Ebaruha y’erimbere oko Abanya Korinto

8 Lino ngabahandikira busana n’akalyo ako abandu bakaherera esyosanamu. Itwe bosi tunasi omwatsi oyo. Eriminya emyatsi mingyi rikaleta emiyiheko. Aliwe, olwanzo lukahimba abandi. 2 Omundu mulebe amalengekania ati asi omwatsi mulebe wo ndeke, isyalyaminyagho ngoko ritolere eriminyagho. 3 Omundu amabya inianzire oMungu, oMungu naye amwasi.

4 Twasi kino oko mwatsi w’erirya akalyo ako abandu bakaherera esyosanamu: Esanamu si mungu, kandi hali oMungu mughuma musa. 5 Hane abakahulawamo miungu, elubula n’oko kihugho. Ni kwenene, hali emiungu mingyi n’abakama bangyi. 6 Aliwe, twasi ngoko hali oMungu mughuma musa ye Tata. Ebindu byosi byahangyikawa naye. Kandi tuliho busana naye. Kandi twasi ngoko hali Omukama mughuma musa, ye Yesu Kristo. Ebindu byosi byahangyikawa erilabira iye kandi tuliho erilabira iye.

7 Aliwe, abandu bosi sibasi omwatsi oyo. Kera, abandi babya ibakaramaya esyosanamu. Neryo omughulu bakalya akalyo akalyahererawa esanamu, bakibuka ngoko kalyahererawa esanamu. Neryo obunya-mutima* bwabo bukabakenderaya kundi sibuwatire. 8 Aliwe, akalyo sikangaleka itwabya bira b’oMungu. Twamatendiryako, isitwataherya kindu. Kandi twamalyako, sibughambu twamuwana kulenga ngoko tulwe. 9 Muyiteghaye, obwiranda bwenyu bw’erisombola isibwatwikalaya abali n’obunya-mutima* obutawatire. 10 Munasi ngoko esyosanamu ni bule. Aliwe, omundu oyuli n’obunya-mutima* obutawatire anganabalangira imunemulya akalyo omo hekalu eyirimo esanamu. Ekyo kyanganaleka iye inialya akalyo akalyahererawa esyosanamu. 11 Nomo munasi ngoko si kosa erirya akalyo ako, mukatsandaya obwikirirya bw’omundu oyuwite obunya-mutima* obutawatire. Wibuke ngoko ni mulikyenyu oyo Kristo aholera. 12 Omughulu ukakosera omulikyenyu yo utya n’erihutalya obunya-mutima* bwiwe obutawatire, aho ukabya iwamakosera Kristo. 13 Busana n’ekyo, sinendisyasyalya enyama ekyo ngalya kyamabya ikyo kikenditsandya obwikirirya bw’omughala wetu. Sinendikola ekindu kyosi-kyosi ekyangatsandya obwikirirya bw’omughala wetu.