Olwimbo lwa Solomona
8 “Ko ulue ng’omughala wetu
Oyo wanyonya oko mabere wa mama waghe!
Niryendikweya ehihya n’erikuha ebizu,
Sihangabere n’oyukanipokaya.
2 Niryendikusondola,
Niryendikutwala omo nyumba ya mama waghe,
Oyo wanikangiriraya.
Niryendikuha edivai eyirimo ebindu ebikakumba ndeke utoke erinywayo
N’amaghetse awasihire awakalua omo matunda w’amakomamanga.
3 Ebyala biwe by’amalembe byangabere oko ngoto yaghe,
N’ebyala biwe by’amali byanganikumbatire.
4 Ngabalapisaya inywe bambesa be Yerusalema niti:
Isimwasonda erinibukyamo olwanzo kutse eritsotsyalo, omutima waghe isyalyanza.”
5 “Oyukasira omo mbwarara oyu nindi,
Inyanaghemere oko mwanze wiwe?”
“Mungakubukaya ighunaghotsere omo ndina y’omuti w’epome.
Eyo yo mama waghu akubutira.
Omukali oyo wakubuta, eyo yo akubutira.
6 Unihire oko mutima waghu ng’embuka eyikakolesibawa mo kashe,
Unihire oko byala baghu ng’embuka eyikakolesibawa mo kashe,
Kundi olwanzo luwite akaghala ng’oluholo,
N’omundu eryanza ati isibamuleghulako riri ngoko eyisinda* siyirilwika oyo yabirihamba.
Ekirimi ky’olwanzo kiri ng’ekirimi ky’omuliro owakaghulumira.
Ekirimi kya Yah.*
7 Amaghetse awaghungire syangalimya olwanzo.
N’esyonyusi nene-nene sisyangatoka erisendyalo.
Omundu amabibugha ati akateka obuteke bosi b’omo nyumba yiwe busana n’erighula olwanzo,
Obuteke bwiwe obo ibukendilangirwa mo bule.”*
8 “Tuwite omwali wetu mulere
Oyutewalasya ebisuna.
Neryo tukendisyamukoleraki
Omughulu bakendisyabugha bati bakamutahaya?”
9 “Amabya ini luhimbo,
Itukendimuhimbako ehileberyo hy’efeza,*
Aliwe amabya ini mulango,
Itukendimuliba omo mbagho y’omuti w’omuerezi.”
10 “Niri luhimbo,
N’amabere waghe ali ng’amanyumba mali-mali.
Neryo iyuwene anganayilangirira ngoko omutima waghe atulere.
11 Solomona abya awite eririma ry’emizabibu e Baali-hamoni.
Mwahiralyo omo byala by’abalimi.
Obuli mughuma wa kubo inyakaleta ebihande 1 000 by’efeza*
Ebyabya bikalua oko matunda w’omo ririma eryo.
12 Ninawite oko ririma ryaghe-ryaghe ry’emizabibu.
Solomona, ebihande 1 000 by’efeza ebyo, ni byaghu,
N’ebihande 200, ni by’abakatumika omo ririma ry’emizabibu eryo.”
13 “Iwe wikere omo hirima,
Abira baghu bakowa omulenge waghu.
Leka naghe nyowegho.”
14 “Uyire-yire mwanze waghe,
Utibite ng’engabi,
Ng’ekyana ky’engabi
Oko bitwa ebikalasako ebiti ebikakumba ndeke.