Eribisulirwa eryo Yohana ahabawa

21 Neryo munalangira olubula luhya-luhya n’ekihugho kihya-kihya; kundi olubula lwa kera n’ekihugho kya kera byabya isibikiriho, n’engetse isiyikiriho. 2 Kutya munalangira omuyi owabuyirire, e Yerusalema Nyihya-Nyihya, ikakima erilua elubula ew’oMungu. Kandi yabya iyabiriteghekanibwa ng’omulunga oyo wabiriyipamba busana n’omulume wiwe. 3 Neryo munowa omulenge muli akalua omo kitumbi ky’obwami. Mwabugha ati: “Ehema y’oMungu yiri haghuma n’abandu, kandi oMungu akendisyikala haghuma nabo, nabo bakendisyabya bandu biwe. Kandi oMungu iyuwene-wene akendisyabya haghuma nabo. 4 Kandi akendisyasangula emisonia yosi omo meso wabo, kandi oluholo silwendisyasyabyaho, sihendisyasyabya ekiriro, erisimba, kutse obulumi sibwendisyasyabyaho. Emyatsi ya kera yabirilaba.”

5 Kandi oyo wabya wikere oko kitumbi ky’obwami mwabugha ati: “Ngayira emyatsi yosi mo mihya-mihya.” Kandi mwatasyabugha ati: “Handika, kundi ebinywa ebi ni by’eriyiketera kandi ni by’ekwenene.” 6 Kandi mwanibwira ati: “Byamabibererera! Ingye niri Alfa na Omega,* enzuko n’enduli. Obuli mundu oyukwire enyota ngendisyamuha amaghetse wo bule,* amaghetse awakatehawa oko ngununuko y’amaghetse w’engebe. 7 Obuli mundu oyukendisyasinga akendisyahabwa ebindu ebi mo mwandu, kandi ngendisyabya oMungu wiwe, naye akendisyabya mughala waghe. 8 Aliwe, abuba, abatikirirye, abakita esyonye busana n’omutsafu wabo, abiti, abakakola oburaghane,* abakakola emyatsi y’obukumu, abakaramaya esyosanamu, n’ababehi bosi, bakendisyaghuswa omo ngetse y’omuliro n’esufre.* Engetse eyo yikasosekanaya oluholo lw’akabiri.”

9 Omughuma w’oko bamalaika irinda (7) ababya n’ebibakuli* irinda, ebyabya byoswiremo ebihunzo irinda by’omwiso mwasa n’erinibwira ati: “Asa, ngendikukangania omulunga, omukali w’Ekyana ky’Embuli.” 10 Neryo mwaniheka omo butoki bw’ekirimu n’erinitwala oko kitwa kinene kandi ekiri. Kandi mwanikangania omuyi owabuyirire, e Yerusalema, owabya akakima erilua elubula ew’oMungu. 11 Omuyi oyo abya akakangabasania busana n’olukengerwa lw’oMungu. Abya akakangabasania ng’eribwe ry’obughuli bunene kutsibu, ng’eribwe ry’eyaspi erikakangabasanaya ng’ekristale. 12 Abya atimbireko oluhimbo lunene kandi luli. Oko luhimbo olo kwabya emilango 12, n’oko milango eyo kwabya bamalaika 12, n’oko milango eyo kwabya kuhandikire amena w’ebihanda 12 w’abana be Israeli. 13 Oko luhande lw’eyo ryuba rikasira* lw’omuyi oyo kwabya emilango isatu, n’oko luhande lw’endata kwabya emilango isatu, n’oko luhande lw’eyikwa kwabya emilango isatu, n’oko luhande lw’eyo ryuba rikalengera kwabya emilango isatu. 14 Oluhimbo olwabya lutimbire oko muyi lwabya n’amabwe 12. Oko fondasyo yalo, n’oko mabwe ayo kwabya amena 12 w’abakwenda 12 b’Ekyana ky’Embuli.

15 Oyo wabya akabugha naghe abya inianawite oko luseke lw’ehoro lw’eripimamo atoke eripima omuyi, emilango, n’oluhimbo lwagho. 16 Omuyi oyo abya n’esyombande ini esilingirirene. Obuli bwagho bwabya bulingirirene n’obughali* bwagho. Neryo mwapima omuyi oyo omo luseke. Omuyi oyo mwaluamo esyostadia* 12 000. Obuli bwagho, obughali bwagho, n’obuli bwagho eriya endata bwabya bulingirirene. 17 Mwapima n’oluhimbo. Mulwaluamo amaboko 144,* erikwamana n’ekipimo ky’omundu ekilingene n’ekipimo ky’omumalaika. 18 Oluhimbo lw’omuyi oyo lwabya luhimbire omo mabwe w’eyaspi. N’omuyi oyo abya iniahimbire omo horo ey’erire, eyiri ng’ekiyo ekihenirye. 19 Esyofondasyo sy’omuyi syabya sipambirwe omo buli muhanda w’amabwe w’obughuli: Efondasyo y’erimbere yabya ihimbire omo ribwe ry’eyaspi, ey’akabiri omo yakuti, ey’akasatu omo kalkedoni, ey’akani omo zumaridi, 20 ey’akatano omo sardoni, ey’endatu (6) omo sardio, ey’eririnda (7) omo krizolito, ey’omunani omo beroli, ey’omwenda (9) omo topazi, ey’erikumi omo krisopraso, eye 11 omo hayasinti, n’eye 12 omo almetisto. 21 N’emilango 12 yabya esyolulu* 12. Obuli mulango abya iniakokotibwe omo lulu nguma, n’endaki nene y’omuyi yabya ikokotibwe omo horo ey’erire, kandi yabya ng’ekiyo ekikalabamo ameso.

22 Munitalangira ehekalu omo muyi oyo, kundi Yehova* Mungu, Omutoki w’Ebyosi yo hekalu y’omuyi oyo, n’Ekyana ky’Embuli kutya. 23 Kandi omuyi oyo syalaghire oko kyakakala ky’eryuba kutse ky’omughenda, kundi olukengerwa lw’oMungu lukakolerayagho, n’etala y’omuyi oyo ky’Ekyana ky’Embuli. 24 N’ekyakakala kyagho kikendisyakolerya enzira eyo bihanda bikalabamo, n’abami b’ekihugho bakendisyaletamo olukengerwa lwabo. 25 Emilango y’omuyi oyo siyendisyabya yikakingwa omo musibo wosi, kundi omo muyi oyo sibwendisyabya bukira. 26 Kandi bakendisyaletamo olukengerwa n’obusike bw’ebihanda. 27 Aliwe, ekyosi-kyosi ekiterire, abosi abakakola emyatsi eyikita esyonye, n’eribugha amabehi sibendisyingira mugho n’ahake. Abo mena wabo ahandikire omo kitabu ky’erilinga ky’engebe ky’Ekyana ky’Embuli, abo basa bo bakendisyingiramo.