Isaya

65 “Nabiriligha erisonda-sondibwa n’abandu abatanyisonda-sondaya;

Nabiriligha abandu abatanisonda-sonda banibane.

 2 Omo musibo wosi nabirisanzira abandu b’epono b’ebyala byaghe,

Abandu abakalendera omo nzira eyituwene,

Abakakwama amalengekania wabo-wabo;

 3 Abandu abakanihitanaya ebiro byosi ininalangire,

Abakaherera amahere omo malima n’eritumbirya omuki w’amahere oko syombiriki.

 4 Bakikakala omo masinda,

N’omo kiro kyosi bakabya omo myanya eyibisamire,*

Ibanemulya esyonyama sy’esyongulube,

N’omuto w’ebindu ebikiita nye* ali omo syonyungu syabo.

 5 Bakabugha bati, “Ubye aho ighuwene; isiwaseghera hakuhi naghe,

Kusangwa nyibuyirire kukulenga.’*

 6 Lebaya! Kisakire embere syaghe;

Sinendihangana buyira,

Aliwe ngendilihabo,

Ngendilihabo ndeke-ndeke*

 7 Busana n’ebibi byabo na busana n’amalolo w’abotata-kulu wabo,” Yehova atya.

“Kusangwa babiritumbya omuki w’amahere oko bitwa

N’erinihemula oko hitwa,

Ngenditsuka nalenga obuhingyi bwabo bo ndeke-ndeke.”*

“Ng’omughulu edivai nyihya-nyihya ikasungika omo kisaki ky’emizabibu

N’omundu inyabugha ati, ‘Isiwatsandayakyo, kusangwa mune ekibuya,’*

Ko ngedisyakola nitya busana n’abaghombe baghe;

Sinendisyaheryabo abosi.

 9 Ngendisyahulukya olubuto* omo Yakobo

N’erihulukya omo Yuda mw’omuli w’omwandu w’ebitwa byaghe;

Abasombolwa baghe bakendisyasighalyakyo,

N’abaghombe baghe bakendisyikalayo.

10 E Sharoni ikendisyabya lulisiryo lw’esyombuli

N’Omusya* we Akori ah’eribundama busana n’esyonde,

Busana n’abandu baghe abakanisonda-sonda.

11 Nikwa uli omo kati-kati k’abakasighanaya Yehova,

Abakibirirawa ekitwa kyaghe kibuyirire,

Abakateghekanaya emesa busana n’omungu w’Omuyisa,

N’abakusulaya omo kikombe mw’edivai eyitulungene busana n’omungu w’Obuhanya.

12 Neryo ngendisyabasohera omuyali,

Inywe bosi mukendisyunama n’erikerwa,

Kusangwa munabirikira, aliwe mumutitaba,

Munabugha, mumutahulikirra;

Mumwayitsinga erikola ebibi omo meso waghe,

Kandi mumwayisogha ebikaniponesaya.”

14 Mulebaye! Abaghombe baghe bakendisyuta obwogho bw’obutseme busana n’omutima owatsemire,

Aliwe inywe mukendisyalira busana n’obulumi bw’omutima

Kandi mukendisyayilakira busana n’ekirimu ekibunikire.

15 Mukendisyasigha enyuma erina eryo abasombolwa baghe bakendisyabya bakakolesya mo kitsumi,

Na Yehova, Omukama Mukulu oko Bosi akendisyita obuli mughuma w’okw’inywe,

Nikwa akendisyabirikira abaghombe biwe omo lindi rina;

16 Neryo owosi-wosi oyukayisonderaya omuyisa omo kihugho

Akendisyatsumulwa erilabira oMungu w’ekwenene,*

N’owosi-wosi oyukalahiraya omo kihugho

Akendisyalahirya oko Mungu w’ekwenene.*

Kusangwa amalighe* wa kera akendisyibiriranwa;

Akendisyabiswa oko meso waghe.

17 Kusangwa mulebaye! Ngahangyika olubula luhya-luhya n’ekihugho kihya-kihya;

N’emyatsi ya kera siyendisyasyibukwa,*

Kutse siyendisyasyasa omo mutima.

Kusangwa lebaya! Ngahangyika e Yerusalem eribya kindu ekikaleta obutseme

N’abandu bayo eribya kindu ekikaleta eriyisyandira.

19 Neryo ngendisyatsemera e Yerusalema n’eryisyandira omo bandu baghe;

Siyendisyasyowibwa omulenge w’ekiriro kutse omulenge w’obulighe.”

20 “N’eyo siyendisyasyabya olumekeke olukabyaho omo biro bike buyira,

Kutse omusyakulu oyukataluka eribererya ebiro biwe.

Kusangwa owosi-wosi oyukahola n’emyaka 100 akendisyaghanzwa mo mulwana,

N’omukola-nabi akendisyatakirwa nomo angabya iniawite emyaka 100.*

21 Bakendisyahimba amanyumba n’eriikala mugho,

Kandi bakendisyahera amalima w’emizabibu n’erirya amatunda wagho.

22 Sibendisyahimba amanyumba neryo oghundi mundu inyikala mugho,

Kutse sibendisyahera, ikwa abandi ibalyabyo.

Kusangwa ebiro by’abandu baghe bikendisyabya ng’ebiro by’omuti,

N’abasombolwa baghe bakendisyatsemera ndeke omubiiri w’ebyala byabo.

23 Sibendisyanubira* busa,

Kutse eributa abana busana n’obulighe,

Kusangwa ni lubuto* lw’abandu abo Yehova abiritsumula,

N’abitsikulu babo haghuma nabo.

24 Nibya embere babirikire, ngendisyasubirya;

Ngendisyowa, ibakinabugha.

25 Omukenge* n’ekyana ky’embuli bikendisyalya haghuma,

Endale* ikendisyalya ebiti ng’enume y’ende,

N’olututu lukendisyabya kalyo k’enzoka.