Ezekieli
34 Kandi ekinywa kya Yehova mukyanihikako kiti: 2 “Mughala w’omundu, ubughe omo buminyereri ebikendihikira abalisya ba Israeli. Ubughe omo buminyereri, ubwire abalisya uti, ‘Yehova, Omukama Mukulu oko Bosi ati: “Obulighe oko balisya ba Israeli abakayilisaya ibobene! Ekihangulo sikyo abalisya batolere erilisya kwehi? 3 Mukalya ebisabu, imwambala esyongyimba sy’obweya bw’embuli, kandi mukakera enyama eyinenehire omo syosi, aliwe simulilisaya ekihangulo. 4 Simutasikya esitawite kaghala kutse erilamya esilwere kutse eriboha esihutere kutse erisubya omo kihango esikaghanga-ghanga kutse eriyasondya esitere. Omo mwanya w’ekyo, mwabiritabalasyo omo bukatsu* n’omo butsibu. 5 Neryo musyapanzikana kundi sihabya omulisya; musyapanzikana, syamabya kalyo k’obuli nyama y’omoli. 6 Esyombuli syaghe syabya sikaghanga-ghanga oko bitwa byosi n’oko buli katwa kali; esyombuli musyapanzikanira omo kihugho kyosi, isihali n’oyukasonda-sondayasyo kutse oyukayikasa eriminya aho siri.
7 “‘“Neryo inywe balisya, muhulikirire ekinywa kya Yehova: 8 ‘“Oko kwenene-kwenene ngoko niriho,” Yehova, Omukama Mukulu oko Bosi atya, “kusangwa esyombuli syaghe syabiribya kalyo k’obuli nyama y’omoli, kandi esyonyama sy’omoli esyo sikahighasyo kundi sihabya omulisya; kandi kusangwa abalisya baghe mubatasondya esyombuli syaghe, aliwe omo mwanya w’ekyo, bamababya bakayilisya n’erighana erilisya esyombuli syaghe,”’ 9 busana n’ekyo inywe balisya, muhulikirire ekinywa kya Yehova. 10 Yehova Omukama Mukulu oko Bosi ati: “Ngalwa n’abalisya, kandi ngenditondesyabo busana n’esyombuli syaghe,* ngendibatibitako ibalua oko mubiiri w’erilisya* esyombuli syaghe, neryo abalisya sibendisyasyayilisya. Ngendilusya esyombuli syaghe oko muno wabo, sisyendisyasyabya kalyo kabo.’”
11 “‘Kusangwa Yehova Omukama Mukulu oko Bosi ati: “Ingye y’ono, kandi ingyuwene-wene ngendisondya esyombuli syaghe, kandi ngendisulubirirasyo. 12 Ngendisulubirira esyombuli syaghe ng’omulisya oyo wabirisunga esyombuli siwe esyapanzikana, neryo anemulisyasyo. Ngendilamyasyo n’erilusyasyo eyo syapanzirawa ekiro ky’omulumbi n’omwirimya munene. 13 Ngendilusyasyo omo bitunga by’abandu, ngendikuma-kumasyo erilua omo bihugho inaletasyo omo kihugho kyasyo n’erilisiryasyo oko bitwa bya Israeli, oko hyusi n’omo myanya yosi y’eriikalamo y’ekihugho ekyo. 14 Ngendilisiriryasyo omo lulisiryo oluwene, ekihugho ekyo sikaliramo kikendibya oko bitwa biri-biri bya Israeli. Sikendisyabundama eyo omo kihugho ky’olulisiryo ekyowene, kandi sikendisyalira omo lulisiryo lw’ebiti ebiboroghonyire oko bitwa bya Israeli.”
15 “‘“Ingyuwene-wene ngendisyalisya esyombuli syaghe, kandi ingyuwene-wene ngendisyabundamyasyo,” Yehova, Omukama Mukulu oko Bosi atya. 16 “Ngendisonda-sonda esiherire, inasubulya esyabirighanga-ghanga, esihutere inabohasyo, inasikya n’esitawite kaghala; nikwa esinenehire n’esikalire ngendisyatoghotyasyo. Eyiri ng’eyo ngendisyalisyayo omw’itswera.”
17 “‘Nikwa inywe mbuli syaghe, Yehova Omukama Mukulu oko Bosi ati: “Nikisiya inatswera omo kati-kati k’embuli n’eyindi mbuli, n’omo kati-kati k’esyombangale n’esyombaya. 18 Erilira omo lulisiryo oluwene kulenga ebindi bilisiryo sikibatosire kwehi? Neryo linatolere imwalyatangirira ebindi bilisiryo byenyu omo bisando byenyu? Kandi mwabinywa amaghetse awasongokere kutsibu, linatolere imwatabulagho, mukalyatanga mugho? 19 Linatolere esyombuli syaghe isyalira omo lulisiryo olo mwabirilyatangirira n’erinywa amaghetse agho mwabiritabula mukalyatanga mugho?”
20 “Neryo Yehova Omukama Mukulo oko Bosi akabwirabo ati: “Ingye y’ono. Kandi ingyuwene-wene, ngenditswera omo kati-kati k’embuli eyinenehire n’embuli eyibondire. 21 Kusangwa esyosi esilwere mumwabya mukakuna-kunasyo omo nganga syenyu n’omo bitigho, n’erihumirasyo omo mahembe wenyu erihika okw’ipanza-panzirasyo ehihya. 22 Ngendilamya esyombuli syaghe, nasyo sisyendisyasyabya nyama sy’erihigha; kandi ngenditswera omo kati-kati k’embuli n’embuli. 23 Ngendihirasyo omo buteya bw’omulisya mughuma, omughombe waghe ye Daudi, naye akendilisyasyo. Iyuwene-wene akendilisyasyo, inyabya mulisya wasyo. 24 Naghe ingye Yehova, ngendibya Mungu wasyo, n’omughombe waghe ye Daudi inyabya mukulu omo kati-kati kasyo. Ingye Yehova nabiribugha.
25 “‘“Kandi ngendikola nasyo endaghane y’obuholo. Kandi ngendibugha omo kihugho mw’esyonyama sy’omoli esikalire. Neryo esyombuli syaghe isyatoka eriikala mbolere omo mbwarara n’erighotsera omo misitu. 26 Ngendisyayirasyo mo muyisa; isyo n’ekiharo ekitimbire oko katwa kaghe. Kandi ngendisyawisya embula oko ndambi eyitolere. Emiyisa ikendisyawa ng’embula. 27 Emiti y’omoli ikendisyahetya amatunda, n’ekitaka kikendisyerya akalyo. Nasyo sikendisyikala buholo omo kihugho. Nasyo sikendisyaminya ngoko indi Yehova ngatwa emiti y’emiketo yasyo n’erilusyasyo omo byala by’abahirasyo omo bukobe. 28 Sisyendisyabya nyama esyo ebihanda bikahigha, n’esyonyama sy’omoli sy’ekihugho sisyendisyalyasyo. Sikendisyikala mbolere, isihali oyukubahayasyo.
29 “‘“Ngendisyahirira syoho eririma linene ry’erikumayira.* Sisyendisyasyahola n’enzala omo kihugho. Kandi ebihanda sibyendisyasyahemulasyo. 30 ‘Neryo bakendisyaminya ngoko indi Yehova Mungu wabo, ngoko indi haghuma nabo kandi ngoko nabo, ekihanda kya Israeli, ni bandu baghe,’ Yehova, Omukama Mukulu oko Bosi atya.”’
31 “‘Nenyu, inywe mbuli syaghe, esyombuli esyo ngasulubirira, muli bandu, naghe indi Mungu wenyu,’ Yehova, Omukama Mukulu oko Bosi atya.”