Ezekieli

40 Oko mwaka we 25 w’obunyewa bwetu, oko nzuko y’omwaka oyo, ekiro kye 10 ky’omwisi, ihamabilaba emyaka 14 omuyi iniabiritera, ekiro ekyo kisa-kisa ebyala bya Yehova mubyabya okw’ingye. Neryo mwanileta omo muyi. 2 Omo syonzoli, oMungu mwanileta omo kihugho kya Israeli amanihira oko kitwa kiri. Oko kitwa ekyo kwabya obuhimbe obusosire omuyi oko luhande lw’eyikwa.

3 Omughulu aniletayo, munalangira omulume oyo erisosa liwe lyabya ng’ekwivre.* Abya awite omo byala ekamba y’ekitani n’oluseke lw’eripimamo.* Kandi abya imene omo lukyo. 4 Omulume oyo mwabugha naghe ati: “Mughala w’omundu, usamalire ndeke, uhulikirire ndeke n’eriyiteghererya ndeke* obuli kindu ekyo ngendikukangania, kusangwa ekyo kyo kiryaleka iwaletwa hano. Ubwire enyumba ya Israeli ebyosi ebyo wamalangira.”

5 Munalangira oluhimbo ilutimbire oko hekalu* kw’ehihya. Omo byala by’omulume oyo mwabya oluseke lw’amaboko 6 olw’eripimamo (oko buli kuboko, mukwatomekwa ekighanza ky’ebyala).* Neryo mwatsuka eripima oluhimbo. Obunene bw’oluhimbo bwabya luseke lughuma, n’obuli bwalo erilola endata bwabya luseke lughuma.

6 Neryo mwahika oko lukyo olutungerere oluhande lw’eyo eryuba likasira, amasamba oko bisambiro byalo. Omughulu apima akadrema k’olukyo, obughali bwako bwabya luseke lughuma, n’obughali bw’akandi kadrema bwabya lundi luseke lughuma. 7 Obuli kyumba ky’omuteya kyabya n’obuli bw’oluseke lughuma n’obughali bw’oluseke lughuma. Erilua oko kyumba ky’omuteya erihika oko kindi, habya amaboko 5. Akadrema k’olukyo hakuhi n’ebaraza y’olukyo olutungerere emwisi lwabya luseke lughuma.

8 Mwapima ebaraza y’olukyo erilolera emwisi, muyabya y’oluseke lughuma. 9 Neryo mwapima ebaraza y’olukyo. Muyabya maboko 8; kandi mwapima esyonduyi sy’oko mbande syayo, musyabya maboko abiri; n’ebaraza y’olukyo yabya oko luhande olutungerere emwisi.

10 Oko buli luhande lw’olukyo lw’eyo eryuba likasira, habya ebyumba bisatu by’omuteya. Ebyumba bisatu byosi byabya bilingirirene, n’esyonduyi sy’oko buli luhande syabya silingirirene.

11 Neryo mwapima obughali bw’obwingiriro bw’olukyo, mubwabya maboko 10; n’obutamba bw’olukyo mubwabya maboko 13.

12 Omwamya owabya atimbire oko luhimbo lukuhi embere w’ebyumba by’abateya oko mbande syosi, abya kuboko kughuma. Ebyumba by’abateya oko mbande syosi, obuli kighuma kyabya maboko 6.

13 Neryo mwapima olukyo erilua oko lutwe lw’ekyumba kighuma ky’abateya* erihika oko lutwe lw’ekindi kyumba, nalo mulwabya n’obughali bw’amaboko 25; obwingiriro bw’olukyo lughuma bwabya butungererene n’obw’olundi lukyo. 14 Neryo mwapima esyonduyi sy’oko mbande, syabya sy’obuli erilola endata obw’amaboko 60, haghuma n’esyonduyi sy’oko mbande esy’omo syongyo esitimbire oko kibugha. 15 Eritsuka embere w’obwingiriro bw’olukyo erihika embere w’ebaraza eyiri oko luhande lw’emwisi lw’olukyo, habya amaboko 50.

16 Oko byumba by’abateya n’oko syonduyi sy’esyombande syabyo, emwisi sy’olukyo oko buli luhande, kwabya amadirisa aw’ehikadre ehikaghenda hikakeha.* N’emwisi w’esyobaraza yabya amadirisa oko buli luhande. Oko nduyi sy’oko luhande, kwabya esyopitsa sy’emiti y’etende.*

17 Neryo mwanileta omo kibugha ky’ehihya. Munalangira ebyumba by’eriliramo* n’amabwe awasesire eritimba oko kiherero. Omwanya owasesire oyo abya awite ebyumba 30. 18 Omwanya w’oko luhande lw’esyongyo owasesire, abya alingirirene n’obuli bw’esyongyo—oyo wo mwanya w’eyikwa owasesire.

19 Neryo mwapima omwanya* owali omo kati-kati eritsuka embere w’olukyo lw’eyikwa erihika oko luhimbo lw’ekibugha ky’emwisi. Omwanya oyo mwabya maboko 100 oko luhande lw’eyo eryuba likasira n’oko luhande lw’endata.

20 Ekibugha ky’ehihya kyabya n’olukyo olutungerere oluhande lw’endata. Mwapima obuli bwakyo n’obughali bwakyo. 21 Oko buli luhande, kwabya ebyumba bisatu by’abateya. Esyonduyi sy’ekibugha ekyo esy’oko luhande n’ebaraza yakyo byabya n’ebipimo bighumerere n’eby’olukyo lw’erimbere. Kyabya ky’obuli bw’amaboko 50 n’obughali bw’amaboko 25. 22 Amadirisa w’ekibuga ekyo, ebaraza yakyo, n’esyopitsa syakyo sy’emiti y’etende, byabya by’ebipimo bighumerera ng’eby’olukyo lw’oko luhande lw’eyo eryuba likasira. Abandu ibakiruka ebisambiro* 7 erihika kukyo. N’ebaraza yakyo yabaya embere syabyo.

23 Omo kibugha ky’emwisi mwabya olukyo olwabya lusamalirene n’olukyo lw’oko luhande lw’endata n’olundi olusamalirene n’olukyo lw’oko luhande lw’eyo eryuba likasira. Mwapima omwanya owali omo kati-kati k’olukyo erihika oko lundi, mwabya maboko 100.

24 Neryo mwanileta oko luhande lw’eyikwa. Munalangira olukyo oko luhande lw’eyikwa. Mwapima esyonduyi sy’oko mbande sy’olukyo olo n’ebaraza yalo, byabya by’ebipimo ebilingirirene n’ebindi. 25 Oko buli luhande lw’olukyo olo n’olw’ebaraza yalo, kwabya amadirisa; abya asosire awandi madirisa. Olukyo olo lwabya lw’obuli bw’amaboko 50 n’obughali bw’amaboko 25. 26 Erihika oko lukyo olo habya ebisambiro* 7, n’ebaraza yalo yabya embere w’ebisambiro ebyo. N’oko syonduyi sy’oko mbande syalo kwabya esyopitsa sy’emiti y’etende,* enguma oko buli luhande.

27 Ekibugha ky’emwisi kyabya n’olukyo olutungerere oluhande lw’eyikwa; mwapima bwandaghala-bwandaghala eritsuka oko lukyo erihika oko lundi. Ebipimo mubyabya maboko 100. 28 Enyuma w’aho, mwanilabya omo lukyo lw’eyikwa, amanileta omo kibugha ky’emwisi; abere apima olukyo lw’oko luhande lw’eyikwa, mulwabya lw’ebipimo bighumerera n’esindi syongyo. 29 Ebyumba by’abateya eby’oko lukyo olo, esyonduyi esiri oko mbande syalo, n’ebaraza yalo, byabya n’ebipimo bighumerera ng’ebindi. Oko buli luhande lwalo n’ebaraza yalo kwabya amadirisa. Olukyo olo lwabya lw’amaboko 50 oko buli n’amaboko 25 oko bughali. 30 Esyobaraza syabya sitimbire oko mbande syosi. Syabya sy’obuli bw’amaboko 25 n’obughali bw’amaboko 5. 31 Ebaraza y’ekibugha ekyo yabya itungerere ekibugha ky’ehihya, kandi oko syonduyi sy’oko mbande syakyo kwabya esyopitsa sy’emiti y’etende.* Erihika kukyo habya ebisambiro* 8.

32 Abere aningirya omo kibugha ky’emwisi eryasira oko luhande lw’eyo eryuba rikasira, mwapima olukyo. Nalo mulwabya lw’ebipimo bighumerera ng’esindi syongyo. 33 Ebyumba by’olukyo olo eby’abateya, esyonduyi syalo sy’oko syombande, n’ebaraza yalo byabya by’ebipimo bighumerera n’ebindi. N’oko buli luhande lwalo n’ebaraza yalo kwabya amadirisa. Olukyo olo lwabya lw’obuli bw’amaboko 50 n’obughali bw’amaboko 25. 34 Ebaraza yalo yabya itungerere ekibugha ky’ehihya, kandi oko syonduyi sy’oko mbande syalo kwabya esyopitsa sy’emiti y’etende.* Erihika kukyo habya ebisambiro* 8.

35 Neryo kandi mwanileta omo lukyo lw’oko luhande lw’endata, amapimalo. Lwabya n’ebipimo bighumerera n’esindi. 36 Ebyumba byalo by’abateya, esyonduyi syalo sy’oko syombande, n’ebaraza yalo byabya ng’ebindi. Oko buli luhande lwalo kwabya amadirisa. Olukyo olo lwabya lw’obuli bw’amaboko 50 n’obughali bw’amaboko 25. 37 Esyonduyi sy’oko mbande sy’olukyo olo syabya situngerere ekibugha ky’ehihya, kandi oko syonduyi sy’oko mbande syalo kwabya esyopitsa sy’emiti y’etende.* Erihika kukyo habya ebisambiro* 8.

38 Ekyumba ky’eriliramo n’obwingiriro bwakyo byabya hakuhi n’esyonduyi sy’oko syombande sy’esyongyo, aho babya bakakerera amahere w’eryokererya.

39 Oko buli luhande lw’ebaraza y’olukyo, kwabya esyomesa ibiri sy’erikererako esyonyama sy’obuhere bw’eryokererya, obuhere bw’erilolo, n’obuhere bw’olubanza.* 40 Omo nzira eyikalola oko lukyo lw’oko luhande lw’endata, mwabya esyomesa ibiri, ehihya w’obwingiriro. Habya n’esindi mesa ibiri emwisi oko lundi luhande lw’ebaraza y’olukyo. 41 Oko buli luhande lw’olukyo kwabya esyomesa ini—esyosi haghuma syabya mesa 8—esyabya sikakererwako esyonyama sy’amahere. 42 Esyomesa ini sy’erikererako esyonyama sy’amahere w’eryokererya syabya sy’amabwe awabatsire. Syabya n’obuli bw’okuboko kughuma n’enusu, obughali bw’okuboko kughuma n’enusu n’obuli erilola endata okuboko kughuma. Esyomesa esyo syo syabya sikahirwako ebyuma by’erikeramo esyonyama sy’amahere w’eryokererya n’esy’esyohongo. 43 Ehihala hy’obughali bw’ekighanza kighuma ky’ebyala, hyabya himatikire eritimba oko syombimbo sy’emwisi; n’esiswi sy’amahere w’olusunzo isikahirawa oko syomesa.

44 Ehihya w’olukyo lw’emwisi, yabya ebyumba by’eriliramo eby’abimbi; byabya omo kibugha ky’emwisi hakuhi n’olukyo lw’endata, eritungerera oluhande lw’eyikwa. Ekindi kyumba ky’eriliramo kyabya hakuhi n’olukyo lw’oko luhande lw’eyo eryuba rikasira, eritungerera oluhande lw’endata.

45 Mwanibwira ati: “Ekyumba ky’eriliramo eki ekitungerere oluhande lw’eyikwa ni ky’abahereri abatolere erikola emibiiri mbiriri-mbiriri omo hekalu. 46 Ekyumba ky’eriliramo ekitungerere oluhande lw’endata ni ky’abahereri abakakola emibiiri y’ekiherero. Ni baghala ba Zadoki, ab’omo Balawi bo bawite omubiiri w’eriseghera hakuhi na Yehova erimukolera.”

47 Neryo mwapima n’ekibugha ky’emwisi. Kyabya ky’obuli bw’amaboko 100 n’obughali bw’amaboko 100, ikilingirirene oko mbande syosi. Ekiherero kyabya embere sy’ehekalu.

48 Neryo mwanileta omo baraza y’ehekalu. Mwapima enduyi y’ebaraza ey’oko luhande. Yabya y’amaboko atano oko luhande lughuma n’amaboko atano oko lundi luhande. Obughali bw’olukyo bwabya bw’amaboko asatu oko luhande lughuma n’amaboko asatu oko lundi luhande.

49 Ebaraza yabya y’obuli bw’amaboko 20 n’obughali bw’amaboko 11.* Abandu ibakahetukira kuyo oko bisambiro.* Habya esyonduyi oko buli ngusu, enduyi nguma oko buli luhande.