Isaya
48 Iwe Nyumba ya Yakobo hulikirira,
Inywe mukayahula omo rina lya Israeli
Kandi inywe mwabirilua omo* maghetse wa Yuda,
Inywe mukalahiraya omo rina lya Yehova
Kandi inywe mukalakira erina ly’oMungu wa Israeli,
Nomo mutekola ekyo omo kwenene n’omo ritunganene.
2 Kusangwa bakayahula mo b’omo muyi owabuyirire
Kandi bakasonda oko Mungu wa Israeli kw’obuwatikya,
Oyo erina liwe yo Yehova w’emilondo.
3 Nabirikubwira emyatsi y’erimbere* eritsuka kera.
Muyahuluka omo buno bwaghe,
Munakuminyisyayo.
Omw’itsumbukania munayira eky’erikola, nayo muyabererera.
4 Kusangwa munaminya ngoko uwite erighundu
—Ngoko ebikya byaghu bikalire ng’omusisa w’ekyuma n’embumo yaghu ikalire ng’ekwivre—*
5 Munakubwira kera kera.
Munakwowisya omwatsi embere ahuluke,
Ukasyabugha uti, ‘Esanamu yaghe yo yakola eki;
Esanamu yaghe eyibatsire n’esanamu* yaghe y’ekyuma yo yalayira eki.’
6 Mwabiryowa n’erilangira ebyosi ebi.
Simwenditulaghaniabyo?
Eritsuka lino ngababwira emyatsi mihya-mihya,
Emyatsi eyibisamire eyo mute mwataminya.
7 Mo yamahangyikwa lino, siyahangyikawa kera,
Emyatsi eyo wabya isighuliwatowa embere sy’ekiro kya munabwire,
Ukasyabugha uti, ‘Nilue ininasiyo.’
8 Iyehe, sighuli watowayo, siwasiyo,
Kandi kera amatwi waghu abya ahumene.
Kusangwa ninasi ngoko uli w’amatebo kundu,
Kandi ukahulawa mo mukoli w’ebibi eritsuka okw’ibutwa.
9 Aliwe busana n’erina lyaghe ngendikakirya ekinigha kyaghe;
Kandi busana n’eripipwa lyaghe ngendiyikakirya,
Sinendikuhwerekererya.
10 Lebaya! Nabirikwerya, aliwe butsira ng’efeza.*
Nabirikulengako* omo maghali awali ng’omuliro w’oluhitsa.
11 Busana n’erina lyaghe, inga busana n’erina lyaghe, ngendikola eki,
Kusangwa nangatoka niti eriligha erina lyaghe litsandibawe?
Siniriha olukengerwa lwaghe lw’owosi-wosi.*
12 Yakobo unihulikirire, naghu Israeli oyo nabiribirikira.
Sindibinduka. Niri w’erimbere; kandi niri w’enduli.
13 Ebyala byaghe mubyahiraho efondasyo y’ekihugho,
N’ebyala byaghe by’amali mubyasanza ekyanya.
Ngabya nabirikirabyo bikahangana haghuma.
14 Muyihindanaye haghuma inywe bosi, muhulikirire.
Nindi omo kati-kati kabo yo watulaghanaya emyatsi eyi?
Yehova abirimwanza.
Akendisyakolera e Babiloni ngoko asondire,
N’ebyala biwe bikendisyasa erilwa n’Abakaldea.
15 Ingyuwene-wene nabiribugha, kandi nabirimubirikira.
Nabirimuleta, n’ebyo akendisyakola bikendisyatokekana.*
16 Muyitunde hakuhi naghe, muhulikirire kino.
Erilua oko na nzuko sinirinatabugha omo kumbo.*
Erilua omughulu kyahuluka nabya inineho.”
Neryo lino, Yehova Omukama Mukulu oko Bosi abirinituma, haghuma n’ekirimu kiwe.
17 Yehova, Omutongolya waghu, Omubuyirire wa Israeli akabugha ati:
“Ingye, Yehova, indi Mungu waghu,
Oyukakukangiriraya ubane endundi,*
Oyukakusondola omo nzira eyo utolere iwalabamo.
18 Nga unalyatahulikirira emighambo yaghe!
Neryo oboholo bwaghu bwangabere ng’olusi
N’eritunganene lyaghu ng’ebisunda by’engetse.
19 Abana* baghu ibakendisyabya bangyi ng’omutsanga
N’abitsikulu baghu ibakendisyabya bangyi ng’omuseghe.
Erina lyabo isiryendisyabulirana kutse erilusibwaho n’ahake embere syaghe.
20 Mulue e Babiloni!
Mutibite erilua ew’Abakaldea!
Mutule omwatsi oyo imunemwuta obwagho bw’obutseme! Mutulaghanayegho!
Muminyikalayegho erihika oko nduli sy’ekihugho.
Mubughe muti; “Yehova abirikombola omughombe wiwe ye Yakobo.
21 Omughulu asondolabo erilaba omo myanya eyikungukere, mubatakwa enyota.
Mwasenderyabo amaghetse erilua omo ribwe;
Mwatula eribwe, amaghetse amasenda n’amaka.”
22 “Sihali obuholo oko babi,” Yehova atya.