Engulu mbuya eyahandikawa na Luka
13 Oko mughulu oyo abandu balebe ababyaho mubakanirya Yesu y’omwatsi w’Abagalilaya abo Pilato ita n’eritulungania omusasi wabo omo buhere bwabo obo babya bakaherera. 2 Mwasubiryabo ati: “Mukalengekanaya muti Abagalilaya aba mubahikirwa n’emyatsi eyi kundi babya babi kutsibu kulenga abandi Bagalilaya bosi? 3 Ko bite bitya, nikwa mwamatendibindula emitima, nenyu, inywe bosi imukendisyaheribwa mutya. 4 Kutse mukalengekanaya muti abandu 18, abo enyumba nyiri yatererako e Siloamu n’eritabo, babya babi kutsibu kulenga abandu bosi be Yerusalema? 5 Ko bite bitya, nikwa mwamatendibindula emitima, nenyu, inywe bosi imukendisyaheribwa ngoko banahera.”
6 Neryo mwabugha omusyo ono, ati: “Omulume mughuma abya n’omuti w’omutini omo ririma liwe ry’emizabibu. Neryo mwayasondya kugho kw’amatunda; nikwa mwatabana w’oko. 7 Neryo mwabwira omughombe w’omo ririma riwe ry’emizabibu ati, ‘Eno ni myaka isatu ininemusyasondya amatunda oko muti w’omutini oyu, aliwe sindinatabana w’oko. Ukondegho! Akalya omwanya omo ririma ryaghe mo busanaki?’ 8 Naye mwamusubirya ati, ‘Mukama, utasyalekagho omo mwaka mughuma. Ngendilima oko musike wagho n’erihirako embolewa. 9 Amabihetya ikyuwene, kandi ini kibuya. Aliwe amatendisyahetya, iwakondagho.’”
10 Omo kiro ky’Esabato, Yesu abya inianemukangirirya omo sinagogi* nguma. 11 Omo sinagogi* eyo mwabya omukali oyo ekirimu kibi kyabya ikyabirilwalya omo myaka 18; abya iniabirikondoma, isyangasyatoka eriyisingyika. 12 Yesu mwabya abilangira omukali oyo, mwamubwira ati: “Mukali wamabiboholwa oko ndwala yaghu.” 13 Yesu mwamuhirako ebyala. Neryo aho n’aho mwayisingyika n’eritsuka eripipa oMungu. 14 Aliwe omukulu w’esinagogi* mwahitana kundi Yesu amalamya omo kiro ky’Esabato. Neryo mwabwira abandu ati: “Hali ebiro ndatu (6) by’erikola emibiiri. Neryo mubye mukasa erilamibwa omo biro ebyo, butsira ekiro ky’Esabato.” 15 Neryo Omukama mwamusubirya ati: “Inywe batebya, oko kiro ky’Esabato obuli mughuma w’okw’inywe syalihangula ende kutse epunda yiwe eyiri omo nyumba n’eriyanywisyayo kwehi? 16 Omukali oyu, omwali wa Abrahamu, kandi oyo Sitani abiriboha oko myaka 18, syatolere eriboholwa omo kiro ky’Esabato kwehi?” 17 Omughulu abugha emyatsi eyi, esyonzighu siwe syosi musyakwa esisoni; nikwa abandi bandu bosi mubatsema kutsibu busana n’emyatsi y’eriswekera eyo akola.
18 Neryo mwabugha ati: “Obwami bw’oMungu bulingene naki? Kandi nangasosekaniabo naki? 19 Buli ng’embuto y’eharadali eyo omundu imaya n’eriherayo omo kalima kiwe. Neryo muyalasa n’eribya muti. N’esyonyunyu sy’omo kyanya musyahimba esyonyutu omo mitahi yagho.”
20 Kandi mwabugha ati: “Nangasosekania Obwami bw’oMungu naki? 21 Buli ng’elevire* eyo omukali imaya n’eritulunganiayo omo hilengyi* hisatu hy’eyisyano y’erikokotyamo emikati, erihika aho obundu bosi bwabimbira.”
22 Kandi Yesu iniane omo nzira akaya e Yerusalema, mwalaba omo miyi n’omo milongo inianemukangirirya. 23 Neryo omundu mwamubulya ati: “Mukama, abakalamibawa ni bake kwehi?” Mwabwirabo ati: 24 “Muyikase kutsibu eringira erilabira olukyo luke; kusangwa ngababwira, abangyi bakendisyasonda eringira nikwa sibendisyatoka. 25 Omwenye nyumba akendisyabya ahangana n’erikinga omulango, mukendisyimana ehihya imunemukongota muti, ‘Mukama, kisi tukingulire.’ Nikwa akendisyabasubirya ati: ‘Sinyasi nga mukasira hayi.’ 26 Neryo mukendisyatsuka eribugha muti, ‘Mutwalya n’erinywa embere syaghu. Kandi muwakangirirya omo nzira sy’ewetu.’ 27 Nikwa akendisyababwira ati, ‘Sinyasi nga mukasira hayi. Inywe bosi mulue aho niri, inywe bakoli b’ebibi!’ 28 Eyo, mukendisyalira n’erikeregheta ameno wenyu mukalangira Abrahamu, Isaka, Yakobo, n’abaminyereri bosi ibane omo Bwami b’oMungu; nikwa inywe imwabirighuswa ehihya. 29 Kandi abandu bakendisyasira eyo eryuba rikahulukira n’eyo likalengera, n’oko luhande lw’endata n’olw’eyikwa, n’eryikala oko mesa omo Bwami bw’oMungu. 30 Hane ab’omwiso abakendisyabya b’erimbere; n’ab’erimbere abakendisyabya b’omwiso.”
31 Oko ndambi eyo Abafarisayo balebe mubasa n’erimubwira bati: “Ulue hano, ughende! Kusangwa Herode anemusonda erikwita.” 32 Mwabwirabo ati: “Muyabwire eboha eyo muti, ‘Ngahigha esyombinga n’erilamya abandu munabwire n’omungya; n’omo kiro ky’akasatu, ngendibya inamabugha.’ 33 Nikwa litolere inalolya olughendo lw’embere; munabwire n’omungya na mwalindi, kusangwa sikitokekene omuminyereri inyitirwa ehihya we Yerusalema. 34 Yerusalema, Yerusalema, iwe ukita abaminyereri n’eriita omo mabwe abandu abo oMungu akakutumira! Nabirisonda ngendo singahi erikuma-kumira abana baghu bo haghuma ngoko eributi ry’engoko rikanakuma-kumira ehipyeghe hyalyo hy’omo bipupa byalyo! Nikwa mughutanza. 35 Lebaya! Wamasighirwa oko waghu. Ngakubwira, siwendisyasyanilolako n’ahake erihika omughulu ukendisyabugha uti: ‘Omuyisa ali oko yukasa omo rina rya Yehova.’”*