Engulu mbuya eyahandikawa na Matayo
6 “Muyiteghaye, isimwabya mukakola amategheko mabuya busana n’eriyikangania embere sy’abandu. Mwamabikola ebibuya busana n’eriyikangania, Tata wenyu oyuli elubula isyendisyabahemba. 2 Neryo omughulu mukawatikaya abera, isimwalalanaya omwatsi* ngoko abatebya bakakola omo syosinagogi* n’oko syonzira. Kusangwa banzire abandu ibabapipa. Oko kwenene ngababwira nyiti ekihembo kyabo, rye n’eripipwa n’abandu. 3 Nikwa iwe, omughulu ukawatikaya abera, ebyala byaghu by’amalembe isibyaminya ekyo ebyala byaghu by’amali bikakola. 4 Omughulu ukawatikaya abera, iwakola utya omo bubiso-biso. Neryo Tata waghu oyukalangira omo bubiso-biso iniakendikuhemba.
5 “Kandi omughulu ukasaba, isiwabya ng’abatebya; kundi bakanza erisabira omo syosinagogi* n’omo mahwa w’esyonzira nene-nene, abandu batoke eribalangira. Kwenene-kwenene ngababwira, ekihembo kyabo rye n’eripipwa n’abandu. 6 Nikwa iwe omughulu ukasaba, wingire omo kyumba kyaghu. Neryo wabikinga omulango,* usabe Tata waghu oyuli omo bubiso-biso; neryo Tata waghu oyukalangira omo bubiso-biso akendikuhemba. 7 Omughulu ukasaba isiwabya ukasubirira omo binywa bighumerera ngoko abandu b’ebihanda bakakola. Kusangwa bakalengekanaya bati bamabibugha ebinywa bingyi, oMungu iniakendyowabo. 8 Isimwabya ngabo. Kusangwa Tata wenyu w’elubula anasi ebyo mulaghireko nibya isimulimwamusaba.
9 “Neryo, litolere imwabya mukasaba mutya; muti:
“‘Tata wetu oyuli elubula, erina ryaghu riyirawe mo libuyirire. 10 Obwami bwaghu bwase. Erisonda ryaghu rikoleke oko kihugho ng’omo lubula. 11 Utuhe akalyo ketu ka munabwire. 12 Utughanyire ebibi* byetu ngoko netu tukaghanyira abakatukosera. 13 Isiwaleka erilengwako rikatukinda,* nikwa utulamaye oko mubi.
14 “Kundi mwamaghanyira abandi b’amakosa wabo, Tata wenyu w’elubula naye iniakendibaghanyira. 15 Aliwe mwamatendighanyira abandi b’amakosa wabo, Tata wenyu w’elubula naye isyendibaghanyira amakosa wenyu.
16 “Omughulu mukakola amafungo, isimwabya n’obusu bw’obulighe ng’abatebya. Kusangwa bakabya n’obusu bw’obulighe busana n’erikangania abandu ngoko bali omo mafungo. Oko kwenene ngababwira, ekihembo kyabo rye n’erilangirwa n’abandu. 17 Nikwa iwe, omughulu ukakola amafungo, uhire omo mutwe waghu mw’amaghuta n’erinaba omo busu. 18 Wamabikola utya, ighukendikangania ngoko ukakola amafungo busana na Tata waghu oyuli omo bubiso-biso; butsira busana n’abandu. Neryo Tata waghu oyukalangira omo bubiso-biso, iniakendikuliha.
19 Muleke eribya mukayibikira ebindu by’obughuli oko kihugho. Kundi oko kihugho, ehinyurughunzu* n’amakenge bikatsandayabyo, kandi n’abibi bakasa n’eribabyo. 20 Nikwa muyibikire ebindu by’obughuli by’omo lubula, kundi siyiri ehinyurughunzu* n’amakenge ebyangatsandyabyo; kandi n’abibi sibangahikayo. 21 Kusangwa ahali ebindu byaghu by’obughuli, ho hakanabya omutima waghu.
22 Etala y’omubiri ry’eriso. Eriso lyaghu lyamatungerera ekindu kighuma,* omubiri waghu wosi inyakendibyamo ekyakakala. 23 Nikwa eriso lyaghu lyamabya ribi,* omubiri waghu wosi inyakendyusulamo omwirimya. Omubiri waghu amabibyamo omwirimya, omo mwanya w’eribyamo ekyakakala, omwirimya oyo iniakendibya munene kutsibu!
24 “Sihali omundu oyo wangatoka erikolera abakama babiri; kundi iniakendyanza omughuma n’eripona oghundi, kutse iniabya mutaleghula oko mughuma n’erighonera oghundi. Simwangatoka erikolera oMungu n’Ebindu.
25 “Busana n’ekyo, ngababwira: Muleke eribya mukahangya-hangya busana n’engebe yenyu nga mukendiryaki kutse nga mukendinywaki; kutse erihangya-hangya busana n’emibiri yenyu nga mukendyambalaki. Engebe si y’omughaso kulenga akalyo kwehi? N’omubiri kulenga esyongyimba kwehi? 26 Muyiteghereraye esyonyunyu sy’omo kyanya; sisirilima, kutse erihulula, kutse eribika omo depo.* Aliwe, Tata wenyu w’elubula akalisayasyo. Simuli b’obughuli kulenga esyonyunyu esyo kwehi? 27 Nindi okw’inywe oyo wangatomeka* oko ngebe yiwe omw’ihangya-hangya kwehi? 28 Kandi busanaki mukahanga-hangaya busana n’esyongyimba kwehi? Musamalire amawa w’omoli ngoko akalasa; syalinuba, kutse erikokotya esyongyimba. 29 Nikwa ngababwira niti, nibya na Solomona omo lukengerwa lwiwe losi, mwatambala ng’erighuma ry’oko mawa aya. 30 Neryo oMungu amabya inyakambalaya atya ebiti by’omoli ebikalasa munabwire n’omungya ibyaghuswa omo muliro, syendibambalya kwilaba aho inywe muwite obwikirirya buke? 31 Neryo isimwahanga-hangaya n’ahake n’eribugha muti: ‘Tukendiryaki?’ kutse ‘Tukendinywaki?’ kutse, ‘Tukendyambalaki?’ 32 Kusangwa emyatsi yosi eyi yo abandu b’ebihanda bakasondekanaya kutsibu. Tata wenyu w’elubula anasi ngoko munalaghire oko myatsi yosi eyi.
33 “Neryo mulole embere erihira* Obwami bw’oMungu bw’embere n’eritunganene riwe. N’eyindi myatsi yosi eyi mukendisyahabwayo. 34 Okw’ekyo simuhanga-hangaye n’ahake busana n’engyakya. Kusangwa engyakya ikendisyabya n’amaghaniryo wayo. Obuli kiro kiwite amalighe wakyo.