Ebaruha y’akabiri oko Abanya Korinto
6 Kundi tukakola haghuma n’oMungu, tukatasyabasaba tuti isimwaligha olukogho lw’oMungu n’erileka lukabya bule. 2 Kundi akabugha ati: “Oko mughulu ogho nabya ngakangania olukogho lwaghe, munakowa, n’omo kiro ky’erisabulwa, munakuwatikya.” Mulebaye! Ono w’omughulu ogho Mungu akatukanganaya olukogho lwiwe. Mulebaye! Kino ky’ekiro ky’erisabuka.
3 Situlikola ekindu kyosi-kyosi ekyangaleka omundu wosi-wosi iniatwikala, abandu bakasyabugha muhanda oko mubiiri wetu. 4 Aliwe, omo myatsi yosi tukakanganaya ngoko tuli baghombe b’oMungu. Tukakola tutya omw’iyiyinia kutsibu, omo maghali, omw’ibulirwa, omo malighe, 5 omw’ihunzwa, omw’ibohwa, omo kati-kati k’abandu abatsurumire, omw’ikola kutsibu, omw’ibula ehighotseri, omw’ibula akalyo, 6 omw’ibya n’emighendere eyerire, omw’iminya ekwenene, omw’ihanda omutima, omw’ibya n’omutima mubuya, omo kirimu kibuyirire, omo lwanzo lw’ekwenene, 7 omo binywa by’ekwenene, omo butoki bw’oMungu, omo bindu ebikatuwatikaya erikola eritunganene, ebiri omo byala by’amali,* n’ebiri omo byala by’amalembe,* 8 omo lukengerwa, n’omw’ihemuka, bangatubughako muhanda kutse ndeke. Bakatulangiramo babehi, aliwe itukabugha ekwenene. 9 Tukabya nga sitwasibwe, aliwe itunasibwe. Bakatulangira ng’abandu abakisiya ibahola,* aliwe ituneho. Nomo abandu mubatuha amalipizi, aliwe mututahola. 10 Bakatulangira ng’abandu abakaghalawa, aliwe itunatsemire mughulu wosi. Bakatulangira ng’abera, aliwe itunemuwatikya abandu bangyi eribya bateke. Bakatulangira ng’abatawite ekindu, aliwe itunawite ebindu byosi.
11 Inywe Banya Korinto, sitwetwatababisa kindu, kandi twabiribakingulira omutima wetu. 12 Situlibakanganaya olwanzo luke, aliwe inywe mukatukanganaya olwanzo luke. 13 Neryo, busana n’olwanzo olo tukabakanganaya, ngabugha nenyu ng’abana baghe, nenyu mukingule ndeke emitima yenyu.
14 Isimwakola obwira obutebo n’abandu abatikirirye. Kundi hane erihulikirirana omo kati-kati k’eritunganene n’eritatunganene? Kutse ekyakakala kikanahulikirirana n’omwirima? 15 Kutse hane erihulikirirana omo kati-kati ka Kristo na Beliali?* Kutse hane erihulikirirana omo kati-kati k’oyo wikirirye* n’oyutikirirye? 16 Kandi hane erihulikirirana omo kati-kati k’ehekalu n’esyosanamu? Kundi itwe tuli ehekalu y’oMungu oyuliho, kusangwa oMungu abiribugha ati: “Ngendisyikala omo kati-kati k’abo, n’erilendera omo kati-kati k’abo, kandi ngendisyabya oMungu wabo, nabo bakendisyabya bandu baghe.” 17 “‘Busana n’ekyo, mulwe omo kati-kati k’abo, kandi muyihighule okw’ibo,’ Yehova* atya, ‘kandi muleke eritula oko kindu ekiterire,’” “‘neryo ngendisyabakokya.’” 18 “‘Kandi ngendisyabya tata wenyu, nenyu mukendisyabya baghala na bali baghe,’ Yehova* Omutoki w’Ebyosi atya.”