Ebaruha y’akabiri ya Petro
1 Ebaruha eno ikalua oko Simoni Petro, omukobe n’omukwenda wa Yesu Kristo. Ngatumirayo abali n’obwikirirya bw’obughuli ng’obwetu.* Tuwite obwikirirya obo kundi oMungu wetu n’Omusabuli wetu Yesu Kristo batunganene.
2 Mubye n’olukogho n’obuholo bunene, kundi mwasi oMungu na Yesu Omukama wetu bo ndeke-ndeke, 3 kundi oMungu busana n’akaghala kiwe, abirituha ebindu byosi ebikaleka itwabya n’engebe n’erimakirira oMungu kusangwa tunasi Oyo watubirikira. Iye ni w’olukengerwa kandi ali n’emibere mibuya. 4 Erilabira emyatsi eyo, abiritulagha emyatsi y’obughuli kandi eyuwene kutsibu, kusudi ibawatikaye eribya n’emibere eyiri ng’ey’oMungu, kundi mwabirighana emyatsi mibi y’ekihugho, eyikakolawa busana n’esyongumbu nyibi.
5 Neryo busana n’ekyo, mukole ekyosi-kyosi ekyo mwangatoka eritomeka oko bwikirirya bwenyu emibere mibuya. Oko mibere mibuya, mutomeke kw’eriminya ekwenene. 6 Okw’iminya ekwenene, mutomekeko eriyikakirya. Okw’iyikakirya, mutomekeko eriyiyinia. Okw’iyiyinia, mutomekeko erimakirira oMungu. 7 Okw’imakirira oMungu, mutomekeko olwanzo lw’abasubeneko, n’oko lwanzo lw’abasubeneko, mutomekeko olwanzo. 8 Kundi emyatsi eyo yamabya omw’inywe n’eribusulamo, imukendikolesya emyatsi y’ekwenene eyo mwabirigha oko Mukama n’Omusabuli wetu Yesu Kristo. Neryo isimwendibya baghata, kutse ng’omuti owatehetaya amatunda.
9 Aliwe, oyutawite emyatsi eyo ni ndimetime eyikaliba ameso ikasyalangira ekyakakala,* kandi akibirirawa ngoko mw’eribwako amalolo wa kera. 10 Neryo baghala betu, kundi mwabiribirikirwa n’erisombolwa n’oMungu, muyikase kutsibu eritolera emyatsi eyo. Mwamatendileka erikola mutya, isimwendisyatera n’ahake. 11 Oko kwenene, mwamakola mutya, imukendisyahabwa emiyisa minene y’eringira omo bwami bwa kera na kera bw’Omukama n’Omusabuli wetu Yesu Kristo.
12 Busana n’ekyo, nanzire inabya ngabibukya emyatsi eyi, nomo munasiyo kandi nomo mwabirihanda emirihi omo kwenene, eyiri omw’inywe. 13 Aliwe, ngalangira ikyuwene eribya ngabibukya emyatsi eyo omughulu wosi ogho ngasyabya inikine omo hema* eno, 14 kundi ninasi ngoko hakisiya hake ibanilusyako ehema eno, ngoko Mukama wetu Yesu Kristo alyanibwira. 15 Ngendibya ngakola ekyosi-kyosi ekyo nangatoka, neryo ngendibya nabighenda, imwabya mukibuka* emyatsi eyo.
16 Omughulu twabaminyisaya akaghala n’eribyaho ry’Omukama wetu Yesu Kristo, mututakolesya emyatsi y’amabehi eyo abandu bakayitungira. Aliwe, mutwabakanirya oko lukengerwa lw’Omukama olo twayilangirira. 17 Kundi OMungu Tata mwamuha obusike n’olukengerwa omughulu abugha ebinywa bino oko Yesu omo lukengerwa lunene: “Oyu ni Mughala waghe, omwanzwa, oyo nabiriligha.” 18 Oko kwenene, ebinywa ebyo, itwe mutwowabyo bikalua elubula omughulu twabya haghuma naye oko kitwa kibuyirire.
19 Neryo ekyo kikaleka itwikirirya ndeke-ndeke ngoko amaminyereri ni w’ekwenene. Nenyu mukayira ndeke erikwamagho kundi ali ng’etala eyikakoleraya ahali omwirima (erihika omughulu bukendikya n’erihika omughulu engununu y’omo tututu ikendisyalangirika) omo mitima yenyu. 20 Kundi embere sy’ebyosi, munasi ngoko sihali obuminyereri obuli omo Masako obukalua omo malengekania w’abandu. 21 Kundi obuminyereri sibulilua oko bandu. Aliwe, abandu mubabugha ebinywa by’oMungu bakasondolwa* n’ekirimu kibuyirire.