Ezekieli

38 Kandi ekinywa kya Yehova mukyanihikako kiti: 2 “Mughala w’omundu, uloleraye obusu bwaghu oko Gogi w’omo kihugho kya Magogi, omutabali mukulu* we Mesheki ne Tubali, neryo ubughe omo buminyereri ebikendimuhikira. 3 Ubughe uti, ‘Yehova Omukama Mukulu oko Bosi ati: “Eryo ngalwa naghu iwe Gogi, omutabali mukulu* we Mesheki ne Tubali, 4 ngendikubindungula n’erihira amarobo omo mikese yaghu, kandi ngendikuhulukya, iwe n’emilondo yaghu yosi y’abasuda, esyosabayiri syaghu n’abakaghendaya esyosabayiri, abosi abambite esyongyimba sy’olukengerwa, endeko nene y’abandu abahekire esyongabo nene-nene n’esike-sike,* abosi abakahungaya omuyali; 5 E Persia, e Etiopia, ne Puti bane haghuma nabo, abosi bahekire akangabo kake n’ekikeke; 6 e Gomeri n’abasuda bayo bosi, enyumba ya Togarma erilua omo biharo by’ehali-hali oko luhande lw’endata, haghuma n’abasuda bayo bosi—abandu bangyi kutsibu bali haghuma naghu.

7 “‘“Uyiteghekanaye, mubye imunayiteghekire, iwe n’abasuda baghu bosi abahindene haghuma naghu, naghu ukendibya mukulu* wabo.

8 “‘“Enyuma w’ebiro bingyi, ukendisyalengekanibwako.* Omo myaka y’enyuma-nyuma ukendisyabambira ekihugho ky’abandu ababirisubibwa erilua okw’itoghotibwa omo muyali, abakuma-kumirawa haghuma erilua omo bitunga bingyi n’erikuma-kumirwa oko bitwa bya Israeli ebyabya ibyabiribya matongo omo mughulu mungyi. Abikalani b’omo kihugho eki, basubulibawa erilua omo bitunga by’abandu, n’abosi bikere mbolere. 9 Ukendisyayikya kubo ng’ekihunga, kandi ukendisyaswika ekihugho ekyo ng’ebitu, iwe n’emilondo yaghu yosi y’abasuda n’abandu bangyi abali haghuma naghu.”’

10 “Yehova, Omukama Mukulu oko Bosi ati: ‘Ekiro ekyo, emyatsi mingyi ikendisyasa omo mutima waghu, naghu ukendisyaghanirya embita nyibi. 11 Ukendisyabugha uti: “Ngendibambira ekihugho ky’emiyi* eyitawite obuteya. Ngendibambira abikere buholo omo mbolere, abosi abikere omo miyi eyitateghibwe n’esyombimbo kutse emihomo, kutse esyongyo.” 12 Ngendiyayo eriyahunga n’erinyegha ebindu bingyi, eribambira emyanya eyabya matongo eyikeremo abandu lino n’abandu ababiritasyakumwa-kumwa erilua omo bihanda, abanemutunda ebindu n’obuteke, abikere omo kati-kati k’ekihugho.

13 “‘E Sheba ne Dedani, abahingania be Tarshishi haghuma n’abalwi* bayo bosi bakendisyabugha naghu bati: “Ukabambira busana n’erinyegha n’erihunga ebindu bingyi? Wabirihindania emilondo yaghu y’abasuda eriheka efeza* n’ehoro, eriyimirya ebindu n’obuteke, erinyegha ebindu bingyi?”’

14 “Neryo mughala w’omundu, ubughe obuminyereri n’eribwira Gogi uti, ‘Yehova, Omukama Mukulu oko Bosi ati: “Oko kiro ekyo, abandu baghe Abaisraeli ibanikere buholo, siwendisyaminyakyo kwe? 15 Ukendisyalua ewaghu erilua omo biharo by’ehali-hali eby’oko lunde lw’endata, iwe n’abandu bangyi haghuma naghu abosi ibali oko syosabayiri, endeko nene, omulondo munene w’absuda. 16 Ukendisyasa erilwa n’abandu baghe e Israeli ngoko ebitu bikanaswika ekihugho. Omo biro by’enduli-nduli, ngendisyakuleta erilwa n’ekihugho kyaghe, ebihanda bitoke eriniminya omughulu ngendisyayiyira mo mubuyirire erilabira iwe embere syabyo, iwe Gogi.”’

17 “Yehova, Omukama Mukulu oko Bosi ati: ‘Siwe nakanayako erilabira abaghombe baghe abaminyereri be Israeli, ababugha obuminyereri omo myaka mingyi ngoko ukendisyaletwa erilwa nabo?’

18 “Yehova, Omukama Mukulu oko Bosi ati, ‘Oko kiro ekyo, omughulu Gogi akendisyabambira ekihugho kya Israeli, erihitana lyaghe rinene likendisyaghulumira. 19 Ngendisyabugha omo muhwa waghe n’omo buhitane bwaghe obukaka ng’omuliro; n’oko kiro ekyo, omo kihugho kya Israeli mukendisyalaba omusiki munene. 20 Busana naghe, esyosamaki sy’omo ngetse, esyonyunyu sy’omo kyanya, esyonyama sy’omoli esiri omo bisuki, ebihangyikwa byosi ebikakululuka oko kitaka, ebyosi bikendisyatitimana, n’ebitwa bikendisyaghuswa ahisi, n’amandaghala akendisyatera, n’obuli luhimbo lukendisyawa oko kitaka.

21 “‘Ngendisyabirikira omuyali erilwa naye oko bitwa byaghe byosi,’ Yehova, Omukama Mukulu oko Bosi atya. Omuyali w’obuli mundu akendisyabindukira mulikyabo. 22 Ngendisyamutswera* omo kihunzo n’omo musasi eryutika; kandi ngendisyamuwisyako embula eyikalire, n’amatsuku manene, omuliro n’ekiberiti,* iye n’emilondo yiwe y’abasuda, n’abandu bangyi abali haghuma naye. 23 Kandi oko kwenene, ngendisyayihamya, ngendisyayihighula n’eriyiminyisya omo meso w’ebihanda bingyi; nabo bakendisyaminya ngoko indi Yehova.’