Ebaruha oko Abaebrania
2 Busana n’ekyo, ritolere itwakwama ndeke emyatsi eyo twabiryowa. Tukole tutya kulenga ngoko twabya tubeghere erikola, tukasyahera oko nzira. 2 Kundi ekinywa ekyabughawa n’abamalaika kyamabya ikyabya ky’ekwenene, n’obuli mundu oyukakola ekibi n’oyutyowa amabya imwahabwa amalipizi erikwamana n’eritunganene, 3 tukendisyabala tuti twamatenditsomana omulamo mungaha n’oyu? Kundi Omukama wetu yo watsuka erihubirya omulamo oyo, n’abamwowa akahubirya bo batukaniraya oko mwatsi oyo. 4 OMungu naye mwakangania ngoko ni kwenene erilabira ebitiko-tiko, emyatsi eyikaswekaya, emyatsi mbiriri-mbiriri y’obutoki, n’erilabira ekirimu kiwe kibuyirire, ekyo akaha abandu ngoko anzire.
5 Kundi si b’abamalaika bo Mungu abwira ati bakendisyatabala ekihugho ky’omughulu ow’akasa, ekyo tukakanayako. 6 Omundu mulebe mwabugha ati: “Omundu nindi utoke erimulengekaniako? Kutse omwana w’omundu nindi utoke erimutsomana? 7 Muwamuyiramo muke hake kulenga abamalaika, muwamwambalya embita y’olukengerwa n’obusike, muwamuyiramo mutabali w’ebindu ebyo wakola. 8 Wabirimuyiramo mutabali w’ebindu byosi.” Omughulu oMungu amuyiramo mutabali w’ebindu byosi, mwatasigha n’ekindu n’ekighuma ekyo ate angatabala. Aliwe lino, sitwetwalangira ng’anemutabala ebindu byosi. 9 Nikwa tunemulangira ngoko Yesu, oyo wayirawamo muke hake oko bamalaika, abiryambalibwa embita y’olukengerwa n’obusike kundi mwahola. Mwaholera obuli mundu busana n’olukogho lw’oMungu.
10 Oyo ebindu byosi biriho busana naye, n’oyo wahangyikabyo abya inianemuleta abaghala bangyi b’oko lukengerwa. Neryo kyabya kitolere iniayira Omusondoli Mukulu oyukatwalabo oko mulamo mo mundu oyuhika-hikene erilabira eryaghalwa. 11 Kundi oyukabayiramo babuyirire n’abanemuyirwamo babuyirire, abosi bawite tata mughuma. Busana n’ekyo, syalikwa esisoni eribahulamo baghala babo, 12 omughulu akabugha ati: “Ngendisyabwira abaghala betu b’erina ryaghu. Omo kati-kati k’endeko, ngendisyakupipa omo syonyimbo.” 13 Kandi ati: “Ngendisyayiketera iwe.” Kandi ati: “Ingye n’abana balere, abo Yehova* abirimba.”
14 Neryo kundi abana balere ni bandu b’omubiri n’omusasi, kutya naye mwabya mundu w’omubiri n’omusasi. Mwakola atya kusudi erilabira oluholo lwiwe, atoke eribughaho oyuli n’obutoki bw’erileta oluholo, ni bugha ambu, Diabolo. 15 Kandi mwakola atya kusudi abohole abosi, abo erisagha oluholo, ryabiribayiramo bakobe omo ngebe yabo yosi. 16 Oko kwenene, si b’abamalaika bo akawatikaya. Aliwe, akawatikaya abana* ba Abrahamu. 17 Neryo kyabya kitolere iniabya ng’abaghala babo omo myatsi yosi. Ekyo kyangalekire iniabya muhereri mukulu oyukaghanyira, kandi mutaleghula omo mubiiri w’oMungu, atoke eriherera obuhere bw’eribughaho erilolo* busana n’amalolo w’abandu. 18 Kundi iyuwene-wene mwaghalwa omughulu alengawako, anganatoka eriwatikya abakalengawako.