Zefania
1 Bino by’ebinywa ebyo Yehova abwira Zefania* mughala wa Kushi, mughala wa Gedalia, mughala wa Amaria, mughala wa Hezekia, omo biro bya Yosia mughala wa Amoni, omwami we Yuda:
2 “Ngendibugha oko kitaka k’obuli kindu,” Yehova atya.
3 “Ngendibughako omundu n’enyama.
Ngendibughako esyonyunyu sy’omo kyanya n’esyosamaki sy’omo ngetse,
Ngendibughako ebindu ebikatwikalaya* n’eribughako ababi;
Ngendisyalusya abandu b’oko kitaka,” Yehova atya.
4 “Ngendikakya okuboko kwaghe nitoke eriha Yuda y’amalipizi
Nitoke eriha abikalani bosi be Yerusalema b’amalipizi,
Kandi ngendisyabugha omo mwanya ono mw’ekindu kyosi-kyosi kya Baali ekikendisyasighalira,
Ngendisyabughamo n’erina ry’abahereri b’emiungu y’ehandi n’abahereri abakaramaya esyosanamu.
5 Ngendisyabugha omo mwanya ono mw’abandu abakakukamira ebindu ebiri elubula ibane oko lutwe lw’amanyumba,
N’abandu abakakukama n’erilapa bati bakendibya bataleghula oko Yehova,
Noko ndambi eyo ibanemulapa bati bakendibya bataleghula oko Malkamu.
6 Ngendisyabughamo n’abandu abakaleka erikwama Yehova
N’abatesonda-sondaya Yehova kutse erimubulya obusondoli.”
7 Mubye bukutu embere sya Yehova Omukama Mukulu oko Bosi, kundi ekiro kya Yehova kiri hakuhi.
Yehova abiriteghekania obuhere; n’abo akendibirikira oko buhere obo, abiribayira mo babuyirire.
8 “Ekiro ky’obuhere bwa Yehova, ngendisyaha abakulu b’amalipizi
Ngendisyahagho abaghala b’omwami, n’abosi abambite esyongyimba sy’ehandi.
9 Ekiro ekyo, ngendisyaha amalipizi abosi abakasambira oko jukwaa,*
Abakusulaya omo nyumba y’omukama wabo m’obutsururu n’amabehi.
10 Ekiro ekyo,” Yehova atya,
“Emilake ikendisyowika oko Lukyo lw’Esyosamaki,
Ekiriro kikendisyowika omo Kartye k’Akabiri k’omuyi,
N’efuyo nene eyiri ng’ey’ekindu ekikatulangika ikendisyowika oko hitwa.
11 Mulire, inywe bikalani be Makteshi,*
Kundi abakomersa bosi babiritibwa,*
Abosi abakapima efeza* babiritoghotibwa.
12 Oko mughulu oyo, ngendisyasondya-sondya abandu abatatsomene omo Yerusalema omo syotala
Kandi ngendisyaha amalipizi abandu abatatsomene,* abakabugha omo mutima wabo bati:
‘Yehova syendikola ekibuya, kandi syendikola ekibi.’
13 Obuteke bwabo bukendisyapurwa n’amanyumba wabo akendisyatsandibwa.
Bakendisyahimba amanyumba, aliwe sibendisyikala mugho;
Bakendisyahera amalima w’emizabibu, aliwe sibendisyanywa oko divai eyikalua mugho.
14 Ekiro kikulu kya Yehova kiri hakuhi!
Kiri hakuhi kandi kinemwasa luba-luba kutsibu!
Efuyo y’ekiro kya Yehova ikalihire.
Ekiro ekyo, omusuda akendisyalaka.
15 Ekiro ekyo ni kiro ky’obuhitane bunene,
Ni kiro ky’obuhanya n’eky’erihangya-hangya,
Ni kiro ky’ekihunga kinene n’eky’eritsandya,
Ni kiro ky’omwirimya n’ekitemo kyakakala,
Ni kiro ky’ebitu n’eky’omwirimya munene,
16 Ni kiro ky’erihembe n’eky’omulenge w’amalwa,
Ky’erilwa n’emiyi eyo mundu ate angahikamo bweghu-bweghu n’erilwa n’ehileberyo hy’endata ehiri omo ngonde.*
17 Ngendisyaletera abandu b’obuhanya,
Neryo bakendisyaghenda ng’esyondime-time,
Kundi Yehova yo bakolera amalolo.
Omusasi wabo akendisyutibwa ng’olututu,
N’omubiri* wabo akendisyutibwa ng’ebise.
18 Efeza* yabo kutse ehoro yabo sibyendisyatoka erisabulabo omo kiro ky’erihitana rinene rya Yehova.
Kundi omuliro w’omuhwa wiwe akendisyahisya ekihugho kyosi,
Kusangwa akendisyabughaho luhanya-luhanya abikalani bosi b’oko kihugho.”