Ezekieli
13 Kandi ekinywa kya Yehova mukyasyanihikako, kiti: 2 “Mughala w’omundu, ubughe omo buminyereri ebikendisyahikira abaminyereri ba Israeli, kandi ubwire abakayitungira amaminyereri wabo-wabo* uti, ‘Muhulikirire ekinywa kya Yehova. 3 Yehova, Omukama Mukulu oko Bosi ati: “Obulighe oko baminyereri bakiru, abakakwama amalengekania wabo-wabo,* nibya isibetalangira kindu! 4 Iwe Israeli abaminyereri baghu babiribya ng’esyoboha esiri omo bisambukalirya. 5 Simwendisyaya eyiri emyanya eyisambukere omo syombimbo sy’amabwe muti mukatasyahimbayo eriwatikya enyumba ya Israeli, neryo e Israeli iyatoka eribya iyinimene omo malwa oko kiro kya Yehova.” 6 “Abakabugha bati, ‘Yehova mwakabugha ati,’ nikwa Yehova isyalitatumabo, babirilangira esyonzoli sy’amabehi kandi babiribugha ebinywa by’obuminyereri eby’amabehi. Kandi babirilindirira ebinywa byabo bibererere. 7 Esyonzoli esyo mwabirilangira si sy’amabehi kwehi, n’ebyo mulyabugha omo buminyereri si by’amabehi kwe omughulu mulyabugha muti, ‘Yehova mwakabugha ati,’ aliwe isinetabugha ekyosi-kyosi?”’
8 “‘Neryo Yehova, Omukama Mukulu oko Bosi ati: “‘Kusangwa mwabiribugha eby’amabehi kandi kundi esyonzoli syenyu ni sy’amabehi, nabiribya nzighu yenyu,’ Yehova Omukama Mukulu oko Bosi atya.” 9 Ebyala byaghe bikendilwa n’abaminyereri abakalangira esyonzoli sy’amabehi, n’abakaminyerera emyatsi y’amabehi. Sibendisyabya b’oko bandu abo ngabwira esyokumbo* syaghe, kutse sibendisyahandikwa omo kitabu ekihandikiremo amena w’enyumba ya Israeli; kutse sibendisyasuba omo kihugho kye Israeli; nenyu mukendisyaminya ngoko indi Yehova, Omukama Mukulu oko Bosi. 10 Ebyosi ebyo, ni busana babiriherya abandu baghe omw’ibugha bati, “Hali obuholo!” aliwe isihali obuholo. Oluhimbo olwoloberere lukabya lwahimbwa, bakahaka kulo kw’embemba.*
11 “Ubwire abakahaka kulo kw’embemba uti lukenditera. Embula nene ikendyasa, embula y’amatsuku* ikendiwa, n’ekihunga kinene kikenditeryalo. 12 N’oluhimbo lukendisyabya lwabitera bakendisyababulya bati, ‘Embemba eyo mwahaka kulo iri hayi?’
13 “Busana n’ekyo, Yehova, Omukama Mukulu oko Bosi, ati: ‘Omw’ihitana lyaghe, ngendisyaleta ebihunga ebikalire, omw’ikapikira lyaghe, ngendisyawisya embula nene kutsibu, n’omo buhitane obukatoghotaya, ngendisyawisya embula y’amatsuku.* 14 Ngendisyahimbula oluhimbo olo mwahakako embemba n’eritereryalo oko kitaka, n’esyofondasyo syalo sikendisyalangirika. Omughulu omuyi akendisyatera, mukendisyahera haghuma nagho; nenyu mukendisyaminya ngoko indi Yehova.’
15 “‘Ngendisyabya nutulira ndeke-ndeke erihitana lyaghe oko luhimbo n’oko babya bakahaka kulo kw’embemba, ngendisyababwira niti: “Oluhimbo silukiri, n’abakahaka kulo kw’embemba nabo sibakiri. 16 Abaminyereri ba Israeli sibakiri, ababya bakabugha obuminyereri busana ne Yerusalema n’erilangira esyonzoli sy’obuholo busana nayo, nibya isihali obuholo,”’ Yehova, Omukama Mukulu oko Bosi atya.
17 “Nikwa iwe, mughala w’omundu, ubinduke usamalire abambesa b’ekihanda kyaghu abakayikangirira amaminyereri wabo-wabo, ubughe omo buminyereri ebikendisyabahikira. 18 Ubwirebo uti, ‘Yehova, Omukama Mukulu oko Bosi ati; “Obulighe oko bakali abakaluka emihungyi busana n’amaboko* wosi n’ebitambara busana n’emitwe y’obunene bwosi-bwosi batoke erihigha esyongebe* sy’abandu! Mukahigha esyongebe sy’abandu baghe nikwa imwasondekania eriteya esyongebe syenyu? 19 Mukendiniyira mo mutsandirya omo bandu baghe, busana n’ekighanza ky’ebyala ky’ekisusu na busana n’ehihande-hihande hy’omukati mukiita abate bangitwa* n’erileka abatolere* erikwa, omw’iteba abandu baghe abakahulikirira amabehi wenyu?”’
20 “Neryo Yehova, Omukama Mukulu oko Bosi, ati: ‘Inywe bakali, nabiripona emihungyi yenyu, eyo mukakolesaya eritegha abandu nga ni nyunyu, kandi ngendisyalusya emihungyi eyo oko byala byenyu, n’eribalya abandu abo mukahigha ng’esyonynyu. 21 Ngendisyatulanga ebitambara byenyu, n’erilusya abandu baghe omo byala byenyu, nabo sibendisyasyabya kindu ekyo mukahamba omo buhiyi; nenyu mukendisyaminya ngoko indi Yehova. 22 Kusangwa mwabiribuna omutunganene yo mutima omo mabehi wenyu, aliwe nibya s’ingye nabya ngamwaghalya.* Kandi mwabirisikya ebyala by’omundu mubi, neryo okw’ekyo, syalibinduka erileka enzira yiwe nyibi atoke eribyaho. 23 Neryo inywe bakali, simwendisyasyalangira esyonzoli sy’amabehi kandi simwendisyasyakola obulaghu; naghe ngendisyalusya abandu baghe omo byala byenyu. Neryo mukendisyaminya ngoko indi Yehova.’”