Emibiiri y’Abakwenda
20 Efuyo yabere yabibondera, Paulo mwabugha ati bayende abigha. Neryo mwasikyabo mutima n’erilaghabo. N’enyuma sy’aho, mwaya e Makedonia. 2 Abere abilaba omo biharo ebyo inianemubwira abaliyo ebinywa by’eribasikya mutima, mwahika e Bugiriki. 3 Mwabughayo emisi isatu. Aliwe, kundi Abayahudi babya ibabirimusohera, omughulu abya iniakisiya iningira omo bwato atoke eriya e Siria, mwayisogha erisubula, amalaba e Makedonia. 4 Bano bo baghenda naye: Sopateri mughala wa Piru owe Beroya, Aristarko na Sekundo Abanya Tesalonika, Gayo we Derbe, Timoteo na Trofimo ab’omo kiharo kye Azia. 5 Abalume abo mubatubera embere, bamayatulinda e Troa. 6 Aliwe itwe, Ekiro ky’omukati owatemo levire* kyabere kyabilaba, mutwimya obwato erilua e Filipi. Habere habihwa ebiro bitano, twamabeya e Troa. Mutwabughayo ebiro birinda (7).
7 Ekiro ky’ekwanza ky’eyenga, mutwikala haghuma tutoke erirya akalyo. Neryo kundi Paulo angaghendire omo kiro ekikwamire, mwatsuka erikania n’abosi ababyaho. Nikwa mwakania binene, amayahika n’oko medi y’ekiro inianemukania. 8 Omo kyumba ky’endata ekyo twabya tuhindenemo, mwabya esyotala nene. 9 Omughulu Paulo abya akabugha, habya omulwana oyukahulawamo Eutiko. Neryo mwayitsingirako kutsibu. Busana n’ehighotseri hinene, mwatogha oko etaje y’akasatu. Mubayamusumba iniabirihola. 10 Aliwe Paulo mwandaghala, amayighusa oko mulwana oyo n’erimwimya omo byala biwe, n’eribugha ati: “Isimwahanga-hangaya, akineho.”* 11 Enyuma sy’aho, mwahetukira omo kyumba ky’endata, amatwa omukati, n’eritsuka erirya. Mwaendelea erikania omo katambi kalebe erihika omo ngyakya-ngyakya, n’enyuma sy’aho amaghenda. 12 Neryo mubaleta omulwana oyo inianeho. Neryo abosi mubatsema* kutsibu.
13 Neryo mutwayimya obwato, twamaghenda e Aso. Eyo yo twangalabire tukayaheka Paulo omo bwato, ngoko atubwira, kundi iye abya anzire iniayayo omo bisando. 14 Neryo abere abitweya e Aso, mutwamuheka omo bwato, twamaghenda e Mitilene. 15 Ekiro ekikwamire, mutwalua aho, twamahika e Kiose. N’omo ngyakya y’ekiro ekyo, mutwayimana e Samose, kandi ekiro ekikwamire mutwahika e Mileto. 16 Paulo syabya anzire eribugha mughulu muli omo kiharo kye Azia. Neryo mwayisogha eritendilaba e Efeso. Mwaghenda luba kundi abya inianzire ekiro kikulu ky’Epentekoste ikyahika iniabirihika e Yerusalema, kyamatokekana.
17 Aliwe, abere iniane e Mileto, mwatuma omulaghe oko basyakulu be Efeso ati base. 18 Babere babihika, mwababwira ati: “Munasi ndeke-ndeke ngoko nayighendaya omo kati-kati kenyu erilua ekiro nahika omo kiharo kye Azia. 19 Munakolera Omukama ng’omukobe. Munakola nitya omw’iyikehya kutsibu, omo misonia, n’omo maligho awanihikira busana n’esyombita sy’Abayahudi. 20 Mundaleka eribakangirirya emyatsi eyangabaletera endundi n’eribakangirirya ahali abandu n’eribahubirya oko buli nyumba. 21 Munahubirya ndeke-ndeke Abayahudi n’Abagiriki niti babindule emitima n’erikwama oMungu kandi niti bikiriraye Omukama wetu Yesu. 22 Aliwe lino, kundi ekirimu kyabirinihatikana, ngaya e Yerusalema, nomo nitasi ebikendinihikira nahikayo. 23 Aliwe, ekyo nasi kya kino: omo buli muyi, ekirimu kibuyirire kinemunibwira kangyi-kangyi kiti omuliki n’eryaghalibwa binemunilinda. 24 Nomo bine bitya, sinirilangira engebe* yaghe mo y’omughaso. Eky’omughaso okw’ingye, ry’eritibita amasindano erihika oko nduli, n’eribughirira omubiiri ogho nahabawa n’Omukama Yesu, ni bugha ambu, erihubirya ndeke-ndeke engulu mbuya y’olukogho lw’oMungu.
25 Aliwe, ninasi ngoko inywe bosi, inywe nahubiraya engulu mbuya y’Obwami, simwendisyasyanilolako. 26 Munasi ndeke-ndeke ngoko siniriko olubanza lw’omusasi w’omundu wosi-wosi. 27 Kundi mundaleka eribabwira ebyosi ebyo Mungu anzire. 28 Muyiteghaye n’eriteya esyombuli* syosi sy’oMungu kundi ekirimu ky’oMungu kyabiribayiramo bimaniri* b’esyombuli esyo, mutoke eriteya endeko y’oMungu eyo aghula omo musasi w’Omughala wiwe. 29 Ninasi ngoko ngendibya nabighenda, esyoboha esikalire sikendingira omo kati-kati kenyu kandi sisyendikolera esyombuli* sy’oMungu sy’omo bolo. 30 Kandi ninasi ngoko omo kati-kati kenyu mukendisyahuluka abandu abakendisyakangirirya amakangirirya w’amabehi batoke erikura abigha bakwamebo.
31 “Neryo muteghaye mughulu wosi, kandi mwibuke ngoko omo misi isatu omo kiro n’omw’itungyi mundaleka erihana obuli mughuma w’okw’inywe ininemulira. 32 Aliwe lino, ngabaleka omo byala by’oMungu n’omo kinywa ky’olukogho lwiwe. Ekinywa ekyo kikendibahimba n’eribawatikya erisyabana omwandu ogho Mungu akaha ababuyirire bosi. 33 Mundayitsutsa efeza,* ehoro, kutse esyongyimba sy’omundu wosi-wosi. 34 Inyw’ibene-bene munasi ngoko ebyala ebi byo byaniwatikaya, ingye n’abo twabya nabo eribana ebyo twabya tulaghireko. 35 Omo myatsi yosi munabakangania ngoko twamabibya tukakola kutsibu tutya, itukenditoka eriwatikya abalaghire oko buwatikya. Kandi mubye mukibuka ebinywa by’Omukama Yesu, oyo wabugha ati: ‘Erihitya rikaletera obutseme bunene kulenga erihabwa.’”
36 Abere abibugha ebinywa ebyo, mwakukama haghuma n’abosi n’erisaba. 37 Neryo abosi mubalira kutsibu, bamakumbatira Paulo, n’erimuha ebeze, 38 kusangwa babya ibabirikwa obulighe kutsibu-tsibu kundi abya iniabiribabwira ati sibendisyasyamulolako. N’enyuma sy’aho, mubamukwamanisya, bamamukolya ahali obwato.