Ezekieli
43 Neryo mwanileta oko lukyo olutungerere oluhande lw’eyo eryuba rikasira. 2 Eyo, munalangira olukengerwa lw’oMungu wa Israeli lukasira oko luhande lw’eyo eryuba rikasira, n’omulenge wiwe abya ng’omulenge w’erihuha ry’amaghetse mangyi; olukengerwa lwiwe mulwakolerya ekihugho. 3 Ekyo nalangira kyabya ng’esyonzoli esyo nalangira omughulu nasa* erisyatoghotya omuyi, kandi mukyasonda eribya ng’ekyo nalangira hakuhi n’olusi lwe Kebari. Neryo munatulama oko kitaka.
4 Neryo olukengerwa lwa Yehova mulwingira omo hekalu,* lukasira omo lukyo olutungerere oluhande lw’eyo eryuba rikasira. 5 Neryo ekirimu mukyanisumbira endata, kyamanitwala omo kibugha ky’emwisi. Munalangira ehekalu iyabiryusulamo olukengerwa lwa Yehova. 6 Neryo munowa omundu akabugha naghe omo hekalu. Kandi omulume oyo mwasa, amimana aho niri. 7 Mwabugha naghe ati:
“Mughala w’omundu, ono wo mwanya w’ekitumbi kyaghe ky’obwami n’omwanya w’obulyatiro bwaghe, aho ngendisyikala omo kati-kati k’abandu ba Israeli kera na kera. Abandu b’enyumba ya Israeli sibendisyasyatsandya erina lyaghe eribuyirire, ibo n’abami babo, omo bumbalaka bwabo bw’obunya-kirimu n’omo binda by’abami babo bakahola. 8 Omughulu bahira ehidrema* hyabo hy’eyikwa hakuhi n’ehidrema hyaghe hy’eyikwa, n’ehidrema hyabo hakuhi n’ehidrema hyaghe, neryo oluhimbo lusa ilo lwabya omo kati-kati kaghe nabo, mubatsandya erina lyaghe eribuyirire omo myatsi eyikita nye eyo bakola. Neryo munatoghotyabo omw’ihitana lyaghe. 9 Neryo lino bahire hali okw’ingye obumbalaka bwabo bw’obunya-kirimu n’ebinda by’abami babo. Neryo naghe ngendiikala omo kati-kati kabo kera na kera.
10 “Naghu, iwe mughala w’omundu, ukaniraye abandu b’enyumba ya Israeli ehekalu ngoko yisosire. Neryo bakendihemuka busana n’amalolo wabo, kandi litolere ibigha emihimbire yayo.* 11 Bamabihemuka busana n’ebyosi ebyo babirikola, ighukendiminyisyabo emihimbire y’ehekalu, ngoko yitwire, esyonzira syayo sy’erihulukiramo, n’esyonzira syayo sy’eriingiriramo. Ubakanganaye ngoko ehekalu yosi yitwire, ubakanganaye n’ebihano byayo, ubakanganaye ngoko yitwire n’emighambo yayo, kandi uhandikebyo ibanalangire, batoke erisikya emihimbire* yayo n’erikwama ebihano byayo. 12 Omughambo w’ehekalu w’ono: Ekiharo kyosi eritimba oko singyi y’ekitwa, kibuyirire kutsibu. Omughambo w’ehekalu w’oyo!
13 “Ebipimo by’ekiherero, eripimwa omo maboko, bya bino (oko buli kuboko mukwatomekwa ekighanza ky’ebyala).* Eyikwa wakyo ni kuboko kughuma, n’obughali bwakyo ni kuboko kughuma. Omusike wakyo atimbireko amapambo aw’obughali bw’epa nguma y’ebyala.* Eyikwa w’ekiherero ko yiri yitya. 14 Eritsuka eyikwa w’ekiherero erilua oko kitaka erihika oko munywa w’eyikwa owatimbire kukyo, ni maboko abiri, n’obughali bw’okuboko kughuma. Erilua oko munywa muke owatimbire kukyo erihika oko munywa munene owatimbire kukyo, ni maboko ani, n’obughali bwakyo ni kuboko kughuma. 15 Eriko ly’ekiherero ni ry’obuli bw’amaboko ani erilola endata, n’amahembe ani aluire oko riko ly’ekiherero. 16 Eriko ly’ekiherero liringirirene oko syombande syosi, obuli bw’amaboko 12 n’obughali bw’amaboko 12. 17 Esyombande ini sy’eminywa eyitimbire kukyo ni sy’obuli bw’amaboko 14 n’obughali bw’amaboko 14; n’omusike owatimbire kukyo ni nusu y’okuboko, n’eyikwa wakyo ni kuboko kughuma oko mbande syosi.
“Ebisambiro* byakyo bitungerere oluhande lw’eyo eryuba rikasira.”
18 Neryo mwanibwira ati, “Mughala w’omundu, bino byo Yehova, Omukama Mukulu oko Bosi akabugha: ‘Buno bo busondoli bw’erikwama ekiherero kikakokotibwa, neryo amahere w’eryokererya iniahererwa kukyo n’omusasi iniatsatsangwa kukyo.’
19 “‘Abahereri, Abalawi ab’ekitunga kya Zadoki abakaseghera hakuhi naghe erinikukolera, litolere iwahabo enume y’ende eyikine nyilere erilua omo kihangulo, iyabya buhere bw’erilolo,’ Yehova, Omukama Mukulu oko Bosi atya. 20 ‘Litolere iwimya oko musasi wayo, iwahiragho oko mahembe ani w’ekiherero, oko syongonde* ini sy’omunywa owatimbire kukyo, n’oko musike eritimba oko mbande syosi, busana n’eryeryakyo oko rilolo n’erilihirakyo embanulo. 21 Enyuma sy’aho, litolere iwimya enume y’ende eyikine nyilere, ey’obuhere bw’erilolo, erihisiryayo omo mwanya w’oko hekalu owabirisombolwa, ehihya w’ahabuyirire. 22 Ekiro ky’akabiri, ukendisyaherera embaya eyiteko bulema mo buhere bw’erilolo; bakendisyerya oko kiherero kw’erilolo ngoko banerayakyo oko rilolo omo nume y’ende eyikine nyilere.’
23 “‘Ukendisyabya wabibugha eryerya oko kiherero kw’erilolo, ukendisyaherera enume y’ende eyikine nyilere kandi eyiteko bulema erilua omo kihangulo, n’embangale eyiteko bulema erilua omo kihyo. 24 Litolere iwaletasyo embere sya Yehova, n’abahereri litolere ibaghusa kusyo kw’omunyu n’erihererasyo Yehova mo buhere bw’eryokererya obukahisibawa obwosi. 25 Omo biro 7 ukendisyaherera embaya mo buhere bw’erilolo bw’obuli kiro, haghuma n’enume y’ende eyikine nyilere erilua omo kihangulo, n’embangale erilua omo kihyo; litolere iwaherera esyonyama esiteko bulema.* 26 Batolere ibalihira ekiherero ky’embanulo omo biro 7, kandi litolere iberyakyo n’erisingyikakyo. 27 Ebiro ebyo byabihwa, oko kiro kye 8 n’erilola embere, abahereri bakendisyaherera oko kiherero amahere wenyu* w’eryokererya awakahererawa awosi n’amahere w’obuholo; neryo ngendisyabatsemera,’ Yehova, Omukama Mukulu oko Bosi atya.”