Ebaruha oko Abaebrania
3 Neryo baghala betu babuyirire, inywe mwabirikirawa eriya elubula, muhire amalengekania wenyu oko oyo twasimo mukwenda n’omuhereri mukulu, ye Yesu. 2 Abya mutaleghula oko oyo wamusombola, ngoko Musa naye abya mutaleghula omo nyumba yosi y’oMungu. 3 Kundi Yesu mwalangirika iniatolere erihabwa olukengerwa kulenga Musa, kusangwa oyukahimba enyumba akasikibawa kulenga enyumba eyo akahimba. 4 Obuli nyumba ikahimbawa n’omundu, n’oyo wahimba ebindu byosi ni Mungu. 5 Musa abya mutaleghula omughulu abya akakolera omo nyumba yosi y’oMungu, n’omubiiri wiwe abya akakangania emyatsi eyangabughirwe enyuma sy’aho. 6 Aliwe Kristo, Omughala, abya mutaleghula akimanira enyumba y’oMungu. Tuli nyumba y’oMungu twamatendileka eribya tukabugha butsir’isagha, kandi twamamakirira amaha wetu awakaleka itwayihalamba erihika oko nduli.
7 Neryo ngoko ekirimu kibuyirire kikabugha: “Munabwire, mwamowa omulenge wiwe, 8 isimwakalaya emitima yenyu ng’ekiro ekyo abotata-kulu wenyu banihitanaya kutsibu, ng’ekiro banilengako omo mbwarara, 9 eyo abotata-kulu wenyu banilengako nomo banabya bakalangira ebyo nabya ngakola omo myaka 40. 10 Neryo munapona ekizazi* ekyo n’eribugha niti: ‘Emitima yabo siyirikwama ebyo ngabugha, kandi sibalibataminya esyonzira syaghe.’ 11 Neryo munalapa ininahitene niti: ‘Sibendisyingira omw’iluhuka ryaghe.’”
12 Baghala betu, muyiteghaye omo kati-kati kenyu mukasyabya omundu oyukayilusaya oko Mungu oyuliho, busana n’eribya n’omutima mubi owate n’obwikirirya. 13 Aliwe, mubye mukasubania mutima obuli kiro, ekiro kya munabwire isikyekyalaba, kusudi omw’inywe simubye mundu oyo omutima wiwe abirikala-kala busana n’obutoki bw’erilolo obukateba omundu. 14 Kundi tukendisyabana ebyo Kristo abiribana twamabimakirira erihika oko nduli eriyiketera eryo twabya naryo oko mwanzo. 15 Ngoko Amasako akabugha ati: “Munabwire, mwamowa omulenge wiwe, isimwakalaya emitima yenyu ng’ekiro ekyo abotata-kulu wenyu banihitanaya kutsibu.”
16 Abahi bo bowa neryo bamamuhitania kutsibu? B’abosi abalua e Misri bakasondolwa na Musa, ko bite bitya? 17 Kandi ni bahi b’oMungu apona omo myaka 40? B’abosi abakola malolo, abaholera omo mbwarara, ko bite bitya? 18 Kandi ni bahi bo baleka inialapa ati sibendisyingira omw’iluhuka riwe? B’abosi abatowa, ko bite bitya? 19 Neryo twamalangira ngoko mubatingira busana n’eribula obwikirirya.