Ezekieli

18 Kandi ekinywa kya Yehova mukyasyanihikako kiti: 2 “Omusyo oyu ogho mukakolesaya omo kihugho kye Israeli akasonda eribugha atiki, ‘Abobaba bo babirirya omuzabibu owapakere, nikwa ameno w’abana wo abirigheghera’?

3 “‘Yehova, Omukama Mukulu oko Bosi ati, ‘Kwenene-kwenene ngoko niriho, simwendisyasyahula akasimo ako omo Israeli. 4 Mulebaye! Esyonafsi* syosi ni syaghe. Enafsi ya tata n’enafsi y’omughala esyosi ni syaghe. Enafsi* eyikakola erilolo yo yikendihola.

5 “‘Tubughe tuti omundu inyabya mutunganene kandi inyakola ebitunganene n’ebihikire. 6 Syalirya amahere awalyahererawa esyosanamu oko bitwa; syalihira amaha omo syosanamu esikita nye* esy’enyumba ya Israeli; syalihalaya oko mukali wa mulikyabo kutse syalighotsera n’omukali oyuli omo biro biwe by’omwisi;* 7 syalighalaya omundu wosi-wosi, aliwe nibya akasubuliraya omundu oyulimo edeni yiwe ebindu ebyo alyatsimbisaya; syaliiba omundu wosi-wosi, aliwe akaha oko kalyo kiwe kw’oyukwire enzala n’eryambalya oyuli ndumbu; 8 syalibweka busana n’endundi kutse erisaba endundi nene, aliwe akayikakiraya erikola ebituwene; akatswera omo bulingirirania omo kati-kati k’omundu na mulikyabo; 9 kandi syalileka erikwama ebihano byaghe n’emighambo yaghe atoke erikola omo butaleghula. Omundu oyuli ng’oyo, ni mutunganene kandi oko kwenene, akendisyalola embere eribyaho,’ Yehova, Omukama Mukulu oko Bosi atya.

10 “‘Aliwe tubughe tuti inyabya tata w’omwana w’obulume, omurahi kandi omwiti kutse oyukakola omughuma w’oko myatsi eyi 11 (nomo baba wiwe syetakola omwatsi wosi-wosi w’okw’eyi)—akalya amahere awalyahererawa oko syosanamu oko bitwa, akahalaya oko mukali wa mulikyabo, 12 akanubaya abali omo bwagha n’abera, akanyegha ebindu, syalisubulaya ekyo omundu alyatsimbisaya busana n’edeni, akayiketera esyosanamu esikita nye, akakola emyatsi eyikita nye, 13 akasaba endundi nene n’eribweka busana n’endundi—aho omwana oyo isyendilola embere eribyaho. Oko kwenene iniakendiitwa busana n’emyatsi yosi eyikita nye eyo abirikola. Omusasi wiwe akendisyabya oko mutwe wiwe.

14 “‘Aliwe tubughe tuti tata awite omwana w’obulume oyukalangira amalololo wosi agho tata wiwe abirikola, aliwe nomo anemulangiragho, iye syalikola emyatsi ng’eyo. 15 Syalirya amahere awalyahererawa oko syosanamu oko bitwa; syaliyiketera esyosanamu esikita nye sy’enyumba ya Israeli; syalihalaya oko mukali wa mulikyabo; 16 syalinubaya omundu wosi-wosi; syalisighala n’ekindu ekiryatsimbisibawa busana n’edeni; syaliiba ekindu kyosi-kyosi; akaha oyukwire enzala oko kalyo kiwe kandi akambalaya oyuli ndumbu; 17 akayikakiraya okw’inubya omwera; syalisondekanaya endundi nene kutse syalibweka busana n’endundi; kandi akakwama emighambo yaghe n’ebihano byaghe. Omundu ng’oyo syendisyahola busana n’erilolo lya tata wiwe. Oko kwenene akendisyalola embere eribyaho. 18 Aliwe kundi baba wiwe mwabya akanyegha, mwiba mulikyabo, n’erikola ebituwene omo kati-kati k’abandu b’ekitunga kiwe, akendisyahola busana n’erilolo liwe.

19 “‘Nikwa mukendibugha muti: “Busanaki omughala syetabyako olubanza* busana n’erilolo lya baba wiwe?” Kusangwa omwana abirikola ebyuwene n’ebitunganene, abirikwama ebihano byaghe byosi n’erikola erikwamana nabyo, oko kwenene akendisyalola embere eribyaho. 20 Enafsi* eyikakola amalolo yo ikendihola. Omwana syendisyabyako olubanza* busana n’erilolo lya baba wiwe, na baba syendisyabyako olubanza busana n’erilolo lya mughala. Eritunganene ly’omutunganene, likendisyaghanzirwa omutunganene iyuwene, n’obubi b’omubi bukendisyaghanzirwa okw’iye iyuwene-wene.

21 “‘Nikwa omundu mubi amabileka amalolo wosi agho abirikola neryo inyakwama ebihano byaghe n’erikola ebyuwene n’ebitunganene, oko kwenene akendisyalola embere eribyaho. Syendisyahola. 22 Syendisyaghanzirwa* n’erighuma ly’oko malolo agho akola. Akendisyalola embere eribyaho busana n’erikola ebitunganene.’

23 “‘Yehova, Omukama Mukulu oko Bosi ati, ‘Nganatsemera oluholo lw’omundu mubi kwehi? Sindyanza niti inyaleka esyonzira siwe neryo inyalola embere eribyaho kwehi?’

24 “‘Aliwe omutunganene amabileka eritunganene liwe neryo inyakola ebituwene,* inyakola emyatsi yosi eyikita nye eyo ababi bakakola, inyanemwendisyabyaho kwehi? Sihali omwatsi n’omughuma owatunganene ogho akola owakendisyibukwa. Akendisyahola busana n’eritendibya mutaleghula na busana n’erilolo eryo abirikola.

25 “‘Aliwe mukendibugha muti: “Enzira ya Yehova siyitunganene.” Inywe bandu b’enyumba ya Israeli, kisi muhulikirire, Enzira yaghe yo itatunganene kwehi? Esyonzira syenyu syo sitatunganene, ko bite bitya?

26 “‘Omutunganene amabileka eritunganene liwe neryo inyakola ebituwene n’erihola busana n’erikola atya, akendisyahola busana n’ekosa eyo alyakola.

27 “‘N’omundu mubi amabileka ebibi ebyo alyakola neryo inyatsuka erikola ebyuwene n’ebitunganene, akendisyateya engebe* yiwe. 28 Amabiminya n’erileka ebibi biwe byosi ebyo abirikola, oko kwenene akendisyalola embere eribyaho. Syendisyahola.

29 “‘Aliwe abandu b’enyumba ya Israeli bakendisyabugha bati: “Enzira ya Yehova siyitunganene.” Inywe bandu b’enyumba ya Israeli, enzira yaghe yo itatunganene kwehi? Esyonzira syenyu syo sitatunganene; ko bite bitya?’

30 “‘Okw’ekyo, ngendisyatswera obuli mughuma w’okw’inywe erikwamana n’esyonzira siwe, inywe bandu b’enyumba ya Israeli,’ Yehova Omukama Mukulu oko Bosi atya. ‘Mubinduke, muleke ndeke-ndeke ebibi byenyu byosi, bikasyabya kindu ekikatwikalaya ekikendibaletako olubanza.* 31 Muyilusayeko ebibi byosi ebyo mwabirikola neryo mubye* n’omutima muhya-muhya n’ekirimu kihya-kihya. Busanaki imwahola, inywe bandu b’enyumba ya Israeli?’

32 “‘Sinditsemera n’ahake oluholo lw’omundu wosi-wosi,’ Yehova Omukama Mukulu oko Bosi atya. ‘Neryo mubinduke mutoke eribyaho.’”