Isaya
33 Obulighe okw’iwe iwe ukaheraya, iwe ute waheribwa;
Iwe oyukahotera, iwe utewahoterwa!
Ukendisyabya wabugha eriherya, naghu ukendisyaheribwa.
Ukendisyabya wabugha erihotera, naghu iwahoterwa.
2 Yehova, utukanganaye olukogho.
Iwe maha wetu.
Obuli tututu ubye kaghala* ketu,
Inga, omulamo wetu omo mughulu w’amalighe.
3 Ebitunga by’andu bikatibita busana n’emilenge y’olukanda,
Ukabya wahangana, ebihanda bikapanzikana.
4 Ngoko esyongyike esikalya ng’omuliro sikanakuma-kuma,
Ebindu byaghu by’erinyegha, ko binemwendisyakumwa-kumwa bitya;
Abandu bakendisyayikya kubyo ng’eritu ly’esyongyike.
5 Yehova akendihamibwa,
Kusangwa ikere endata kutsibu.
Akendisyusulya omo Sioni mw’obulingirirania n’eritunganene.
6 Yukaleka emighulu yaghu iyasika;
Omulamo munene, amenge, eriminya, n’eryubaha Yehova
—Obu bo buteke bwiwe.
7 Lebaya! Esyombangyi syabo sikalakira omo nzira
Abatumwa b’obuholo bakayikaya oko kiriro.
8 Esyonzira nene-nene syabirisuna;
Sihakiri oyukalaba omo syonzira.
9 Ekihugho kikalira* n’eryuma.
E Lebanoni ihemukire; yabirihonda.
E Sharoni yabiribya ng’embwarara,
Ne Basahani ne Karmeli bikalaghalaya ebiti byabyo.
10 “Lino ngendihangana,” Yehova atya,
“Lino ngendiyihamya;
Lino ngendiyiha olukengerwa.
11 Mukaheka ebiti ebyumire mo bukule imwabuta ebiti ebyumire.
Ekirimu kyenyu inyw’ibene-bene kikendibatimya ng’omuliro.
12 N’ebitunga by’abandu bikendisyabya ng’embemba eyabirihisibwa.
Bakendisyahisibwa omo muliro ng’amahwa awabiritwibwa.
13 Inywe muli hali muhulikirire ekyo ngendikola!
Nenyu inywe muli hakuhi, mulighe ngoko niwite akaghala!
14 Abakola-nabi abali e Sioni babiryubaha;
Erititimana ryabirihamba abatekenga oMungu:
‘Nindi okw’itwe yo wangikala ahali omuliro owakahisaya?
Nindi okw’itwe yo wangikala n’ebirimi ebitelima?’
15 Oyukalendera omo ritunganene butsira eryumbya,
Oyukabugha eky’ekwenene,
Oyukaghana endundi eyite y’ekwenene n’ey’amatebo,
Oyo ebyala biwe bikaghana ekyutuliro omo mwanya w’erihambakyo,
Oyukaliba amatwi wiwe syowe omwatsi w’eryuta omusasi,
N’oyukaliba ameso wiwe syalangire ekibi
16 —Akendisyikala endata;
Obusayiro bwiwe obusikire* bukendisyabya ahakongotere h’olukuka,
Akendisyahabwa akalyo kiwe,
N’amaghetse wiwe syendisyabula.”
17 Ameso waghu akendisyalangira omwami omw’ikangabasania liwe;
Bakendisyalangira ekihugho ky’ehali-hali.
18 Omo mutima waghu ukendisyibuka* eryubahya:
“Omuhandiki ali hayi?
Oyo wabya akalenga engemu ali hayi?
Oyo wabya akaghanza amanyumba mali-mali ali hayi?”
19 Siwendisyasyalangira abandu abalimo akaghonero,
Abandu abo omubughe wabo akalire* kutsibu eryowa,
Abandu abo ute wangowa olulimi lwabo lw’omutetu.
20 Usamalire e Sioni, omuyi w’ebiro byetu bikulu!
Ameso waghu akendisyalangira e Yerusalema mo h’eriikala ahatulere,
Ehema eyitendisyasegheribwa.
Esyongondo* syayo sisyendisyakulwa n’ahake,
N’emiriki yayo siyendisyatwibwako n’omughuma.
21 Aliwe eyo, Ow’olukengerwa, Yehova
Akendisyabya kiharo ky’esyonyusi busana netu, ekiharo ky’emighende minene-minene,
Eyitendisyaghenda ekikololo kyosi-kyosi ky’amato w’esyongahya
Kandi sihali n’amato manene-manene awakendisyalabayo.
22 Kusangwa Yehova ni Mutsweri wetu,
Yehova Yukatuha emighambo,
Yehova ni Mwami wetu;
Yukendisyatusabula.
23 Ebikoba byaghu bikendisyalegha-legha;
Sibyangatoka erihambirira enduyi kutse erisanzula ekitambara ky’obwato.
Oko mughulu oyo, ebindu bingyi ebiryanyeghawa bikendisyaghabwa;
Nibya n’omulema akendisyimya ebindu ebiryanyeghawa.
24 Kandi sihali omwikalani oyukendisyabugha ati: “Nilwere.”
Abandu abikere omo kihugho bakendisyaghanyirwa erilolo lyabo.