Ebaruha oko Abanya Galatia
1 Ebaruha eno ikalua oko Paulo, omukwenda oyutasombolawa n’omundu, aliwe oyo wasombolawa na Yesu Kristo n’oMungu Tata, oyo wamulubukaya. 2 Ingye n’abalikyetu bosi abali haghuma naghe twamaramukya abali omo syondeko sye Galatia.
3 Olukogho n’obuholo bw’oMungu Tata wetu n’Omukama wetu Yesu Kristo bibye haghuma nenyu. 4 Yesu Kristo mwayiherera busana n’amalolo wetu atoke eritusabula omo kihugho kino kibi* erikwamana n’erisonda ry’oMungu na Tata wetu. 5 OMungu ahabawe olukengerwa kera na kera. Amina.
6 Nabirisweka kundi mwabirilw’imwaleka erikwama oyo wababirikira erilabira olukogho lwa Kristo, nikwa mwabirikwama eyindi ngulu mbuya. 7 Si bugha ambu hali eyindi ngulu mbuya, aliwe hane abakabadunga, kandi abanzire erihengemya engulu mbuya eyilebirye Kristo. 8 Nomo angabya ini mughuma w’okw’itwe kutse omumalaika w’elubula amabibahubirya engulu mbuya eyitasosire engulu mbuya eyo twabahubiraya, atakirawe. 9 Ngoko tulue itwamabibugha oho mbere, ngatasyasubamo niti: Omundu amabibahubirya engulu mbuya eyitasosire eyo mwaligha, atakirawe.
10 Mukalengekanaya muti ngasonda eritsemesya abandu kutse ngasonda eritsemesya oMungu? Namabya ingasonda eritsemesya abandu, isiniri mughombe wa Kristo. 11 Baghala betu, nanzire imwaminya ngoko engulu mbuya eyo nabahubiraya muyitalua oko bandu. 12 Sinahabawayo n’omundu, kandi sinakangiriribawayo. Aliwe, Yesu Kristo yo wanibisulirayo.
13 Ni kwenene mwabiryowa emibere eyo nabya nayo omo Kiyahudi. Mumwowa ngoko nabya ngaghalya kutsibu endeko y’oMungu, n’erisonda eribugha yoho. 14 Nabya w’embere-mbere omo Kiyahudi kulenga abangyi b’emyaka yaghe, ab’omo kihanda kyaghe, kundi nabya ngakwama n’omuhwa munene easili y’abobaba waghe. 15 Aliwe, omughulu oMungu oyo wanilusaya omo nda ya mama waghe n’oyo wanibirikira busana n’olukogho lwiwe mwalangira ikyuwene 16 erinikolesya busana n’eribisula Omughala wiwe, neryo inatoka erihubirya engulu mbuya eyilebirye Yesu oko bihanda, munitabulya mundu.* 17 Kandi munitaya e Yerusalema eyiri ababya bakwenda embere syaghe. Aliwe, munaya e Arabia, n’enyuma sy’aho munasuba e Damasko.
18 Muhabya habihwa emyaka isatu, munaghenda e Yerusalema eriyabana Kefa.* Munabugha naye ebiro 15. 19 Aliwe, mundalola oko bandi bakwenda. Oyo nalolako nina Yakobo musa, mughala wabo Mukama. 20 Embere sy’oMungu, ngababwira ngoko emyatsi eyo ngabahandikira si mabehi.
21 Enyuma sy’aho, munaghenda omo biharo bye Siria, ne Kilikia. 22 Aliwe, ababya omo syondeko sye Yudea esiri omo bughuma na Kristo babya isibaniasi. 23 Omwatsi ono musa wo babya babeghere eryowa: “Omulume oyo wabya akatwaghalya kera, lino anemuhubirya engulu mbuya eyilebirye obwikirirya obo abya akasonda eribughaho.” 24 Neryo mubatsuka eripipa oMungu busana naghe.