Yeremia
29 Bino by’ebinywa ebiri omo baruha eyo omuminyereri Yeremia atuma iniane e Yerusalema. Mwatumirayo abasyakulu ababya omo kati-kati k’abandu abatwalawa omo bunyewa, mwatumirayo abahereri, abaminyereri, n’abandu bosi obo Nebukadneza alusaya e Yerusalema akabatwala omo bunyewa mwe Babiloni. 2 Yeremia mwatuma e baruha eyo omwami Yekonia, omughole mukulu, abakulu abakakolera oko bwikalo bw’omwami, abakulu be Yuda n’abe Yerusalema, abafundi n’abahesi* babilua e Yerusalema. 3 Mwahekya ebaruha eyo yo Elasa mughala wa Shafani na Gemaria mughala wa Hilkia, abo omwami Zedekia we Yuda atuma e Babiloni, oko Nebukadneza omwami we Babiloni. Ebaruha eyo yabya ikabugha yiti:
4 “Bino byo Yehova w’emilondo, oMungu we Israeli, akabwira abanyewa bosi, abo alusaya e Yerusalema akabatwala omo bunyewa mwe Babiloni, 5 ‘Muhimbe amanyumba n’erikala mugho. Muhere amalima n’erirya amatunda wa kugho. 6 Mutahaye abakali, mubute abana b’obulume n’ab’obukali; mutahiraye n’abana benyu b’obulume, mulungisaye n’abambesa benyu, nabo batoke eriyira oko bana b’obulume n’ab’obukali. Mukanyirire eyo muli, isimwabya bake. 7 Omuyi ogho niryabatwalamo banyewa, muhire mugho m’obuholo, kandi musabe Yehova muti awatikaye omuyi oyo, kundi amabibya omo buholo, nenyu imukendibya omo buholo. 8 Kundi Yehova w’emilondo, oMungu we Israeli, ati: “Abaminyereri benyu n’abalaghuli benyu abali omo kati-kati kenyu isibabateba, kandi isimwakwama esyonzoli esyo bakalota. 9 Kundi ‘bakababwira obuminyereri bw’amabehi omo rina ryaghe. Munatatumabo,’ Yehova atya.”’”
10 “Yehova ati, ‘Emyaka 70 eyo mukendisyabugha e Babiloni yikendisyabya yabihwa, ngendisyabalengekaniako n’eriberererya endaghane yaghe omw’ibasubya omo mwanya ono.’
11 “‘Kundi ninasi ndeke-ndeke ebyo ngabasunzira,’ Yehova atya, ‘nanzire imwabya omo buholo, butsir’ihikirwa n’obuhanya. Nanzire imwabya ndeke omo biro ebikasa, n’eribya n’amaha. 12 Mukendisyanibirikira, mukendisyasa n’erinisaba, naghe ngendisyabahulikirira.’
13 “‘Mukendisyanisondya n’erinisunga, kundi mukendisyanisondya n’omutima wenyu wosi. 14 Ngendisyaleka imwanisunga,’ Yehova atya. ‘Kandi ngendisyakuma-kuma abandu benyu abalyatwalawa omo bunyewa, kandi ngendisyabahindania haghuma omwibalusya omo bihanda byosi n’omo myanya yosi eyo nabapanza-panziramo,’ Yehova atya. ‘Ngendisyabasubya omo mwanya ogho nabalusayamo omughulu nabatwala omo bunyewa.’
15 “Aliwe mumwabugha muti, ‘Yehova mwatuhiriraho abaminyereri itune e Babiloni.’
16 “Bino byo Yehova akabwira omwami oyo wikere oko kitumbi ky’obwami kya Daudi n’abandu bosi abikere omo muyi ono, abaghala benyu abataghenda nenyu omo bunyewa, 17 ‘Yehova w’emilondo ati: “Ngendibatumako omuyali, enzala, n’ekihunzo,* kandi ngendiyirabo ng’esyotini esihondire,* esitsandire kutsibu, esitesyangalibwa.”’
18 “‘Ngendisyakwamirirabo omo muyali, omo nzala, n’omo kihunzo. Kandi ngendisyayirabo mo kindu ekikita obuba oko mami wosi w’oko kihugho. Omo bihanda byosi ebyo ngendisyabapanza-panziramo, abandu bakendisyabya bakahulabo omughulu bakatakira, abandu bakendisyabya bakasweka bakabalangira, abandu bakendisyabya bakasughunda busana nabo, kandi bakendisyabatsweba, 19 kundi mubatahulikirira ebyo nababwira erilabira abaghombe baghe abaminyereri abo nabya ngabatumako kangyi-kangyi,’* Yehova atya.
“‘Aliwe mumwatahulikirira,’ Yehova atya.
20 “Neryo, muhulikirire ekinywa kya Yehova inywe bandu bosi, inywe muli omo bunyewa, inywe nalusya e Yerusalema, n’eribatwala e Babiloni. 21 Bino byo Yehova w’emilondo, oMungu we Israeli, akabugha oko Ahabu mughala wa Kolaya, na Zedekia mughala wa Maaseya, abakababwira obuminyereri bw’amabehi omo rina ryaghe, ‘Ngendihirabo omo byala by’omwami Nebukadneza* we Babiloni, kandi ngendisyitabo imunalangire. 22 N’ebikendihikirabo, abanyewa bosi be Yuda abali e Babiloni bakendisyabya bakahulabyo omughulu bakatakira. Bakendisyabya bakabugha bati: “Yehova akuyire nga Zedekia na Ahabu, abo omwami we Babiloni okaya omo muliro!” 23 Kundi mubakola emyatsi eyikita esisoni omo Israeli, omw’isingira n’abakali b’abahimbani babo n’omw’ibugha amabehi omo rina ryaghe isinditatumabo.
“‘“N’ingye nasi, kandi niri mwimiri,”* Yehova atya.’”
24 “Ukendibwira Shemaya we Nehelamu uti, 25 ‘Yehova w’emilondo, oMungu we Israeli ati: “Kundi mughukatumira abandu bosi be Yerusalema na Zefania mughala wa Maaseya, omuhereri, n’abahereri bosi b’esyobaruha omo rina ryaghu, esihandikiremo siti, 26 ‘Yehova mwakuyira mo muhereri omo mwanya w’omuhereri Yehoyada, utoke eribya mwimaniri w’enyumba ya Yehova. N’omusire amayiwata ng’omuminyereri, n’iwe utolere erimuha amalipizi omw’imuhira omo bindu by’esyombagho by’eriboheramo omundu,* n’eringirya ebikya biwe omo kindu ky’ekyuma ky’eribohamo ebikya. 27 Neryo busanaki siwetahayira Yeremia we Anatoti, oyukayiwata ng’omuminyereri omo kati-kati kenyu? 28 Kundi nibya mwakatutumako omulaghe itune e Babiloni, owakabugha ati: “Mukendibughayo ebiro binene! Muhimbe amanyumba n’erikala mugho. Muhere amalima w’amatunda n’erirya amatunda wa kugho...”’”’”
29 Omuhereri Zefania mwabya abisoma ebaruha eyo embere sy’omuminyereri Yeremia, 30 Yehova mwakania na Yeremia, amamubwira ati: 31 “Utumire omulaghe ono w’abandu bosi abali omo bunyewa, ubabwire uti, ‘Bino byo Yehova akabugha oko Shemaya we Nehelamu: “Shemaya mwakababwira obuminyereri isinditamutuma, kandi mwakasonda erileka imwaligha amabehi. 32 Neryo, Yehova ati, ‘Ngendiha Shemaya we Nehelamu y’amalipizi, iye n’abitsikulu biwe. Sihali n’omughuma omo kihanda kiwe oyukendisyabala omo kati-kati k’abandu aba. Kandi syendisyalangira emyatsi eyuwene eyo ngendisyakolera abandu baghe,’ Yehova atya, ‘kundi mwaleka abandu ibaghana erikolera Yehova.’”’”