Ebaruha y’erimbere oko Abanya Tesalonika

1 Ebaruha eno ikalua oko Paulo, Silvano* na Timoteo. Ngatumirayo endeko y’Abanya Tesalonika eyiri omo bughuma n’oMungu Tata n’Omukama Yesu Kristo.

Olukogho n’obuholo bibye haghuma nenyu.

2 Tukabya itunemusima oMungu omughulu tukabasabira inywe bosi, 3 kundi tukabya itunemwibuka omubiiri ogho mukakola busana n’obwikirirya, kandi ogho mukayikasa erikola busana n’olwanzo. Kandi tukabya itunibukire ngoko mukayiyinaya busana n’eriyiketera Omukama wetu Yesu Kristo embere sy’oMungu wetu na Tata. 4 Baghala betu abanzirwe n’oMungu, tunasi ngoko oMungu yo wabasombola, 5 kundi engulu mbuya eyo twahubiraya, mututahubiryayo omo binywa bisa, aliwe omo kaghala, omo butoki bw’ekirimu kibuyirire kandi itunikirirye kundu ebyo tukabugha. Munasi ngoko twayighendaya omughulu twabya ewenyu busana n’eribawatikya. 6 Kandi mwabirikwama emibere yetu n’ey’Omukama, kundi mwabiriligha ekinywa ky’oMungu n’obutseme obukalua oko kirimu kibuyirire, nomo mwanalola oko maligho mangyi. 7 Busana n’ekyo, mwabiribya eky’erileberyako ekyuwene oko bosi abikirirye be Makedonia ne Akaya.

8 Mumutahubirya ekinywa kya Yehova* e Makedonia ne Akaya hasa. Aliwe, mumwahubiryakyo ehosi-hosi. Ehosi-hosi abandu babiriminya ngoko mwikirirye oMungu, neryo situkiwite eky’eribugha. 9 Kundi abandu ibibene-bene bakabya ibanemukania ngoko twasungana nenyu engendo y’erimbere. Kandi bakabya ibanemukania ngoko mumwaleka esyosanamu syenyu mutoke eribya baghombe b’oMungu oyuliho n’ow’ekwenene, 10 n’erilinda Omughala w’oMungu akalua elubula oyo Mungu alubukaya, ni bugha ambu, Yesu, oyukendisyatusabula tukasyabana amalipizi agho oMungu akendisyaha abandu.