Dario, Yehova mwabwira omuminyereri Hagai ati: 11 “Yehova w’emilondo ati: ‘Kisi, ubulaye abahereri b’omwatsi ono owalebirye emighambo: 12 “Omundu amabiheka enyama nyibuyirire omo mukunyo w’olukimba lwiwe, neryo olukimba lwiwe ilwatulya oko mukati, oko kalyo akahire, oko divai, oko maghuta, kutse oko kandi kalyo kosi-kosi, akalyo ako ikanemwendibya kabuyirire?”’”

Abahereri mubamusubirya bati: “Iyehe!”

13 Neryo Hagai mwatasyabulya ati: “Omundu amabibya isyerire kundi imwakatula oko kinda, amabitula oko bindu ebyo, ibinemwendibya ebindu ebiterire?”

Abahereri mubamusubirya bati: “Ibikendibya bindu ebiterire.”

14 Neryo Hagai mwabasubirya ati: “‘Abandu aba ko bali batya, n’ekihanda eki ko kiri kitya embere syaghe,’ Yehova atya, ‘n’ebyosi ebyo bakakola ko biri bitya; obuhere bosi obo bakaniherera sibwerire.’

15 “‘Neryo lino, kisi, eritsuka munabwire mulengekanaye kutsibu* oko mwatsi ono: Embere bahire eribwe ry’oko rindi omo hekalu ya Yehova, 16 emyatsi yabya yiti? Omughulu omundu abya akaya eyiri ekilundo ky’engano akalengekania ati akendyeyayo ebipimo 20, abya akeyayo ebipimo 10 bisa; kandi omughulu abya akaya eyiri ekikamiro ky’edivai ati akayateha kuyo kw’ebipimo 50, akabya akeyayo ebipimo 20 bisa; 17 Munabahunza, munahunza ebyosi ebyo mukakola, munahunzabyo omo bukoni obukaleka ebyalya ebiri omw’irima ibyuma, omo makenge, n’omo matsuku, aliwe muhatabya n’omughuma w’okw’inywe oyukanisubira,’ Yehova atya.

18 “‘Kisi, eritsuka munabwire mulengekanaye kutsibu* oko mwatsi oyo, eritsuka ekiro 24 ky’omwisi we 9, ekiro efondasyo y’ehekalu ya Yehova yahimbawa; mulengekanaye kutsibu oko mwatsi ono: 19 Omo depo* mukine embuto? Omuti w’emizabibu, omuti w’esyotini, omuti w’amakomamanga, n’omuti w’emizeituni sibyetahetako kindu, ko bite bitya? Eritsuka munabwire, ngendibatsumula.’”

20 Yehova mwakania n’omuminyereri Hagai engendo y’akabiri ekiro 24 ky’omwisi. Mwamubwira ati: 21 “Ubwire Zerubabeli, omuguvernere we Yuda, uti: ‘Ngendisuka-sukania olubula n’ekihugho. 22 Ngenditerya ekitumbi ky’obwami ky’amami n’eribughaho akaghala k’amami w’ebihanda; ngendisyaterya omutoka n’abali mugho; neryo esyosabayiri* n’abakaghenda kusyo bakendisyawa ahisi, obuli mughuma wa kubo akendisyakwa omo muyali wa mughala wabo.’”

23 “‘Ekiro ekyo,’ Yehova w’emilondo atya, ‘ngendisyakwimya, iwe, mughombe waghe Zerubabeli, mughala wa Salatieli,’ Yehova atya, ‘ngendisyakuyira ng’embuka y’erihira oko bindu kw’akashe, kundi iwe nabirisombola,’ Yehova w’emilondo atya.”